3 Dae-ina' a no lalai fo ri' tita si besa' ia, ita tamahere tae, Manetualain ri' adu basa ia ra. Tehuu Ana ta adu pake hata fo dadi mema', de lahenda dae-bafo' a bisa ritan. Basa-basan fo ri' ita tita si, dadi nana huu pake noi Ria Hara-dasin.^a

4 Habel namahere Manetualain. Huu ria naa, ana neni neneni-fefee' malole lena a'an Kaen. Manetualain sipo' Habel ma neneni-fefeen no malole, nana huu ria dale na roo-tetu'. De leo mae mate ni doo' a so, tehuu ita bei bisa tanori neme' ana mai, nana huu ria namahere na.^b

5 Henok namahere Manetualain. Huu ria naa, Manetualain nahene-naae' ana leo nusatetu-ikutema' a neu, ela boso' mate ni. Lahenda rasaka' ana, tehuu ta raneta ro ni, nana huu Manetualain nahene-naae' ana so. Manetualain sipo' ana no malole, huu fo Manetualain nae, “Henok nana lahenda fo tao na Au dale Ka namaho'o.”^c

6 De leo ia', toranoo kara! Tea na, nana Manetualain ta sipo' lahenda fo ta namahere Ni. Lahenda fo nau leo Manetualain neu, ana muste namahere nae, mema' Manetualain nana masoda'. Ma ana muste namahere nae, Manetualain nau tulu-fali lahenda fo ri' saka Ni.

7 Noh namahere Manetualain. Huu ria naa, Noh namahere Manetualain tepo' fo Ana nafada mema' nae, “Noh! Mafarerene'! Neu' ko Au tao alulutu' dae-bafo' ia pake faa ina' fo ri' lahenda dae-bafo' bei ta parnaa rita.” Leo mae Noh boe bei ta parnaa nita rupa leo naa' a, ana namania-namanene neu' Manetualain, ma tao ofa' ela uma isi nara hapu popo'i-tatata'. Huu no ria namahere na, de Manetualain tao ni neu' lahenda dale roo-tetu'. Tehuu basa lahenda fo ta ramahere, Manetualain fee si huhuku mabera.^d

8 Ba'i Abraham namahere Manetualain. Huu ria naa, Manetualain naloo ni nae, “Abraham! Foa ela o koro-tadum fo leo mamana' esa muu, neu' ko Au atudun neu' o. Neu' ko dae ria dadi neu' o tititi-nonosi mara posakan.” Namanene leo' naa, boe ma ana tao tuka Manetualain hihii-nanaun, leo mae ana ta bubulu' nae leo bea' neu.^e 9 Fai fo ana losa nai dae ria, boe ma nafoa laa', de ana leo sama leo' lahenda mana mai nai dae fo Manetualain helu basa nau fee ni a. Boe ma anan Isak ma upun Yakob boe leo reu' naa, huu fo Manetualain helu basa nau fee dae ria ela dadi sira posakan.^f 10 Ana namahehena' neu' ko leo nai kota esa kahere' naan seli. Kota ria, Manetualain tao gambar na ma nafoan.

11 Sara, ba'i Abraham sao na, namahere Manetualain. Leo mae ana bei ta parnaa boki ma namalasi kokoo, tehuu Manetualain feen boki-lae, de ana bisa dadi lahenda nusa bau-ina' esa bei-ba'in. Ana namahere nae, tantu Manetualain tao tuka hata fo Ana helu a.^g 12 Huu ria naa, leo mae namalasi kokoo boe, ana bei bisa boki na tititi-nonosi' dodou', losa' ta hapu lahenda reke rala si. Huu fo sira dedesi na sama leo' ruu' nai lalai, ma soroae' nai tasi' a suu na.^h

13 Ita bei-ba'in, ba'i Abraham, ba'i Isak ma ba'i Yakob ramahere raroo Manetualain losa' ara mate. Tehuu ara bei ta sipo dae posaka' fo ri' Manetualain helu. Leo mae leo' naa, tehuu ara ramahena raroo no dale namaho'o, nana huu ara mete leo doo' a reu nai mata ele, te rita dae ria. Ara manaku rae, sira nana noi lahenda mana mai, fo leo lalai nai dae-bafo' ia.ⁱ 14 Sekonaa te, tea na nana lahenda fo dedea rupa leo naa', ara rahii' raan seli hapu mamana' esa ela dadi sira dae posakan. 15 Kalu dae posaka' fo ita bei-ba'i nara rahii' raan seli a, ri' ba'i Abraham dae fua-funin, sona tantu hapu lela' dodou' fo fali leo naa' reu. 16 Tehuu dae posaka' fo ara rahii' raan seli a, ri' dae posaka' malole ina' nai nusatetu-ikutema' a. Huu ria naa, Manetualain sipo' asa no malole, de ara dadi Ria lahendan. Huu fo Ana sadia mema' kota esa soa-neu' asa nai nusatetu-ikutema' a.

