Lahenda kamasu'i fo ta nasoda roo-tetu', muste besa-besa
5
1-6 Lahenda kamasu'i emin! Nenene matalolole! Emi ta bae kadi soa-neu' lahenda fo roi-tao sota raan seli' rai oka-tine mara. Mamanene neu' lahenda mana sota' sira haraoe naloo-nakou nara. Manetualain Marela-masa'a a namanene sira haraoe naloo-nakou nara.aEmi boe huku ma maisa lahenda malole fo ta bisa rasala'e rala ao nara rai emi mata mara. Emi nonoi-tataom nai dae-bafo' ia, tao malole noi neu' emi ao-ina heheli mara, ma masoda nai hihi'a-setelee' a. Besa' ia emi sama leo' sapi mapeta' a saka' hala ni.
Lahenda kamasu'i emin! Mulai dola leo! Huu fo neu' ko, emi hapu doidoso. Emi hata-heto mara saka' rasosopu'. Ma emi kakao-papake malole mara, andae ra raa heni si. Emi lilopila-lilofula mara ta rabeli so'. Neu' ko lilopila-lilofula' sira, raa selu' emi, sama leo' ai-pila' a naa heni ai tuu' a. Ubea' taon de dae-bafo' a saka' noe, tehuu emi bei masapute mabubua hata-heto manasapu-manalalo' sira bali? Emi hata-heto mara neu' ko dadi buti rae, emi ta bubulu' hata bea ri' nabeli nai Manetualain matan!b
Sabar nai susa-lela
7 Toranoo kara emin! Emi muste sabar mahani Ramatua' a natafali mai Na. Mete masudi lahenda maue-maosa a. Ana sabar nahani oe-daen buna-boa nara. Uda masososa' a mai, boe ma ana sele-tande. Basa de ana nahani uda oe' selu' bali, ela parusa nara ralole. Mate'e na rabuna-raboa. Naraa no ledo-fai na, boe ma ana neu etu-oru parusa nara buna-boan. 8 Emi boe muste sabar leo naa'. Tao matetea dale mara, huu fo ta doo' a so' te Ramatua' a mai!
9 Toranoo kara emin! Boso' esa namuu-nadau esa. Kalu mamuu-madau maroo, sona neu' ko Manetualain naetu' huhuku neu' o! Mafarene' Mana ee dedea' manai lai a mamai Na nanenea' so.
10 Toranoo kara emin! Tuka conto neme Ramatua' a mana nesi mata Nara. Leo mae ara hapu susa-lela rupa' boe, tehuu nanenete raroo. 11 Kalu hapu lahenda nanenete nai susa-lela, ita so'u-fua lahenda ria nade na. Conto leo' ba'i Ayub. Ana hapu susa-lela rupa', tehuu ana nanenete. Mate'e na, Manetualain kasian neu' Ayub, de bati-pala feen ua-nale', huu fo Ria henu' no susue-lalai'.c
La'e-neu' sosoo-susupa'
12 Toranoo kara emin! Boso' soo-supa pake lalai, dae-ina' a ma sudi hata ubea'. Kalu “ia”, sona mataa mae “ia” Kalu “ta'a”, sona mataa mae “ta'a”. Leo' naa boe dai so! Boso' losa Manetualain huku o nana huu o sosoo-susupa ma.d
Huhule-haradoi' fo ri' neni ua-nale'
13 Kalu nai emi talada lahenda esa hapu susa-lela, sona malole lena' ana hule-haradoi. Ma kalu lahenda esa namaho'o-natadale, sona malole lena' ana soda io-oa Ramatua' a. 14 Kalu nai emi talada lahenda esa namahedi, sona malole lena' ana nafada mauli-malaka jama'at ara hule-haradoi feen pake Ramatua' a nade Na ma rahutun mina, ela te'e na aon.e 15 Ma kalu emi hule-haradoi fee lahenda kamahedis ria, tebe-tebe no dale kamahere', neu' ko Ramatua' a puli naan. Kalu lahenda ria tao sala', sona neu' ko Ramatua' a sae-safe heni ria sala-siko nara. 16 Kalu emi ruma tao sala', sona manaku sala-siko mara esa no esa. No ria naa emi esa hule-haradoi fee esa, ela te'e ma ao mara.
Lahenda fo dale na malalao-malalafu', huhule-haradoin henu' no kuasa. 17 Hai conto neme ba'i Elia. Ria lahenda dae-bafo' biasa sama leo' ita boe. Tehuu tepo' fo ana hule-haradoi, hule ela boso' boe uda bali, boe ma uda a hai tuti' a, de ta uda fa losa' teu' telu seseri'.f 18 Basa de ana hule-haradoi selu' ela uda, boe ma uda a mai tuti' a. Nau-aidoo ra modo-modo ma oka-tine kalua buna-boa'.g
19 Toranoo kara emin! Kalu nai emi talada esa tao sala', de heo' neme roo-tetu' a mai, boe ma esa tulu-fali ni fo natafali leo Ramatua' a eno roo-tetu Na, sona malole a. 20 Mafarene matalolole ia! Kalu emi tulu-fali lahenda fo tao sala', losa' ana natafali selu' leo Ramatua' a neu ma ana ta tao sala' so', sona emi soi eno' ela Manetualain po'i-tata na emi meme naraka a mai. No ria naa, Manetualain sae-safe heni sala-siko kadodou nara.h
Noi ri naa' so!
Neme au,
Yakobis