12
De ita fo ri' besa' ia tasoda, leo' bea? Ita sama leo' lahenda fo tuka napo'i lalai' a. Fai a ulu na ita bei-ba'in fo ramahere Manetualain, sira sama leo' manilu ra rapadei eo, fo rafofoa ita ao maseen. Tehuu kalu ita bei mana heke' to sala-siko' a, ria tao na ita ta talai tala. Huu ria naa, ita muste tu'u-tapa heni sala-siko' sira katema', ela ita bisa talai ina'. Manetualain teka-here ita ela tuka napo'i lalai' a, de ita muste tanenete talai taroo losa too a. 2 Ma ita muste talai sona boso' memete ii-ona', tehuu mete tasuu tino' Yesus. Ria ri' soi eno', de ita bisa tamahere Manetualain. Ma Ana tulu-fali ita ela bisa tamahere taroo losa' babasa na. Mafarene do, ta'a? Tepo' fo Yesus doidoso nai ai kake a, lahenda ramumulu-ramamae' Ana, tehuu nanenete naroo. Ana bubulu', kalu basa Ria doidoso Na, sona neu' ko Ana namaho'o. Tebe ria. Ana mate, boe ma Manetualain nahene-naae' Ana, fo natuu' neu' Manetualain boboa ona Na, ela dua si pareta bela' a. 3 Leo mae lahenda tao tadadalu Ni, tehuu Ana nanenete naroo. De emi boso' mafarene heni Yesus doidoson ia, ela emi boe bisa manenete maroo ma boso' hahae.Manetualain nau nasa'ai ma nanori-nafada ita, sama leo' ama' esa nanori-nafada ana na
4 Emi soa' hihii-nanau' tadalu' ara, tehuu emi bei ta tebe-tebe soa' asa, losa emi daa ma faa. Tebe, hete? 5 Bate emi mafarene heni Manetualain Hara-dasin, fo ri' Ana nafadan neu' emi, sama leo' ama' esa dedea no ana na nae,
“Ana ki on!
Kalu ita Ramatua na fee huhuku' fo nanori-nafada o, ela masoda tuka eno matetu' a,
sona o muste tao dale' neu!
Ma kalu Ana nasa'ai fo nanori-nafada o,
sona o dale ma boso' nasala'.
6 Ita Ramatua na nasa'ai ma nanori-nafada lahenda fo ri' Ana sue-lai.
Mema' basa lahenda fo ri' Ana sipo' na si dadi Ria anan,
Tantu Ana nasa'ai ma nanori-nafada si.”a
7 De kalu Manetualain nasa'ai ma nanori-nafada emi, ela masoda tuka eno roo-tetu', sona manenete. Ana tao leo naa', nana huu emi dadi Ria anan. Ama' ara muste rasa'ai ma ranori-rafada ana nara, losa' ana' sira rasoda tuka eno roo-tetu'. 8 Kalu Manetualain ta nasa'ai ma nanori-nafada emi sama leo' Ria ana feke nara, sona sosoa na nae, Ria anan ta emi.
9 Ita biasa fee hada-horomata neu' ita papa boki na nai dae-bafo' ia, nana huu tepo' fo ita bei aana', ana nasa'ai ma nanori-nafada ita. Ria nana la'e. Tehuu lena-lena' bali, ita muste tamania-tamanene neu' Manetualain, huu fo Ria nana ita Aman nai nusatetu-ikutema' a, ma Ana nau nasa'ai ma nanori-nafada ita, ela tasoda tuka Ria eno roo-tetu Na. 10 Ita papa boki na nasa'ai ma nanori-nafada ita noi hatemata', tuka hata fo ana nae malole a. Tehuu Manetualain bubulu' hata fo ita parluu tanorin. Huu ria naa, Ana nasa'ai ma nanori-nafada ita ela tasoda lalao-lalafu' sama leo' Ria. 11 Kalu hapu nasa'ai, sona tebe ita dale na hedis. Tehuu doo-doo boe ma ita dale na tama, nana huu ita tasoda tuka Manetualain hihii-nanaun.
12-13 Toranoo kara emin! Tao bara'aai emi limam fo ri' sota', ma makakafa emi eim fo ri' nambera. Boso' malai maputa', tehuu malai roos a maroo, ela sira fo ta bisa-bisa boe, ao nara rasee fo bisa ralai raroo. Emi muste tao matetea dale mara, ela manenete maroo ma mamahere Kristus.b
Boso' tipa-tola' Manetualain dale malole Na neu' emi a
14 Toranoo' fo mamahere Kristus! Emi muste saka tao eno na leo bea ela masoda mole-dame esa no esa. Ma saka maroo eno na, ela masoda lalao-lalafu'. Huu fo lahenda bea ta lalao-lalafu', ta bisa nita Manetualain.