17-18 Ba'i Abraham namahere tebe-tebe Manetualain, tepo' fo Manetualain nau uji ria namahere na. Huu ria naa, ana tao tuka Manetualain pareta Na, de fee heni anan Isak dadi neu' tutunu-hohotu'.^j Sekonaa te, fai a ulu na Manetualain helu la'e-neu' ana' ria nae, “Neme o anam ia mai, neu' ko o hapu tititi-nonosi' dodou', losa' ara dadi lahenda nusa kahere'.”^k 19 Tehuu ba'i Abraham afi nae, Manetualain nanuu kuasa fee lahenda mana mate' ara rasoda selu'. Huu ria naa, fai fo ana saka' tao Ishak dadi tutunu-hohotu', Manetualain sadia mema' bibi-lopo esa ela dadi tutunu-hohotu' kati Ishak. No ria naa, ria sama leo' ana hapu fali' ana na.

20 Ba'i Isak namahere Manetualain. Huu ria naa, ana hule ela leo' bea na Manetualain fee ua-nale' neu' ria anan Yakob no Esau.^l

21 Ba'i Yakob namahere Manetualain. Huu ria naa, tepo' fo ana saka' mate, ana napadei' ru'u-ru'u ma tele'-tele homu tete'e na, fo do'o-tabe Manetualain. Ana hule Manetualain fee ua-nale' neu' upun fo ri' reme anan Yusuf.^m

22 Ba'i Yusuf namahere Manetualain. Fai fo ana saka' mate, namahere nae, neu' ko Manetualain napipipi-nalala'o noo Ria lahenda Israel nara kalua reme dae Masir. Huu ria naa, ana helu si fo kalu fai bea ma ara la'o ela dae Masir, sona ara muste reni ria dui-aalun.ⁿ

23 Ba'i Musa ina-ama nara ramahere Manetualain. De ara ta bii mane' nusa Masir, leo mae ana pareta ria lahenda nara nae, “Lahenda Ibrani ra boki ana tou' sona maisa mema' asa!” Huu ria naa, fai fo Musa mama na bokin boe ma ara rafunin losa bula' telu, nana huu ara rita ao na tibu'-tibu.^o

24 Tepo' fo ba'i Musa nambau-ina, ana namahere Manetualain. Fai a ulu na mane' Masir ana feto na so'u naan dadi ria anan. Leo mae leo' naa, tehuu ana ta nau lahenda tao ria neu' mane' Masir kileo-bobokin.^p 25 Ana afi nae, malole lena' nasoda nai susa sama-sama no Manetualain lahenda nara, lena neme nasoda no namaho'o nai hihii-nanau' tadalu' fo noi hatemata'. 26 Ana nataa' lahenda radadae ni, nana huu namahena neu' Kristus, Lahenda fo ri' Manetualain helu nau fee Ni mai. Ana nanenete leo' naa, nana huu ana bubulu' nae neu' ko Manetualain sadia na hata malole fee ni lena neme basa hata-heto nai dae Masir.

27 Ba'i Musa namahere Manetualain, tepo' fo ana hule lela' neu' mane' Masir, fo noo ita bei-ba'i nara kalua reme ria dae na mai. Leo mae mane' a namanasa naan seli, tehuu ba'i Musa ta bii ni. Leo mae Manetualain ta nananita', tehuu ba'i Musa namahere naroo Ni sama leo' ana nita mata' Ana.^q

