Boso' mete mata' mae, lahenda bau-ina' do aana'
2
Toranoo kara emin! Emi mae mamahere Yesus Kristus ita Ramatua marela-masa'a Na, tehuu tao leo' bea de emi mete mata'? Boso' tao leo naa'! 2 Uni' ko leo lahenda dua maso' leo emi uma mamasom dale' reu. Esa kao-pake makadila', ma pake rereli lilo pilas henu lima u'u nara. Ma esa bali ana pake badu makekeo'. 3 Boe ma emi hada' lahenda fo pake makadila', de fee ni mamana natuu' malole nai mata. Tehuu mana pake badu makekeo' a, sona emi madenun mae, “Mapadei' muu' dea' ele! Ta'a sona, matuu' muu' dae'!” 4 Emi mete mata' leo naa', emi sama leo' mana ee dedea' fo ri' ta tuka roos na. Dudu'a-aafi tadalu' a ri' nauli tao emi leo' naa.5 Toranoo susue kara emin! Nenene! Manetualain teka-here lahenda hata taa' ara nai dae-bafo' ia, ela ara ramahere tebe-tebe neu' Ana, sama leo' ara ramasu'i nai dale nara. Ma Ana teka-here si boe, ela ara hapu babati' nai Manetualain paretan, fo ri' Ana helu soa-neu' lahenda fo sue-lai Ni. 6 Tehuu no emi mete mata' leo naa', emi madadae lahenda hata taa' ara. Sekonaa te ara ta tao tadalu' hata-hata esa neu' emi boe'. Emi mafarene heni lahenda kamasu'i ara ramolo-ratabu' emi a, do? Ma sira si' saka buku' fo hela roo emi leo mamana naetu dedea' a meu. Sira hapu ma'ee na, ma emi hapu kasee na. 7 Emi nana Ramatua Yesus lahenda nara. Tehuu lahenda kamasu'i ara oda' dedea ramumulu-ramamae' Ramatua Yesus nade malole Na! Ubea' taon de emi masosoro poo mo si bali?
8 Malole lena' tao tuka Manetualain ita Mane na atoran nae, “O muste sue-lai lahenda feke' ara, sama leo' o sue-lai ao-ina heheli ma.” Atoran ria mana dui' nai Manetualain Susura Makamoi Na dale'.a 9 Tehuu kalu emi mete mata' ma hai dale' noi neu' lahenda kamasu'i ara, sona emi sala ma malena-laka neu' Manetualain atoran Na. 10 Lahenda bea tao tuka Manetualain Atoran ara, tehuu kalu ana nalena-laka noi atoran esa' a boe, sama leo' ana nalena-laka neu' Atoran ara katema'. 11 Manetualain fee atoran nae, “Boso' hohoke.” Ana fee atoran feke' boe nae, “Boso' maisa lahenda.” De kalu emi ta hohoke, tehuu maisa lahenda, ria sama leo' emi malena-laka Manetualain Atoran ara katema'.b
12 De kalu emi nau dedea, do nau tao hihii-nanau' esa, muste mafarene leo ia': neu' ko Manetualain ri' naetu', kalu ita tao tuka Ria atoran na fo sue-lai lahenda, do ta'a. Huu fo atoran ria bisa po'i na ita teme Manetualain huhuku Na. 13 Ana ta nanuu dale kasian neu' lahenda fo ta nanuu dale kasian neu' lahenda feke' ara. Tehuu kalu emi manuu dale kasian neu' lahenda feke ara, sona tantu Manetualain nanuu dale kasian neu' emi boe. Emi boso' bii' sipo' Manetualain huhuku Na, huu fo Ana reke mema' basa sira so.
Kalu ita tamahere tebe-tebe Manetualain, ita muste tao tuka Hara-dasin
14 Toranoo kara emin! Kalu lahenda esa nae namahere Manetualain, tehuu ana ta tao nonoi-tatao malole esa boe', ria namahere na sosoa-raraa taa'. Namahere' rupa leo naa' a, ta po'i-tata na ita teme naraka a mai. 15 Uni' ko leo toranoo' esa to'a-taa naan seli. Ana ta nanuu kakao-papake', do tuka-tuka fai' ta hapu nanaa-nininu'. 16 Kalu emi moi mafada' a mae, “Lao' matalolole! Manetualain fee o ua-nale'! Ela leo' bea na manuu bua-loas. Ela leo' bea na manuu nanaa-nininu'!” Tehuu kalu emi ta tulu-fali ni, sona sosoa-raraa taa'.
17 De namano'u-namadai' a ta noi ri' namahere' a! O mae mamahere, tehuu ta tao tuka namahere' a, sona sosoa-raraa taa'. Huu fo ria sama leo' namahere mates.
18 Lahenda bisa nafada nae, “Lahenda ta tao hihii-nanau' malole boe, sadi namahere Manetualain. Lahenda feke' tao hihii-nanau' malole, ma ta sesei' Manetualain nade Na.” Tehuu matetu na leo ia': Buti neme o namahere ma, nana ri' o tao hihii-nanau' malole ra. Tehuu kalu o ta tao hihii-nanau' malole, sona au ta ita buti neme namahere ma mai. Au bisa atudu namahere ka neme' au tao hihii-nanau' malole ra. 19-20 O tuka nanori-nafada' fo ri' nae, “Manetualain noi esa' a. Ta hapu feke' so'.” Malole a boe! Tehuu nitu ra malole lena o, nana huu sira ramahere leo naa' boe, losa' ara bii ma keke-boi'. De boso' afi mae, “Bubulu' pake dodole ma, boe dai so. Ta'a!”
Pakana', on! Namahere' fo ta nanuu buna-boa' esa boe, sona sosoa-raraa taa'.
21 Hai conto neme ita ba'in Abraham. Tepo' fo ana tao tuka Manetualain pareta Na, de noo anan Isak tao ni neu' mei tutunu-hohotu' lain. Huu ria naa, Manetualain nae, “Abraham tao la'e.”c 22 Abraham namahere Manetualain, losa' ana tao tuka pareta Na. De ita bubulu' ana namahere tebe-tebe neu' Manetualain, nana huu ana tao tuka pareta ria. 23 Basa ia ra dadi sama leo' mana dui' nai Susura Makamoi' dale' nae, “Abraham namahere Manetualain, huu ria naa Manetualain tao ni neu' lahenda dale roo-tetu'.” Ma mana dui' nae, “Abraham nana Manetualain nonoon.”d
24 Tea na leo ia'! Ita bubulu' Manetualain sipo' lahenda fo namahere Manetualain, ma nahii' tao hihii-nanau' malole boe. Noi namahere' a sona bei ta dai.
25 Conto feke' neme mama Rahab. Ria ina' mana hohoke neme tepo-lele ulu'. Tepo' fo lahenda Yeriko ra saka lahenda Israel ara mana lalafa nara fo nau raisa si, Rahab ri' nafuni si. Ma nadenu si ralai kalua tuka eno feke', ela lahenda boso' hopu ra si. Rahab tao la'e de Manetualain tao ni neu' lahenda dale roo-tetu'.e
26 Huu fo sama leo' ao-paa' ta nanuu ani hahae', sona mana mate' ria. Leo' naa boe lahenda nae namahere Manetualain, tehuu ta tao hihii-nanau' malole sona namahere mates ria.