3 Hapu tema' maloa ina esa mana pepele', ela tada bati kama kadua' sira. Kama mana nesi dea a, ara hule rae, Manetualain Kama Malalao-malalafun Naan Seli.^b 4 Nai tema' mana pepele' ria mata na, hapu mei lilo pilas esa, ela hotu reni' ai maboo meni' soa-neu' Manetualain. Ma nai Kama Malalao-malalafu' Naan Seli ria dale', hapu peti lilo pilas esa, fo ri' ara hule rae, Peti Hehelu-barataa'. Nai peti ria dale', ara peda hata fai ulu' ela dadi nafarerene' fee lahenda la'e-neu' Manetualain hehelu-barataan no si. Nai peti ria dale' boe, hapu toflees lilo pilas esa, fo peda roti manna nai dale'. Roti ria, nana fai a ulu na Manetualain naondan neme lalai mai fee ita bei-ba'i nara, tepo' fo ara ramalaa rai mamana lino-nees. Hapu ba'i Harun tete'en, fo ri' fai a ulu na parnaa natabuku a, nai peti ria dale' boe. Ma hapu batu lei fo ri' dui' Manetualain atoran, tepo' ria Ana feen neu' ba'i Musa a, rai peti ria dale' boe.^c 5 Nai peti ria tatana na nanuu patung kahere' dua, rupa nara sama leo' Manetualain eila'o-limalope madilan. Patung sira rapadei, dila nara rapela lalaa etu peti ria, nana huu mamana' ria natudu Manetualain dale kasian Na neu' lahenda dae-bafo' a. Tehuu besa' ia, au ta anuu ledo-fai fo dedea lutu-lutu la'e-neu' hata sira.^d

6 Sira pepeda-fufua hata-heton nai Manetualain Laa' Huhule-haradoin dale' nana, tebe leo naa'. Tuka-tuka fai' malaka agama ra maso-kalua leo kama fo nai mata ria reu, ela ralala'o sira nonoi-laka nara rai naa.^e 7 Tehuu noi malaka agama Yahudi ra malaka bau-ina na, bole maso' leo Manetualain Kama Malalao-malalafun Naan Seli ria dale' reu. Ma ana ta bole maso' neu sudi la'e ledo-fai bea', ana bisa maso' neu teu' esa noi lai' esa. Ma kalu maso' neu, ana muste neni banda tutunu-hohotu' a daa na, ela pisi neu' Peti Hehelu-barataa' ria tatana na. Daa ria sosoa na nae, ela Manetualain sae-safe heni malaka agama ria no lahenda nara sala-sikon katema', leo mae sala' fo ara taon a ta rameda raan.^f

8 Manetualain pake Dula-dale Malalao-malalafu Na fo fee ita bubulu' tae, kalu tema' maloa ria bei babaa eno' fo maso' leo Kama Malalao-malalafu' Naan Seli neu, ria sosoa na nae, lahenda dae-bafo' a bei ta bisa leo Manetualain mata Na reu, kalu bei pake atoran paraa'. 9 Basa sira dadi conto de Manetualain Dula-dale Na pake ni, ela nanori-nafada ita fo ri' tasoda nai besa' ia. Fai a ulu na, ita bei-ba'i nara reni neneni-fefee' ma banda tutunu-hohotu' fee leo malaka agama ra reu, ela Manetualain sae-safe heni sira sala-sikon. Leo mae ara reni tutunu-hohotu' dodou' leo' naa, tehuu tutunu-hohotu' sira ta bisa tao lalao-lalafu sira dale nara, ma ta bisa namopo sira namemeda sala-sikon nai dale nara. 10 De hata fo ri' ara tao ni, tuka noi atoran agama. Atoran agama fo pareta nae, ara ta bisa raa ia ma ta bisa rinu ria. Atoran feke' bali nae, ara muste radiu oe ma safe rou-raa nara tuka atoran a hihii-nanaun. Sekonaa te basa atoran sira, ator noi nai lahenda ao dea na, ta bisa ator lahenda dale na. Leo mae leo' naa, tehuu atoran sira muste pake rahere si, losa' Manetualain kati neni' atoran bebeu'.