28 Ba'i Musa namahere Manetualain, tepo' fo ara rahehere ao nara saka' la'o ela dae Masir. Ana tao tuka Manetualain pareta Na, ma nadenu ita bei-ba'i nara tao Paska masososa', ma pau bibi-lopo dadi banda tutunu-hohotu'. Boe ma hai ra bibi-lopo ria daa na tao tanda neu' uma nara. Hatun ria, Manetualain eila'o-limalopen mai naisa katema' ana ulu' fo rai dae Masir. Tehuu ana ta maso' neu naisa nai ita bei-ba'in uma nara, nana huu ana nita daa ria nai sira uma nara faratanan.^r

29 Tepo' fo ita bei-ba'i nara kalua reme dae Masir, sira ramahere Manetualain. Huu no sira namahere na, boe ma Manetualain tada bati oe nai Tasi Pilas, de ara la'o nai dae tuu' a no soda'. Tehuu soldadu Masir fo ri' usi si, bolo reu' naa de mate basa si.^s

30 Tepo' fo ita bei-ba'i nara maso' dae Kana'an, sira ramahere Manetualain. Ara tuka pareta Na, ma la'o rule-feo kota Yeriko tembok na dea', losa fai' hitu. Boe ma tembok ria hea neu tuti' a.^t

31 De Manetualain tao nalulutu' basa lahenda Yeriko ra, nana huu ara ta nau ramanene Ni. Tehuu Rahab namahere Manetualain, de ana hapu popo'i-tatata'. Fai a ulu na Rahab nana ina mana sosoa nai kota ria. Huu no ana namahere Manetualain, de ana sipo' no malole lahenda Israel ara mana lalafa nara ma nafuni si rai uma na.^u

32 Au bei bisa dedea loa-naru' la'e-neu' lahenda feke' fo ri' ramahere Manetualain. Tehuu au ta hapu ledo-fai fo tui alulutu' la'e-neu' Gideon, Barak, Simson, Yefta, Daud, Samuel ma Manetualain mana nesi mata feke nara.^v 33 Basa si ramahere Manetualain. Huu ria naa, ruma ratati raseki mane' ara. Ruma homu pareta no dale roo-tetu', de rasala'e lahenda fo ta nanuu sala' ma huku lahenda masala' ara. Ruma sipo hata fo ri' Manetualain helu. Ma ruma raseki meoasu.^w 34 Ruma ramate ai-pila' marorope' a. Ruma Manetualain po'i-tata na si reme lahenda fo nau raisas pake tafa'. Ruma bara'ai' ta'a, tehuu Manetualain tao naa si bara'ai'. Ruma Manetualain tao si dadi mana musu kahere', losa' ara raseki soldadu nusa feke' ara.^x 35 Ma ina' ruma boe hapu fali' sira kileo-bobokin fo ri' Manetualain fee si rasoda selu' a.

Tehuu ruma hapu eese-rurumu', nana huu ara ramahere Manetualain. Ara rahii' mate, ela sira boso' hiru rasadea Manetualain. Sira ta etu tututi-nanato nara ro Ni. De ara ramahehena' neu' ko Manetualain so'u na si, ela hapu soda' malole na seli nai nusatetu-ikutema' a.^y 36 Ruma hapu namumulu-namamae', ma lili'u-fefepa'. Feke' ara bali lake ei nara reni ai lake nai bui dale'.^z 37 Ruma mate, nana huu pia si reni' batu. Ruma mate, nana huu lahenda ra roi horo' ao-ina nara. Ruma mate, nana huu raisa si pake tafa'. Ruma rasoda to'a-taa ma pake kakao-papake' banda rou', nana huu lahenda ese-rumu ma tao rasususa' asa, losa' usi heni si,^a 38 de ara ralai reu leo rai mamana lino-nees, rai lete' ara, rai lea' ara, ma rai bolo' nai dae dale'. Lahenda ta hika-hada' neu' lahenda ia ra, ma usi heni si, reu leo rai mamana ta malole. Sekonaa te, sira namahere na kahere' naan seli, losa' lahenda nai dae-bafo' ia ta naraa leo sama-sama ro lahenda ia ra.

39 Manetualain io basa si, nana huu ara ramahere Ni. Tehuu losa' sira mate boe, ara bei ta sipo hata fo ri' Manetualain helu. 40 Ana tao tuka hehelu Na, pake eno' fo ri' malole lena. Nana huu Ana nau ita fo ri' besa' ia talela' Kristus, ma sira fo ri' fai a ulu na ara mate, ita basa bisa tasoda taroo sama-sama to Ni.