Susura' neme Paulus
fee
Filemon
Soda-mole'
1
Susura' ia neme au, Paulus. Au nonoo ki Timotius boe haitua haraoe soda-mole'. Sadi a'a ka bubulu', ara ena au nai bui ia dale', nana huu au tui-beka fee lahenda ra la'e-neu' Yesus Kristus.Au dui' susura' ia
fee o, Filemon, fo ri' ami sue-lai ma dadi mana noi esa mo ami;
2 fee susi Apfia,a fo ri' ami tao ni sama leo' ami toranoom;
fee Arkipus, fo ri' mela-maku sama-sama no ami nai nonoi-tatao' ia;
ma fee jama'at fo biasa rabua hule-haradoi rai o uma ma.b
3 Au hule Ama' Manetualain ma ita Ramatuan Yesus Kristus, ratudu Sira dale malolen neu' emi, ela emi bisa masoda no tetu-tema', mole-dame ma tesatei-tamadale'.
Paulus hule makasi nana huu Filemon
4 Filemon! Fai fo au hule-haradoi fee o, au hule makasi neu' Manetualain, nana huu o masoda ma. 5 Au amanene dodou' la'e-neu' o mamahere Ramatua Yesus, ma susue-lalaim neu' lahenda kamahere' ara. 6 Huu no o namahere ma, de o bisa masoda dale' esa mo lahenda kamahere feke' ara. Au hule-haradoi fo kalu emi matudu dale malole mara esa no esa, sona bisa boe-boe bubulu' basa hihii-nanau' malole, fo ri' ita bisa taon soa-neu' Ramatua Yesus. 7 A'a! Huu no o susue-lalai ma, de o tao mamaho'o au ma tao matetea au dale ka. Ma o susue-lalaim boe, tao natetea lahenda kamahere' dodou' dale nara.
Paulus hule Filemon natudu susue na neu' Onesimus
8-9 A'a! Au parluu leo ia': au dadi Kristus lahenda nadedenun. No ria naa, au anuu haak pareta o tao hihii-nanau' ia. Tehuu au ta nau pareta o fa, hule noi tutulu-fafali' sama leo' lahenda lasi' ara hule tutulu-fafali'. Au dadi lahenda mana huku', nana huu au tuka Yesus Kristus. Huu ria naa, au aparani hule tutulu-fafali' neu' o, nana huu au bubulu' o sue-lai lahenda dodou'. 10 Au hule o matudu susue-lalai ma neu' au ana ki, Onesimus. Ria sama leo' au ana boki ka, nana huu no au nonoi-tatao ki, de ana namahere Yesus tepo' fo au nai bui ia dale'.c
11 Au bubulu' Onesimus nana o atam. Ana nalai heni aon. Ma au bubulu', maulu na ana ta nanuu sosoa-raraa' hata esa neu' o boe'. Tehuu besa' ia, au amahere ana nanuu sosoa-raraa' dodou' soa-neu' ita dua.d 12 Au sue aan seli, tehuu au nau adenu fali' ana leo o neti.
13 Matetu na, au nau ana leo nahere no au fo bisa kati o, ela nalalau' au nai ia. Huu fo au ta bisa tao hata-hata esa nai ia boe'. Au dadi lahenda mana huku', nana huu au afada lahenda la'e-neu' Ramatua Yesus Tutui Malole Na. 14 Au ta nau aseti o tuka au hihii-nanau ka, tehuu o hihii-nanau mesam. De kalu o ta nau, sona au ta bisa tao hata-hata esa la'e-neu' Onesimus, huu fo ria nana o haak ma.
15 Bate o afi mae leo ia': Ramatua' a nataa' Onesimus la'o ela o lalai fo dei fali main leo no o. 16 Tepo' fo nalai a, ana dadi noi neu' o ata ma. Tehuu besa' ia ana fali main, ana dadi o fadi susuem so. Au sue aan seli boe! De besa' ia, ria sosoa-raraan neu' o a nana tamba so. Ria ta dadi noi neu' o atam, tehuu ria boe dadi neu' o fadim fo sama-sama mamahere Kristus.
17 De leo ia' a'a. Kalu o tao au neu' tia-lai mananoi-manataom, sona au hule fo sipo' maan sama leo' au ri' mana mai' ria. 18 Tehuu uni' ko leo Onesimus tao nasala' o, do ana bei nahuta o, neme' naa ela au lepa-asaa aan. 19 Huta' ia ra, au ri' dui' mata ki: Au, Paulus, neu' ko bae kati Onesimus huta na fee Filemon. Dai so, do? Bate ta parluu au afarerene' fee o huta kadodou-ina ma neu' au a. Boso' mafarene henin, o dadi Ramatua' a lahendan nana huu au.
20 De a'a tulu-fali au nai hihii-nanau' ia ra, nana huu ita kileo-boboki' esa nai Ramatua' a dale'. Matatama au dale ka leo naa', huu fo ita sama-sama dadi Kristus nuu-enan.
Paulus dui' nate'e susura na
21 A'a! Au dui' susura' ia fee o, nana huu au amahere o nau mamanene matalolole neu' au. Au ameda aan, neu' ko o tao lena neme hata fo ri' au hule.
22 Bei hihii-nanau' esa bali. Sadia fee au kama esa dei. Au amahere Manetualain namanene emi huhule-haradoim, ma neu' ko Ana soi eno' ela po'i na au eme bui ia dale' fo fali uu dama emi nai naa.
23 Epafras nai ia. Ria dadi lahenda mana huku', nana huu ana tui-beka fee lahenda la'e-neu' Yesus Kristus sama leo' au. Ana haitua fee o haraoe soda-mole' boe.e 24 Au nonoo mana noi kara, Markus, Aristarkus, Demas ma Lukas boe haitua haraoe soda-mole'.f
25 Au hule ita Ramatuan Yesus Kristus, fo natudu dale malole Na neu' emi basa.
Noi ri naa' so!
Soda-mole',
Paulus