Ita dadi Ramatua' a lahenda lalao-lalafun
2
De emi boso' tao tadalu' hata esa boe. Boso' tipu-dai lahenda. Boso' dea-mata'. Boso' ete ao'. Boso' mamumulu-mamamae' lahenda. Tu'u heni basa sira leo! 2 Ana boki beu' ara rahii' susu reme mama nara susu oe na. Leo' naa boe, emi dale mara muste rahii' bubulu-malela' Manetualain Hara-dasin. Huu fo ria ri' tao na emi namahere ma tamba fai' tamba tea-mepe'. De emi bisa mamatua nai Yesus dale', fo masoda tuka Manetualain hihii-nanaun. 3 Huu fo emi mameda mita ita Ramatua na dale malole Na.a4 Mabua-maesa mo Kristus. Huu fo Ria sama leo' batu esa, tehuu batu masoda' ria. Tukan ara tu'u heni batu ria, nana huu ara afi rae, batu ria ta nanuu sosoa-raraa'. Tehuu Manetualain tao Ni neu' hata mabeli bera', boe ma here naa Ni dadi batu buku' penting. 5 Emi boe muste mabua-maesa mo Kristus, ela Manetualain pake emi. No ria naa, emi sama leo' batu fo ri' Manetualain here naan ela tao uma fee Ria Dula-dale Na. Emi batu masoda' sama leo' Kristus boe. Emi sama leo' malaka agama fo rasoda lalao-lalafu' soa-neu' Manetualain. Ria sama leo' emi meni fee Ni tutunu-hohotu'. Emi tutunu-hohotu mara tao ramaho'o Manetualain dale Na, nana huu Yesus Kristus mate soa-neu' emi basa. 6 Huu fo mana dui' nai Manetualain Susura Makamoi Na dale' nae,
“Mete dei! Huu fo Au atuu-atende batu masososa' a,
nai kota Yerusalem,
fo ri' ara hule rae, ‘kota Sion’.
Au here batu ria.
Ria beli' mesan soa-neu' Au.
De lahenda bea namahere Ni,
neu' ko ta mae' hata esa boe'.”b
7 Yesus sama leo' batu ria. Boe ma Ria beli' mesan soa-neu' lahenda fo ramahere Ni. Tehuu soa-neu' lahenda fo ta ramahere Ni, Manetualain Susura Makamoi Na mana dui' nae,
“Batu fo ri' tukan ara tu'u henin,
besa' ia dadi
batu masososa penting.”c
8 Manadui' boe nae,
“Hapu batu tao na lahenda natundu.
Hapu batu tao na lahenda ra tu'u reu.”d
Ara tu'u reu, nana huu ara ta nau tao tuka Manetualain Hara-dasin. Huu fo Manetualain ator mema' leo naa', ela ara tu'u reu.
9 Tehuu emi ta leo naa'. Huu fo emi dadi Manetualain lahenda teteka-heheren. Emi dadi Ria nuu-enan. Emi sama leo' malaka agama a nalalau' mane'. Emi boe sama leo' lahenda nusa' esa fo rasoda lalao-lalafu' soa-neu' Manetualain. Emi dadi leo naa', ela emi bisa tui-beka fee lahenda la'e-neu' Manetualain dale malolen, fo ri' Ana taon soa-neu' emi. Ana nadenu emi saledale-tu'etei mara ma moi-tao malole. Ria sama leo' emi kalua meme maiu' a mai, de masoda nai Ria makaledon dale'.e 10 Maulu na emi dadi sama leo' kileo-boboki' sosoa-raraa taa' esa. Tehuu besa' ia emi dadi Manetualain kileo-bobokin so. Maulu na emi ta nau sipo' Manetualain dale kasian na neu' emi a. Tehuu besa' ia, emi sipo'.f
Tanea tatalolole ela ita tasoda roo-tetu'
11 Toranoo susue kara! Emi sama leo' fui nai dae-bafo' ia, nana huu emi lahenda mana mai. Huu ria naa, au hule emi boso' sama leo' lahenda dae-bafo' feke' nai dae-bafo' ia, fo tao tadalu' tuka sira hihii-nanaun. Huu fo hapu natati ao' esa nai emi dale mara. Nana ri' dale' fo nahii' tao tadalu' natati soa' dale' fo nahii' tao malole. De boso' mataa' dale' fo ri' nahii' tao tadalu' naseki emi. Kalu leo naa', sona emi malulutu'! 12 Lahenda fo ri' ta ralela' Ramatua' a, emi manea matalolole ela masoda roo-tetu' nai sira matan. No ria naa, uni' ko leo rafarara'u rapaneneo' emi, sona ara rita noi emi malole ma. Boe ma kalu Kristus natafali mai, sona neu' ko sira so'u radedema Manetualain, nana huu emi nonoi-tatao malole ma.