11 Tehuu besa' ia, Lahenda fo ri' Manetualain helu mema' neme fai a ulu na, nana nai ia so. Ria ri' Kristus. Ana mai dadi ita malaka agama madema naan seli, ma Ana tao hihii-nanau' malole fee ita.^g Ana nalala'o Ria nonoi-laka Na, sama leo' malaka agama rupa-lole paraa', tehuu Ana noi-tao nai uma mamaso' fo kahere' naan seli. Uma mamaso' ria, ta nai dae-ina' a, huu fo ta lahenda dae-bafo' a ri' tao ni. 12 Kristus boe maso' leo Kama Malalao-malalafu Naan Seli ria dale' neu, fo nasare Manetualain sama leo' malaka agama madema rupa-lole paraa' ara tao, teu' esa lai' esa. Ma fai fo Ana maso' neu, Ana neni daa soa-neu' Manetualain. Tehuu ria feke'. Huu fo Kristus ta neni daa neme banda tutunu-hohotu' a. Ana neni a, nana Ria daa Na, huu fo Ana mate dadi tutunu-hohotu' soa-neu' ita. Tehuu Kristus neni daa Na maso' neu noi lai' esa' a, losa doo na neu po'i-tata na ita teme sala-siko' ara.

13 De Kristus daa Na, tebe kuasa na lena neme banda a daa na. Tuka ba'i Musa atoran na, lahenda fo tao sala', makekeo-makakanu', ta naraa maso' reu fo do'o-tabe Manetualain. Muste leo malaka agama a reu fo tao tutunu-hohotu', ela tutunu-hohotu' ria daa na tao lalao-lalafu selu' asa. Hapu tutunu-hohotu' dodou', hule kedae' a daa na, ma sapi a daa na. Hapu atoran esa nae, kalu lahenda oi la'e mana mate' a, sona ria dadi makekeo-makakanu' nai Manetualain mata Na. Kalu lahenda ria nau dadi lalao-lalafu' selu', sona malaka agama a muste huru afu neme hotu sapi tena' a mai. Boe ma neni afu ria, fo karin neu' lahenda makekeo-makakanu' ria, ela ana dadi lalao-lalafu' selu'.^h

14 Kalu banda a daa na tao lalao-lalafu lahenda ao-ina makekeo-makakanu na, lena-lena' bali Kristus daa Na! Huu fo Ria daa Na, tao na ita po'i-tata teme sala-siko' a ma tao lalao-lalafu ita dale na. Ita sala-sikon tao na ita bika-bati teme Manetualain mai. Tepo' fo Kristus mate, Manetualain Dula-dalen masoda' a, tulu-falin de Ana fee heni ao-ina Na neu' Manetualain, sama leo' banda tutunu-hohotu matetu' fo ri' ta nasala hata esa boe. De besa' ia ita bisa do'o-tabe matetu' neu' Manetualain masoda' a.

15 Huu no Kristus daa kaheren ria, de Manetualain pake Ni, ela tao hehelu-barataa bebeu' no basa lahenda fo ri' Manetualain naloo si dadi Ria lahendan. Tepo' fo Kristus maten ela po'i-tata na lahenda, Ria boe soi-tefa na ita lahenda Yahudi a bei-ba'in reme sala-siko' fo ara tao ni nai fai a ulu na, tepo' fo Manetualain tao hehelu-barataa paraa' no si. Huu ria naa, sira boe bisa rasoda ro Manetualain la'o naroo.

