Manea matalolole maa ma
3
Toranoo kara emin! Hapu lahenda dodou' nau ranori-rafada lahenda kamahere' ara. Ria malole a boe! Tehuu mafarerene', huu fo neu' ko Manetualain parisa lutu' lahenda fo nanori-nafada lahenda kamahere' ara. De ta bole sudi bea oo nanori-nafada. 2 Ita basa dedea tasala' nai hihii-nanau' rupa'. Tehuu lahenda bea nanea nala maa na, de ta dedea nasala', sona ria nauli nala masoda na katema'. 3 Hai conto neme dara. Dara kaba'u-ina a, ita hela noi tali rapa a boe, bisa tauli talan. 4 Conto feke' neme ofa'. Ani a nasa', de ofa' a naero'. Tehuu jurumudi a nauli nala ofa' kaba'u-ina ria tuka hihii na neni' noi uli aana' a. 5 Leo mae ita maa na aana' a, tehuu nonoi-tataon bau na seli!a
Ria sama leo' ai-pila buna ana' esa boe, bisa naa heni nura a katema'. 6 Ita maa na boe sama leo' ai-pila'. Ita pake ita maa na fo tao talutu hihii-nanau' dodou', ma ana bisa tao nalutu ita masoda na katema'. Hihii-nanau' tadalu' dodou' nai dae-bafo' ia kalua reme lahenda maa na. Ma nitu ra malaka na boe, pake lahenda maa na fo nalala'o ria nonoi-tataon.
7 Lahenda parnaa ralilili' rala banda fui rupa': banda manalodo-manarae', manupui' ma ika' fo rai tasi' dale'. 8 Tehuu bei ta hapu lahenda esa parnaa nalilili' nala maa na boe'. Huu fo maa' a nana hata tadalu' esa rian, de ator doa' ana. Ria sama leo' raso, de bisa namate lahenda.
9-10 No maa' a lahenda io-oa ma do'i-ali. Ita pake maa' ia ela io-oa neu' Ama' Manetualain. Ma no maa' a ita do'i-ali lahenda, fo ri' Manetualain adu na si tuka Ria mata-idun. Ubea' taon de bisa leo naa'?b
11 Conto leo' oe mata'. Ta hapu oe mamis ma oe masi' bubu reme oe mata' esa mai. 12 Conto feke' bali: ai ka' ta bisa naboa pao boa', do anggor ta bisa naboa ai ka' boa', hete? Huu fo ai huu' ara raboa tuka sira rupa na.c Ita ta bisa aso oe mamis neme kolam fo oe na masi' a.
Dudu'a-aafi naru' neme Manetualain
13 Lahenda dudu'a-aafi naru' ma nalela hihii-nanau' ara, boso' nadedema aon, huu fo ana bubulu' malelan ria neme Manetualain. De ela ria natudu malela na neni' ana nasoda roo-tetu'. 14-15 Tehuu kalu emi manuu dale ete ao' ma matetu noi hihii-nanau' mesa mara, sona boso' koao mae emi lahenda malela', huu fo ria sama leo' emi mapuputa'. Hada-parii leo naa' a ta neme Manetualain. Tehuu hada-parii ria neme dae-bafo' a, neme lahenda hihii-nanaun ma neme nitu ra mai. 16 Huu fo kalu hapu ete ao', ma nafaduli noi ao-ina hehelin, tantu hapu nahuu-nalena' ma lahenda tao tadalu rupa'.
17 Tehuu dudu'a-aafi naru' fo ri' onda neme Manetualain mai, leo ia': masososa na, tao na ita tasoda malalao-malalafu'. Mole-dame, naloe-nadae ao', dale nanenete' ma balaroe-balanau'. Buna-boa' neme dale malole ri': tulu-fali lahenda, ta mete mata' ma ta masarole-masarali'. 18 Lahenda fo natudu eno mole-dame sama leo' lahenda sele-kari bini-kee, de neu' ko ana hapu buna-boa malole.