Ita muste tamania-tamanene neu' lahenda mana homu kuasa
13 Ita Ramatua na nau emi mamania-mamanene neu' lahenda mana homu kuasa. Conto leo-leo': mamania-mamanene neu' mane', huu fo ria dadi mauli-malaka madema. 14 Mamania-mamanene neu' gubernor, huu fo mane' a nadenu ni huku lahenda mana tao tadalu' ara, ma ana io lahenda fo tao hihii-nanau' roo-tetu' ara. 15 Huu ria naa, Manetualain nahii' emi tao roo-tetu', ela lahenda koa-pakanaa' fo ta bubulu' hata esa boe', ta hapu nete' fo rapaneneo' emi. 16 Leo mae emi dadi lahenda po'ilota', de manuu haak tao tuka emi hihii ma, tehuu boso' pake mafarara'u haak ria, fo tao hihii-nanau tadalu'. Pake haak ria fo moi-tao soa-neu' Manetualain, huu fo emi dadi Ria nuu-enan. 17 Emi muste fee hada-horomata neu' basa lahenda ra. Emi muste sue-lai basa lahenda fo ri' ramahere Kristus. Emi muste masoda natetu-naraa nai Manetualain matan, huu fo neu' ko Ria naetu' huhuku' soa-neu' emi. Ma emi muste fee hada-horomata neu' mana pareta ra.
Ita muste tanenete nai susa dale', tuka Kristus conto Na
18 Ata ra! Mamania-mamanene neu' emi malaka mara, ma fee hada-horomata neu' asa. Boso' mamania-mamanene noi malaka dale malole ma balaroe-balanau'. Uni' ko leo emi malaka ma tadalu naan seli, tehuu emi muste mamania-mamanene neu' ana boe. 19 Kalu emi malaka ma huku nafarara'u emi bea, leo mae emi ta tao sala' ma kalu emi manenete nai susa ria dale', nana huu mafarene Manetualain hihii-nanaun soa-neu' emi, sona neu' ko Manetualain natudu Ria dale malole Na neu' emi. 20 Uni' ko leo emi tao sala', boe ma hapu fefepa-lili'u ma kalu emi mahani' susa ria dale', sona onto ubea'? Ta'a hete? Tehuu kalu emi hapu susa nana huu emi tao malole ma emi manenete, sona Manetualain tao dale' neu' emi. 21 Kristus nahii' emi tao malole, leo mae emi hapu susa. Huu soa-neu' ita, de Ana lepa-nasaa susa. No ria naa, Ana dadi conto ela ita tuka Ni, sama leo' ita molo-tabu tuka Ria ei ree Na. 22 Manetualain Susura Makamoi Na mana dui' nae,
“Ana ta parnaa tao sala'.
Ta hapu dedea napuputa' a kalua neme Ria bafa Na mai.”g
23 Fai fo ara dedea radadae Ni, Ana ta balas. Fai fo Ana hapu susa, Ana ta balas. Tehuu Ana fee heni ao-ina Na leo Manetualain lima Na neu. Huu fo Ana namahere Manetualain nana Mana Ee Dedea Matetu'.h 24 Fai fo Kristus maten nai ai kake' a, Ana lepa-nasaa na ita sala-sikon. Ana tao leo naa', de ita ta tao sala' so'. Besa' ia ita ta tao sala', tehuu ita tao noi roo-tetu' a. Huu fo Ana kati ita, de sipo na ita huhuku na. Huhuku' ria tao naa Ni hina-hina' mesan, losa Ana mate. Hina' fo ri' tao namate Ni puli na emi.i 25 Huu fo maulu na emi sama leo' bibi-lopo manasala-manamopo'. Tehuu besa' ia emi fali leo Ramatua' a eno roo-tetu Na meu so. Ria nanea ma naboi-nasamao natalolole emi, sama leo' mana foo esa nanea ma naboi ria bibi-lopo nara.