Kristus mate noi lai' esa' a, fo lahenda bisa rasoda malole ro Manetualain losa doo na neu
10
Kalu ita nau bubulu' matetu' Manetualain hihii-nanaun, atoran fo Ana fee neu' ita bei-ba'i nara, bei ta makaledo' fa. Nana huu ria noi salao' neme hihii-nanau' malole, fo ri' Manetualain nau fee neu' ita. De leo mae lahenda tao tuka atoran Yahudi sira, ma reni banda tutunu-hohotu' la'o naroo boe, ria ta bisa tao lalao-lalafu matetu' sira sala-siko nara. 2 Huu fo nai dale nara rameda raan sira bei rasala. Kalu tebe-tebe sala-siko' a hapu ampon, sona ta parluu ara reni banda tutunu-hohotu', nana huu nai dale nara rameda raan sira ta rasala so'. Sekonaa te ta leo naa'. 3 Tuka-tuka teu', ara hule rasarerei ela Manetualain sae-safe heni sira sala-sikon, 4 nana huu banda a daa na ta bisa nanuu kuasa fo tebe-tebe sae-safe heni lahenda sala-sikon.5-6 Huu ria naa, tepo' fo Kristus mai nai dae-bafo' a, Ana nafada nae leo ia':
“Manetualain!
Manetualain ta mamaho'o neu' banda tutunu-hohotu' ma neneni-fefee feke' fo ri' ara reni.
Ara hala raisa banda dodou-ina',
fo dadi tutunu-hohotu'.
Boe ma ara tunu banda dodou-ina',
fo hule ampon.
Leo mae leo' naa, tehuu Manetualain ta mamaho'o.
Huu ria naa, Manetualain madenu Au leo dae-bafo' ia mai,
dadi lahenda dae-bafo' sama leo' sira.”
7 Boe ma Kristus nafada nae,
“Manetualain! Au nai ia!
Au mai tao tuka Manetualain hihii-nanaum,
sama leo' Manetualain mana nesi mata nara dui' mema' la'e-neu' Au.”a
8 De Kristus dedea masososa a, nana ri':
“Manetualain ta namaho'o neu' banda tutunu-hohotu' ma neneni-fefee feke' fo ri' ara reni,
Ara hala banda dodou-ina',
dadi tutunu-hohotu'.
Boe ma ara tunu banda ra,
fo hule ampon.
Leo mae leo' naa, tehuu Manetualain ta namaho'o.”
De leo mae sira tao tuka matetu' ba'i Musa atoran ara, tehuu Manetualain ta namaho'o. 9 Tepo' fo Yesus nafada nae,
“Au mai tao tuka Manetualain hihii-nanaun.”
Sosoa na nae, Kristus mai tu'u-tapa heni eno paraa' a, fo katin neni' eno bebeu'. 10 Manetualain hihii-nanaun, ri' Yesus Kristus dadi tutunu-hohotu', de Ana mate lai' esa soa-neu' ita lahenda dae-bafo' a. No ria naa, Ana tao na ita dadi lahenda lalao-lalafu' losa doo na neu.
11 Tuka-tuka fai', malaka agama rupa-lole paraa' ara ralala'o raroo sira nonoi-laka nara, ma hala kokosen banda tutunu-hohotu' ara. Sekonaa te, tutunu-hohotu' sira ta parnaa ranuu kuasa, fo sae-safe heni lahenda sala-sikon.b 12 Tehuu ita Malaka Agama Madema Naan Seli, ri' Kristus, fee heni ao-ina Na de maten dadi tutunu-hohotu' soa-neu' ita. Ma Ana dadi tutunu-hohotu' noi lai' esa' a, Ana soi eno' fo bisa sae-safe heni ita lahenda dae-bafo' a sala-sikon katema'. Basa ria, besa' ko Ana neu natuu' nai Manetualain boboa ona Na, nai mamana hada-horomata. 13 Nai naa, Ana nahani losa' Manetualain tao na musu-noo nara roi rae' Ana.c 14 Tepo fo Kristus fee ao-paa Na dadi tutunu-hohotu' lai' esa' a, Ana naseki sala-siko' a kuasa na. No ria naa, Ana tao na lahenda nara lalao-lalafu' losa doo na neu.
15 Manetualain Dula-dale Malalao-malalafu Na boe nafada hihii-nanau' sama leo' naa soa-neu' ita. Ana parnaa dedea nae,
16 “Emi Ramatua ma nafada nae leo ia':
Au tao hehelu-barataa bebeu' oo Au lahenda Kara,
Au tao atoran kara rai sira dudu'a-aafin,
ma Au dui' pareta Ka nai sira dale nara.”d
17 Ana nafada selu' nae,
“Neu' ko Au ta afarene sira sala-sikon.
Ma Au afarene heni sira nonoi-tataon,
fai fo ara ralena laka Au atoran Kara.”e
18 Ria sosoa na nae, kalu Manetualain sae-safe heni lahenda ra sala-sikon, sona ta parluu lahenda reni tutunu-hohotu' fo tao masufu Manetualain dale Na.