15 Matetea esa no esa dalen, ela boso' neme emi ruma mai heo heni ao mara, losa' ta rameda rita Manetualain dale malole Na. Manea matalolole fo boso' mataa' esa nahehedi' esa dalen nai emi talada. Huu fo ria sama leo' raso mali', de tao nalutu lahenda dodou'.c 16 Besa-besa ma manea fo boso' losa ruma hohoke. Besa-besa ma manea fo boso' losa ruma ta tao dale' neu' Manetualain, sama leo' Esau. Esau nana, ba'i Isak ana ulu na. Fai' esa de, Esau fali neni laas na. Ana hule nanaa' bika' esa neme fadin Yakob ma baen pake ria haak ulu bau-ina na.d 17 Tehuu ta doo bea boe' te, ita bubulu' Esau nasaledale. Fai fo aman Isak nau hule Manetualain fee ua-nale' neu' ana ulu na, Isak ta bisa hule so', nana huu Esau fee heni hihii' haak na. Huu ria naa, leo mae ana dola boe, ana ta bisa hapu fali' hata fo ri' maulu na ana tu'u heni ni.e
18 Leo ia', toranoo kara! Ita bisa leo Manetualain mata Na teu, ela tuka eno bebeu' fo ri' Ana soi feen neu' ita. Tehuu fai a ulu na ita bei-ba'i nara bei ta bisa leo naa'. Tepo' fo Manetualain tao hehelu-barataa' no si, ara ranenea' lete' esa, nade Sinai. Nai lete' ria lain ai-pila' a pila. Ani ina' a boe. Ma lete' ria boe ma'iu ina' a napoti naan, losa' tao na si bii raan seli. 19 Ara ramanene saki a lii na, boe ma Manetualain haraoe kahere Na kalua neme lete' ria mai. Ramanene Manetualain dedea Na, boe ma ara boe-boe bii, losa' hule Musa rae, “Adoo! Ami ta bisa manenete mamanene haraoe' ia!”f 20 Tebe sira ta ranenete, nana huu hata fo ri' Manetualain pareta, bera na seli. Ana nafada nae, “Ta bole hapu esa molo ei na mai' lete' ia! Leo mae lahenda dae-bafo', do banda! Bea ri' molo ei na mai' lete' ia, muste pia ni neni' batu losa' mate.”g 21 Hata fo ara ritan nai lete' ria, tebe ao nara maninis a. Losa' ba'i Musa boe dere sa'u-sa'u.h
22 Tehuu besa' ia eno' leo Manetualain neu a mana soi' so, ma ita bisa dedea mata' to Ni. Besa' ia ita leo lete' esa teu, nade Sion. Ma kota Yerusalem nai naa. Ta kota Yerusalem nai dae-ina' a, tehuu kota Yerusalem bebeu' nai nusatetu-ikutema' a, ri' Manetualain mamana leleo Na. Nai naa Manetualain eila'o-limalopen dodou' losa kefu-kafun, ara tao feta rame laesa'. 23 Kota ria boe, dadi mamana nabua' soa-neu' basa lahenda fo ri' ramahere Kristus. Manetualain tao susura dudui nade' nai nusatetu-ikutema' a, de dui' sira basa esa-esa nade nara rai susura' ria. Nai naa boe Manetualain parisa' ma uku-sudi basa lahenda ra masoda na. Ma lahenda fo ri' fai a ulu na Manetualain sipo' asa no malole, nana huu ara ramahere Ni, basa si tesa rai naa boe. 24 Ma nai naa boe Yesus dadi lelete soa-neu' Manetualain no lahenda dae-bafo' a. Yesus mate daa Na faa, ela Manetualain bisa tao hehelu-barataa bebeu' no ita. Huu ria naa, Yesus daa Na tao masufu Manetualain dale Na. Tehuu ia feke' neme Habel daa na nai Tutui Masososa'. Tepo' fo Kaen naisa Habel, Habel daa na faa, tao na Manetualain dale Na hanas a, losa' Ana huku Kaen.i
25 Pasa' matalolole ridoo mara, ela nenene hata fo ri' Manetualain nafadan neu' emi. Boso' tao sama leo' ita bei-ba'i nara, fo tipa-tola' ba'i Musa dedea na, tepo' fo ana dadi Manetualain mana nesi matan nai dae-bafo' ia. Boe ma Manetualain huku si. Neu' ita sona leo bea' bali! Kalu ita ta nau tamanene Ni dedea neme nusatetu-ikutema' a mai, tantu Ana fee ita huhuku mabera ina!j 26 Tepo' fo ita bei-ba'i nara rapadei' rai lete Sinai, Manetualain haraoen fo ri' kahere', tao na dae a natakeko. Besa' ia Ana helu nae,
“Neu' ko Au tao a dae a natakeko selu' lai' esa,
tehuu ta noi dae a natakeko,
te lalai boe natakeko.”k
27 Tepo' fo Manetualain dedea nae, Ana nau tao na basa-basan ratakeko “lai' esa bali”, ria sosoa na nae, Manetualain fafae' basa-basan fo Ana adu na si rai lalai ma dae-ina' a, losa' basa hihii-nanau' fo ta bisa ranenete, sona mopo si. Tehuu hihii-nanau' bea bisa nanenete, sona ana ta sapu-lalo.
28 Manetualain hohomu pareta Na nai nusatetu-ikutema' a ta bisa natakeko. Tetu-tema'. Nana huu Ana nau sipo na emi, ela dadi meu' Ria lahendan, sona mai fo ita hule makasi neu' Ana, do'o-taben ma tadedema Ni, nana huu Ria kahere Na! 29 Tehuu ita boe muste besa-besa, nana huu Manetualain nasa-bolii Na, sama leo' ai-pila' a naa heni laesa' basa-basan.l