Boso' tuka dae-bafo' a hihii-nanaun
4
Nai emi talada esa no esa mareresi', mahuu-malena nana huu ubea'? Tute na huu emi saka namaho'o soa noi ao-paa heheli mara. 2 Emi mahii' hapu hata esa, tehuu ta hapu ni. Boe ma ete ao' a dadi, mahuu-malena losa' emi maisa lahenda.Huu no emi ta hule-haradoi neu' Manetualain, de emi ta hapu. 3 Tehuu leo mae emi hule-haradoi boe, emi ta hapu nana huu emi huhule-haradoim sala, huu fo emi hule soa noi hihii-nanau mesa mara.
4 Mema' emi lahenda fo ta dite-tama mahere neu' Manetualain! Emi sama leo' saoina-saotou' fo ri' esa ta dite-tama esa, losa' ara hohoke. Kalu emi lili-ne'a noi dae-bafo' a hihii-nanaun, emi tao ao mara dadi musu-noo' mo Manetualain. 5 Huu ria naa, mana dui' nai Manetualain Susura Makamoi Na nae, “Manetualain natuu-natende' Dula-dale' Na nai ita dalen. Ma Dula-dale' a nahii' ita dite-tama to Ni huu fo Ana namanasa'.” 6 Lena neme na' mai Manetualain naonda fee Dula-dale Na fo natetea ita ela taseki hihii-nanau' dae-bafo' a. Susura Makamoi' a nae:
“Manetualain soa' lahenda mana koao' ara,
tehuu natudu dale malole Na neu' lahenda maloe-madae ao' ara.”a
7 Manetualain nana ita Ramatuan fo ri' nanuu haak pareta ita. De maloe-madae ao mara neu' Ana, tuka Ria hihii-nanaun. Boso' tuka nitu ra malaka na hihii-nanaun, tehuu soa' maroon, losa' ana nalai ela emi. 8-9 Masoda dale' esa mo Manetualain. No ria naa, Ana nanenea' no emi boe.
Emi fo ri' masoda no makekeo-makakanu'! Emi muste tao matalolole masoda mara. Ma emi fo ri' madale kadua'! Emi muste la'o roos tuka Manetualain, boso' heo ii-ona'. Doo-naru basa ia emi masoda noi namaho'o-natadale' ma hihi'a-setelee' a. De besa' ia edi' ai mara leo! Malole lena' emi saledale-tu'etei mara ma dola. Huu fo emi bubulu' emi madale kadua ma emi sala mara. 10 Kalu tebe-tebe emi maloe-madae ao mara nai Manetualain mata Na, neu' ko Ana so'u nadedema emi.
Boso' dedea mamumulu lahenda
11 Toranoo kara emin! Boso' dedea mamumulu emi esa no esa. Huu fo kalu emi dedea leo naa', ma emi sale lahenda ra, emi malena-laka neu' Manetualain atoran Na nae, “O muste sue-lai toranoo ma, sama leo' o sue-lai ao-ina heheli ma.” Ma kalu emi ta tao tuka atoran a, sona emi madedema ao mara, lena Manetualain Atoran ara. 12 Manetualain ri' tao Atoran sira. Noi Ria ri' nanuu haak naetu' ita dedea nara. Noi Ria ri' nanuu haak fee ita soda' mana basa taa'. Emi ta manuu haak sale nonoo lahenda.
Boso' dedea koao'
13 Emi muste bubulu' ela boso' dedea mae, “Fai ia do balahaa' ami saka' leo kota ele meu! Ami nau leo nai naa teu' esa. Ma ami nau papalele ela onto bai' dei!” 14 O bubulu' mana dadi ubea' nai balahaa'? Ta hapu lahenda esa bubulu' masoda' a hihii-nanaun. Lahenda dae-bafo' a soda na sama leo' masu', de nananita' noi hatemata' basa te mopo' ana.b 15 Malole lena' emi mafada mae, “Kalu Ramatua' a sue, sona ela ita tasoda. Ma kalu Ramatua' a nau, ela ita bisa tao leo ia'.” 16 Huu fo kalu ta dedea leo naa', emi noi dedea koao'. Emi sala so, ria sama leo' emi mafarene heni Ramatua' a nai emi dudu'a-aafi mara.
17 Mafarene matalolole! Lahenda fo bubulu' hata roo-tetu' a, tehuu ta tao tuka ni, sona ana tao sala' ria so.