Ita muste tasoda malole esa no esa
13
Toranoo susue kara emin! Au nau afarerene' fee emi hihii-nanau' hida.Boso' mafarene henin sue-lai maroo emi toranoo lahenda kamahere mara.
2 Boso' mafarene henin ela sipo' lahenda fo ri' emi ta malela' asa nai emi umam dale' no dale loa'. Toranoo' hida parnaa sipo' lahenda leo naa', sekonaa te ara ta bubulu' lahenda sira nana Manetualain eila'o-limalopen.a
3 Boso' mafarene henin mafaduli neu' lahenda nai bui a, te hopu ra si nana huu ramahere Kristus. Huu ria naa, emi muste tulu-fali si sama leo' emi boe nana hopu'.
Ma boso' mafarene henin tulu-fali lahenda fo ri' hapu eese-rurumu'. Urus matalolole si sama leo' emi ri' sipo doidoso ria.
4 Sao kabi a nana malalao-malalafu'. Tehuu boso' losa kakabi malalao-malalafu' ria dadi makekeo-makakanu'. Tantu Manetualain huku basa lahenda fo ri' hohoke.
5 Boso' tendetuu doi-tali. Tehuu emi muste masoda meni' hata fo emi manuu a boe dai so. Manetualain dedea nae,
“Au ta bisa afarene heni emi.
Au ta bisa foa ela emi.”b
6 De matetea dale mara sama leo' lahenda parnaa dui' nae,
“Huu fo au Ramatua ka tulu-fali au,
de au ta bii-amata'u.
Ma ta hapu lahenda esa,
tao na au doo' a eme Manetualain mai boe'.”c
Boso' fali meu tuka atoran agama paraa' a, tehuu mamahere maroo Kristus
7 Boso' mafarene heni emi mauli-malakam, fo ri' parnaa ara ranori-rafada Manetualain Hara-dasin soa-neu' emi. Afi matalolole sira eno masoda nara, ma tao tuka sira namahere na. Hata fo ri' ara ramahere ni, ri':
8 Yesus Kristus, ta parnaa nararali.
Neme masososa na, besa' ia ma losa doo na neu,
Ria bei sama nahere.
9 Huu ria naa, emi boso' matukalele neu' nanori-nafada masala'. Manetualain natetea emi dale mara, nana huu Ana natudu emi dale malole Na. Tehuu Ana ta natudu dale malole Na neu' ita, nana huu ita tao tuka atoran nanaa-nininu'. Huu fo atoran leo naa' a sosoa-raraa taa'.
10 Fai a ulu na, nai Manetualain Laa' Huhule-haradoi Na matan, hapu mei tutunu-hohotu' esa ela tunu reni' banda tutunu-hohotu' ara. Malaka agama fo ri' nalalau' nai naa, nanuu haak naa paa lena' neme mei ria mai. Tehuu besa' ia, ita tanuu mei feke'.d Ma malaka agama rupa-lole paraa' a, ta nanuu haak naa-ninu nai naa. 11 Fai a ulu na, tuka-tuka teu' malaka agama madema naan seli, neni banda tutunu-hohotu' a daa na, tao si reu' Manetualain Kama Malalao-malalafun Naan Seli dale'. No ria naa, Manetualain nafarene heni sira sala-siko nara. Boe ma ara reni banda sira, fo tunu si rai koro' a dea'.e 12 Leo' naa boe neu' Yesus. Ria dadi tutunu-hohotu' ela Manetualain bisa sae-safe heni lahenda dae-bafo' sala-sikon. Ma tepo' fo Ana doidoso a, ara hela roo Ni, leo kota Yerusalem dea' neu fo raisa Ni. 13 Huu ria naa, mai ita leo Yesus teu ela tamahere taroo Ni. Leo mae lahenda radadae ita, tehuu ita muste sadia sipo', sama leo' Ria boe. 14 Ita leo lalai nai dae-bafo' ia. Tehuu tamahehena', ita leo losa doo na neu nai kota bebeu' esa nai nusatetu-ikutema'. 15 Huu no Yesus dadi tutunu-hohotu' soa-neu' ita, de ita ta parluu teni fee Manetualain banda tutunu-hohotu' so'. Tehuu tutunu-hohotu feke', fo muste teni taroo fee Manetualain ri' i'io-o'oa ela so'u-fua Ria nade Na. 16 Ma boso' mafarene henin tao hihii-nanau' malole soa-neu' lahenda feke'. Kalu ara parluu hata ubea', sona tulu-fali si. Huu fo basa hihii-nanau' sira dadi sama leo' tutunu-hohotu' fo ri' tao namaho'o Manetualain.
17 Emi muste mamania-mamanene neu' basa lahenda fo ri' rauli-ralaka emi. Sira ranea emi sumane mara hatu-leledon. Neu' ko ara muste rataa ao nara sira nonoi-tataon nai Manetualain matan. De mamania-mamanene matalolole si, ela ara bisa tui no dale namaho'o. Boso' losa ara tui no dale hedi', nana huu emi foa ela Yesus Kristus eno masoda Na. No ria naa, emi ta onto.
Mana dui' susura' ia, hule makasi ma hule-haradoi fee lahenda Ibrani ra
18 Hule-haradoi maroo fee ami. Ami dale mara tebe roo-tetu', ma ami tao maroo hihii-nanau' malole. 19 Lena-lena' bali, hule-haradoi fo au bisa lai-lai fali leo emi uu.
20-21 Manetualain tao na ita dale na tama. Au hule Ni tulu-fali emi, ela emi bisa tao tuka Ria hihii-nanaun katema'. Au hule fo Ana tulu-fali ita basa, ela dadi teu' lahenda fo tao tamaho'o Ria dale Na. Manetualain pake Yesus Kristus daa Na, ela tao hehelu-barataa' bebeu' no ita. Hehelu-barataa' ria la'o naroo losa doo na neu. Boe ma Manetualain fee ita Ramatuan Yesus Kristus nasoda selu'. Besa' ia, Yesus naboi-nasamao ita sama leo' mana foo kahere' naan seli. Huu ria naa ita tadedema Ria nade Na ma io-oa taroo Ni! Tebe ria.
Soda-mole'
22 Toranoo susue kara emin! Au hule emi sipo' no malole ma dale loa' au lelea-nonore ki ia. Susura' ia, lii na eetu'. 23 Tutui' fo au nau emi basa bubulu'. Ri': ita toranoon Timotius kalua neme bui a mai so. Kalu ana lai-lai leo au mai, neu' ko ami dua sama-sama meu dama emi.
24 Au haitua haraoe soda-mole' fee emi mauli-malaka mara, ma haraoe soda-mole' fee emi basa fo ri' mamahere Yesus Kristus. Toranoo' reme propensi Italia ara haitua haraoe soda-mole' boe.
25 Au hule fo Manetualain natudu dale malole Na neu' emi basa.
Noi ri naa' so!