Manetualain pake Kristus fo tao hehelu-barataa bebeu', malole lena hehelu-barataa paraa'
8
Penting au afada emi leo ia': besa' ia ita tanuu malaka agama madema naan seli, kuasa na lena heni malaka agama fai ulu' ara. Ria nana ri' Yesus. Ana natuu' homu pareta nai nusatetu-ikutema' a, nai Manetualain Madema Naan Seli boboa ona Na.a 2 Ma Ana nalala'o nonoi-laka Na nai mamana' huhule-haradoi matetu' a. Manetualain ri' tao mamana' ria, ta lahenda dae-bafo' a.3 Malaka agama madema naan seli biasa neni neneni-fefee', ma tutunu-hohotu' soa-neu' Manetualain. Huu ria naa, Yesus boe muste neni tutunu-hohotu'. 4 Tehuu Yesus ta nalala'o nonoi-laka Na, nai dae-ina' a. Nana huu nai dae-ina' a, malaka agama a ri' fee neneni-fefee' ma tutunu-hohotu' neu' Manetualain tuka ba'i Musa atoran na. 5 Ara ralala'o sira nonoi-laka nara nai Laa' Huhule-haradoi', fo rupa-lolen sama no mamana' huhule-haradoi matetu' a nai nusatetu-ikutema'. Tepo' fo ba'i Musa tao Laa' ria, Manetualain feen nafarerene' nae, “Mafarerene' matalolole! O muste tao tuka matetu' rupa-lole', fo Au atudu neu' o nai lete' ria lain!”b 6 Tehuu Yesus nonoi-laka Na kahere' naan seli lena neme malaka agama rupa-lole paraa' ara. Huu fo besa' ia, Manetualain heke hehelu-barataa malole lena bali. Ana pake Yesus dadi lelete, ela lahenda dae-bafo' a bisa mole-dame ro Manetualain.
7 Fai a ulu na, Ana tao hehelu-barataa' no ba'i Musa, tepo' fo Ana naonda atoran sira. Leo mae leo' naa, tehuu lahenda dae-bafo' a ta bisa rasoda lalao-lalafu' tuka atoran sira. De ara ta bisa malole ro Manetualain. Huu ria naa, besa' ia parluu hehelu-barataa' fo ri' malole lena. 8 Fai a ulu na, Manetualain nasa'ai lahenda nara, nana huu ara ralena laka rasarerei Ria atoran paraa Na. Tepo' fo Ana ta nanenete, boe ma namanasa, de Ana nafada nae,
“Nenene matalolole, huu fo Au anuu haak pareta basa-basan!
Tantu Au tao hehelu-barataa bebeu'
oo lahenda nusa Israel,
ma leo Yahuda.
9 Hehelu' fo ri' neu' ko Au hekenee-barataa oo si a,
ta sama no hehelu fo fai a ulu na Au hekenee-barataan
oo sira bei-ba'i nara.
Fai a ulu na Au tai a lima nara,
de apipipi-alala'o oo si kalua reme dae Masir.
Tehuu ara ta tao tuka
hata fo ri' ara helu-barataan ro Au.
Huu ria naa, Au ta nau tao dale' neu' asa.
10 Hehelu' fo ri' neu' ko Au hekenee-barataan o lahenda nusa Israel,
isi na leo ia':
Neu' ko Au peda atoran Ka nai sira dudu'a-aafin dale'.
Neu' ko Au dui' pareta Ka nai sira dale nara.
Boe ma Au dadi sira Ramatua na,
ma sira dadi Au lahenda Kara.
11 Neu' ko ta parluu ara ranori-rafada sira tia-lain,
ma sira toranoo nara rae,
‘Emi muste malela' Ramatua' a!’
ela sira basa ralela' Au,
mulai neme aana' a losa bau-ina' a.
12 Huu no Au nau atudu dale kasian Ka neu' asa,
de Au afarene heni sira sala-sikon katema'.”c
13 Tepo' fo Manetualain dedea nae, Ana nau tao hehelu-barataa bebeu' no si, ria sosoa na nae, hehelu-barataa paraa' a mana dadi taa' so. Ta doo' a so' te moi-mosa.