Susura' fee lahenda
Ibrani
fo besa' ko ramahere Yesus Kristus
ma foa ela sira bei-ba'i nara agama na
Manetualain nadenu Ana Na marela-masa'a lena neme mana nesi mata fai ulu nara
1
Fai a ulu na, Manetualain pake Ria mana nesi mata nara, dedea ro ita bei-ba'in lahenda Ibrani ra.a Ana pake eno rupa' ara, fo dedea lai dodou' no si.b 2 Tehuu besa' ia, Ria fee Ana Na mai dedea mata' no ita.Neme masososa na Manetualain teka-here Ana Na,
fo pareta sama-sama no Ni.
Tepo' fo Ana adu lalai no dae-ina' a ro basa oe-isi nara,
Ria Ana Na boe adu sama-sama no Ni.
3 Manetualain Ana Na natudu Ria Papa Na marela-masa'an,
sama leo' ledo a haa na buka' neme tiro-ao a mai.
Huu fo Ria rupa-lolen sama leo' Papa Na.
Ma neme Ria Hara-dasi marela-masa'a Na,
Ana naboi-nasamao basa-basan fo rai lalai no dae-ina' a.
Ana soi eno',
fo sae-safe lahenda sala-sikon,
ela ara dadi malalao-malalafu'.
Basa boe ma Ana fali leo nusatetu-ikutema' a neu,
de natuu' nai Manetualain boboa ona Na,
nai mamana hada-horomata naan seli.
Manetualain Ana Na marela-masa'a, lena eila'o-limalope nara
4 Manetualain eila'o-limalopen tebe marela-masa'a. Tehuu Ria Ana Na marela-masa'a, lena neme sira basa. Manetualain pangkat na, nai lain naan seli. Ma Ana fee pangkat na neu' Ana Na. Huu ria naa, Ana Na, lena neme Ria eila'o-limalope nara.
5 Manetualain parnaa dedea neu' Ana Na nae,
“Fai' ia, Au so'u O homu pareta.”c
Manetualain boe nafada nae,
“Au nana, Ria Aman.
Ma Ria nana, Au Ana Ki.”d
Manetualain dedea mema' nae leo' naa la'e-neu' Ria Ana Na, tehuu Ana ta parnaa dedea leo naa' la'e-neu' Ria eila'o-limalopen.
6 Tepo' fo Manetualain nadenu Ana marela-masa'a Na mai, Ria boe pareta eila'o-limalopen nae,
“Eila'o-limalope emin!
Emi muste fee hada-horomata,
ma do'o-tabe Au Ana Ka!”e
7 Manetualain boe dedea la'e-neu' Ria eila'o-limalopen nae,
“Au tao eila'o-limalope Kara,
dadi sama leo' ani.
Au tao ata Kara,
dadi sama leo' ai-pila'.”f
Manetualain dedea nae leo' naa, huu fo sira nana noi Ria atan.
8 Tehuu Ana dedea feke' la'e-neu' Ana boki Na nae,
“O nana, Manetualain.
Neu' ko O matuu' nai kadera pareta a, losa doo na neu.
Neu' ko O homu kuasa fo pareta no dale roo-tetu'.
9 O dale Ma namaho'o mita lahenda fo ri' nasoda roo-tetu'.
Tehuu O dale Ma susa, mita lahenda fo ri' nasoda napuputa'.
O dale Ma namaho'o,
Huu fo Au po'a mina neu' O laka Ma,
fo so'u O dadi Mane' lena neme feke' ara mai.”g
10 Manetualain boe dedea neu' Ana Na nae,
“Ana Ki, on!
O nana, Ramatua' fo ri' pareta mema' neme ulu' mai.
O ri' madenu fo lalai dadi mema'.
O ri' pareta fo dae-ina' a dadi mema'.
11-12 Neu' ko lalai no dae-ina' a noe heni si.
Neu' ko lalai no dae-ina' a sapu-lalo.
Tehuu O masoda maroo.
Neu' ko O tu'u heni lalai no dae-ina' a,
sama leo' lahenda tu'u heni kakao-papake sai' ara.
Neu' ko O kati lalai no dae-ina' a,
sama leo' lahenda kati kakao-papake bebeu'.
Tehuu O ta leo naa'.
Nana huu O masoda losa doo na neu.”h
13 Manetualain boe dedea neu' Ana Na nae,
“Ana Ki, on!
Mai matuu' nai ia, nai mamana marela-masa'a,
nai Au boboa ona Ka.
Neu' ko Au tao a O musu-noo mara,
roi rae' O.”i
Manetualain dedea mema' leo' naa la'e-neu' Ana Na, tehuu Ana ta parnaa dedea leo naa' la'e-neu' eila'o-limalope nara. 14 Ria eila'o-limalope nara tebe penting. Huu fo Ana nadenu si, fo reu urus basa Ria lahendan fo ri' Ana po'i-tata na si reme sala-siko nara. Leo mae leo' naa, tehuu Manetualain Ana Na bei lena neme sira basa.