16 Au pake conto lahenda sipo posaka', sama leo' ama' esa tao susura posaka' fo neu' ko fee posaka' neu' ana na. Tehuu kalu ana' ria papa na maten, sona besa' ko bole homu posaka' ria. 17 Kalu papa na bei nasoda, sona ria ana na bei ta bisa sipo posaka, fo papa na helu mema' nai susura posaka' ria. 18 Leo' naa boe Manetualain hehelu-barataa masososan, fo ri' Ana hekenee-barataan no ita bei-ba'i nara. Kalu esa mate naulu' dei, besa' ko ara bisa sipo hata fo ri' Manetualain helu. Huu ria naa, sira tutunu-hohotun pake banda a daa na, ela dadi buti nae esa mate so. 19 Tepo' ria ba'i Musa nabua na ita bei-ba'i nara, ela nafada katema' pareta nai atoran fo ri' Manetualain naonda ni. Boe ma ba'i Musa hala sapi ma bibi, fo hai na daa nara, de epo' no oe. Ana puputu nabua ai doo lutu' rana' hida pake tali pilas. Boe ma ana naboron neu' daa ria, fo pisin neu' Manetualain Susura Makamoi Na lain ma leo basa anaraun nara neu.ⁱ 20 Fai fo ba'i Musa pisi daa ria, ana dedea nae, “Daa ia dadi tanda nae, Manetualain tao hehelu-barataa' no emi. Kalu emi tao tuka Ria pareta Nara katema', neu' ko Ana fee basa-basan fo ri' Ana helu.”^j 21 Ba'i Musa pisi daa leo Laa Huhule-haradoi' a neu boe, ma basa rou-raa' rai naa fo ri' ara pake si ela do'o-tabe neu' Manetualain.^k 22 Tuka Manetualain atoran Na, kura bai' basa-basan fo ri' makekeo-makakanu', muste tao malalao-malalafu si pake daa. Huu ria naa, kalu lahenda dae-bafo' a nau dadi lalao-lalafu' neme sala-siko nara, sona muste pake tutunu-hohotu' a daa na.^l

23 Hata fo au tuin la'e-neu' ita bei-ba'i nara, ma sira Laa' Huhule-haradoi na, basa sira nana noi conto, ela ita bisa bubulu' Manetualain mamana huhule-haradoi matetu Na nai nusatetu-ikutema'. Kalu malaka agama rupa-lole paraa' ara saka' maso' leo Laa' ria dale' reu do'o-tabe Manetualain, ara muste tao lalao-lalafu' basa-basan pake banda tutunu-hohotu' a daa na dei. Manetualain mamana huhule-haradoin nai nusatetu-ikutema' a boe muste lalao-lalafu'. Tehuu muste pake daa tutunu-hohotu' fo ri' kahere' lena neme banda a daa na. 24 Kama Lalao-lalafu Naan Seli fo ri' Kristus leo dale' neu a, nana ta kama nai Laa' Huhule-haradoi' fo lahenda dae-bafo' a tao. Laa' nai dae-ina' a, nana noi conto neme tea na mai. Tehuu Kristus maso' matan leo nusatetu-ikutema' a neu, ela nasala'e ita nai Manetualain mata Na. 25 Fai a ulu na, malaka agama madema naan seli tuka-tuka teu' muste maso' nasarerei leo Kama Malalao-malalafu Naan Seli ria neu, ma neni banda a daa na, ela fee neu' Manetualain. Tehuu Kristus ta leo naa'. Ana parluu maso' leo naa' neu noi lai' esa' a, ma neni noi Ria daa Na. 26 Kalu tuka-tuka teu', Ana muste maso' leo naa' neu sama leo' malaka agama rupa-lole paraa' ria, sona sosoa na nae, Ana muste mate nasarerei mulai neme dae-bafo' a masososa na losa besa' ia, ela Ana sae-safe heni lahenda dae-bafo' a esa-esa' ko sala-sikon. Tehuu Ana ta tao leo naa'. Huu fo naraa la'e ledo-fain te Ana mate dadi tutunu-hohotu' noi lai' esa' a, ela sae-safe heni lahenda dae-bafo' a sala-sikon katema'. 27 Tea na, nana lahenda dae-bafo' a mate noi lai' esa' a. Tehuu basa ria te, ana muste mai nataa nai Manetualain mata Na ela Manetualain parisa' ana. 28 Leo' naa boe, Kristus. Ana mate ma fee heni ao-ina Na, dadi tutunu-hohotu' noi lai' esa' a. Ma neu' ko Ana natafali mai. Tehuu Ana ta urus lahenda sala-sikon, nana huu Ana tao nabasa nonoi-laka' ria so. Tehuu neu' ko Ana urus a, nana ri' Ana nau po'i-tata na basa lahenda fo ri' ramahena neu' Ana.^m