Ita boso' bii-tamata'u mai tataa Manetualain
19 De leo ia', toranoo kara emin! Yesus fee Ria daa Na faa, fo tao masufu Manetualain dale Na. Huu ria naa, besa' ia ita ta bii-tamata'u tataa Ni, nai Ria mamana Malalao-malalafun naan seli nai nusatetu-ikutema' a. 20 Mafarene Kama Malalao-malalafu' paraa' ria! Nai naa, hapu tema' maloa ina mana pepele', fo lahenda ta bole maso' reu rataa ao nara nai Manetualain. Tehuu no Yesus mamate Na, Ana soi eno bebeu', ela lahenda bisa dedea mata' ro Manetualain. 21 Lena-lena' bali, Yesus dadi malaka agama kahere', de nalalau' ma ator Manetualain lahenda Nara. 22 Huu no ria dadi neu' ita haak na, sona mai ita maso' leo naa' teu dedea tasasare mata' to Manetualain. Tehuu ita muste tamahere tebe-tebe neu' Ana no dale roo-tetu'. Yesus mamate Na tao nalalao-nalalafu ita dale na, losa' ita ta du'a-afi hihii-nanau' tadalu' so'. Ma ita boe muste tasoda lalao-lalafu', sama leo' malaka agama rupa-lole paraa' ara muste radiu oe dei, besa' ko maso' reu ralalau' Manetualain.f
23 Mai homu tahere basa hihii-nanau', fo ri' ita manaku ni la'e-neu' Manetualain. Ma ita boe muste tamahena neu' Ana ma ita dale na boso' doda', huu fo tantu Ana tao tuka Ria hehelu-barataan. 24 Ma mai ita saka eno' fo lele'o ita toranoo kamahere nara, ela ita basa tatudu susue-lalai' dodou', ma toi-tao hihii-nanau' malole rupa'. 25 Au amanene rae lahenda ruma ta nau rabua ro sira toranoo kamahere nara. Tehuu boso' leo naa'! Emi muste mabua ao mara fo matetea esa no esa dalen. Lena-lena' bali, Ramatua' a ledo-fain natafali mai na nanenea' so. Mafarerene' fee si leo naa'!
26 Toranoo susue kara emin! Tebe-tebe ita bubulu' la'e-neu' Yesus Kristus eno roo-tetu Na. Tehuu kalu ita hiru tasadea Yesus, ma tao sala' la'o naroo, sona sosoa na nae, ta hapu tutunu-hohotu feke' fo bisa sae-safe heni ita sala-siko nara. 27 Ita tahani no bibii-namata'u, nana huu Manetualain mai fee huhuku' neu' ita. Ai-pila naraka fo pila na bau-ina' a mana sadia', ela nau nalulutu' basa lahenda fo ralena laka neu' Ana.g 28 Fai a ulu na, kalu lahenda esa ta sipo' ba'i Musa atoran na, ma lahenda dua-telu dadi sakasii, sona lahenda fo ri' tao sala' a, muste hapu huhuku mamates, ma ta hapu ampon so'.h 29 Tehuu besa' ia, kalu lahenda namumulu-namamae' Manetualain Ana Na, ria sama leo' ana ta hika-hada' neu' Yesus daan fo ri' Ana feen faa ela tao lalao-lalafu lahenda ria. Ma ana ta tao dale' neu' Manetualain hehelun fo ri' Ana hekenee-barataan no Ria lahenda Nara pake daa ria. Ma ria boe tao nasa' neu' Manetualain Dula-dalen fo ri' natudu dale malole na fee lahenda ria. Dodoo manenin! Lahenda rupa leo ia' a tantu lepa huhuku', bera lena neme lahenda fo nalena-laka ba'i Musa atoran na.i 30 Manetualain parnaa dedea nae,
“Au anuu haak balas lahenda a tadalu na.
Ma tantu Au tao leo naa'.”
Ma mana dui' bali nae,
“Manetualain nanuu haak pareta basa-basan.
Neu' ko Ana nateta' huhuku' neu' Ria lahenda Nara.”j
31 Mafarerene', huu fo Manetualain masoda'! Lahenda tantu bii raan seli, kalu Manetualain hopu naa si!
32 Emi muste mafarene, tepo' fo emi besa' ko mulai bubulu' la'e-neu' Kristus, boe ma emi dudu'a-aafi mara dadi makaledo'. Leo mae tepo' ria emi hapu doidoso ma susa dodou', tehuu emi manenete ma mamahere maroo Kristus. 33 Lahenda radadae emi ma tao ramamae' emi nai lahenda dodou' matan. Ruma tao leo naa' neu' emi tia-lai lahenda kamahere mara. 34 Emi manuu kasian ma matudu dale malole mara neu' lahenda mana huku' nai bui dale'. Kalu lahenda namana'o neni emi hata-hetom, emi sipo' no tesatei-tamadale', nana huu emi bubulu' mae, neu' ko emi sipo hihii-nanau' malole ina' fo ri' lahenda ta bisa namana'o nenin. 35 Huu ria naa, emi muste homu mahere namaherem ria. Neu' ko Manetualain balas fee emi dodou-ina'. 36 De manenete! Kalu emi tao tuka Manetualain hihii-nanaun la'o naroo, neu' ko emi sipo basa-basan fo ri' Ana helu nau fee emi. 37 Manetualain mana nesi mata nara dui' la'e-neu' Lahenda fo saka' mai a nae,
“Ta doo' a so', te Lahenda fo saka' mai a, toda mai.
Boso' etu namahena-nabani', huu fo Ana ta nahani.
38 Lahenda dale roo-tetu' a,
neu' ko hapu popo'i-tatata',
nana huu ana namahere Au.
Tehuu kalu bea heo' neme Au mai,
Au dale Ka ta namaho'o.”k
39 Lahenda rupa leo naa' a, neu' ko bika-bati neme Manetualain mai. Tehuu ita nana lahenda fo tamahere, ma ta heo' teme Manetualain mai. No ria naa, ita hapu soda' matetu' mana basa taa'.