Melkisedek nana, malaka agama madema lena heni malaka agama Lewi no tititi-nonosi nara
7
1-3 Fai a ulu na, Melkisedek dadi mane' kota Salem. Ria boe malaka agama fee lahenda fo ri' do'o-tabe Manetualain Madema Naan Seli. Ria nade na sosoa-raraan nae, “Mane' Dale Roo-tetu'”. Ma mane' Salem sosoa na nae, “Mane' Mole-dame”. Ta hapu esa bubulu' Melkisedek momori-dadadin boe'. Ta hapu esa bubulu' ria ina-aman, ma bei-ba'i nara. Ta hapu esa bubulu' ria fai boboki na, ma mamate na. Lahenda bubulu' noi ria ri' mane' kota Salem, ma malaka agama fee Manetualain. Tehuu ria sama leo' Manetualain Ana Na, nana huu ria boe malaka agama fo ri' nalala'o naroo nonoi-tatao na.Lai' esa de, mane' hida ro soldadu nara mai ralea ra hata-heto neme' ba'i Abraham tia-lai nara. Basa de ba'i Abraham sama-sama no tia-lai nara reu ratati, losa' ara raseki mane' sira. Boe ma ba'i Abraham asa hai fali' hata-heto sira katema'. Ba'i Abraham fali neun, boe ma Melkisedek kalua neme kota Salem mai, neu sipo' ana. Ana dedea fee ba'i Abraham ua-nale' nae, “Ela leo' bea na Manetualain Madema Naan Seli fee o ua-nale'.” Boe ma ba'i Abraham bati fee Melkisedek babati' esa neme babati' sanahulu, neme basa hata-heto fo ri' ana sapu na si. Ana fee leo' naa, huu fo Melkisedek nana malaka agama neme Manetualain Madema Naan Seli.a
4 Afi matalolole la'e-neu' Melkisedek! Ba'i Abraham bati feen babati' esa neme babati' sanahulu, neme basa hata-heto malole na seli, fo ri' ana hai fali'. De tea na, Melkisedek lahenda bau-ina'. 5 Sekonaa te tepo' ria, Manetualain bei ta so'u lahenda dadi malaka agama. Losa ba'i Abraham soro ni Lewi, besa' ko Manetualain so'un no ria tititi-nonosi nara, dadi malaka agama fee ba'i Abraham tititi-nonosin katema'. Manetualain naonda fee atoran nae, lahenda neme leo Lewi ranuu haak sipo buna-boa' babati' esa neme babati' sanahulu, neme sira toranoo leo feken fo rai Israel.b 6 Tehuu Melkisedek nana ta Lewi tititi-nonosin. Leo mae leo' naa, tehuu ba'i Abraham bati fee ni babati' esa neme babati' sanahulu, nana huu ana tao Melkisedek neu' lahenda kahere'. Tepo' ria, ba'i Abraham sipo hehelu-barataa' neme Manetualain, ela fee ni ua-nale'. Leo mae leo' naa, tehuu Melkisedek boe dedea nae, “Ela leo' bea na Manetualain Madema Naan Seli fee o ua-nale'.” 7 Ia boe dadi buti nae, Melkisedek lahenda bau-ina'. Nana huu lahenda fo dedea fee ua-nale', tantu ana bau lena neme lahenda fo ri' sipo ua-nale'.
8 Basa malaka agama ra ranuu haak sipo babati' esa neme babati' sanahulu. Tehuu no sira noi lahenda dae-bafo', de mate'e na sira boe mate. Malaka agama Melkisedek boe sipo babati' esa neme babati' sanahulu. Tehuu ana nasoda naroo, nana huu Manetualain Susura Makamoi Na ta nafada nae mate ni. 9-10 Huu no ba'i Abraham bati fee Melkisedek babati' esa neme babati' sanahulu, neme hata-heto sira mai, sona lahenda bisa afi rae, ria boe lepa-nasaa na tititi-nonosin fo ri' bei ta boki si. No ria naa, ita bisa tae ana bae mema' soron Lewi nuu babatin esa neme babati' sanahulu.c
Ita parluu malaka agama rupa-lole bebeu', nana huu malaka agama rupa-lole paraa' ara ta rabe'i sae-safe matetu' lahenda sala-sikon
11 Tepo' fo Lewi tititi-nonosi nara dadi malaka agama, Manetualain here ba'i Musa a'an Harun dadi malaka agama masososa' madema naan seli. Malaka agama ra nonoi-laka nara, si' ratudu eno' ela lahenda bisa rasoda lalao-lalafu', ma malole ro Manetualain. Leo mae sira tao tuka atoran ara katema', tehuu malaka agama rupa-lole' leo' Harun, sona ana ta nabe'i tao naa si lalao-lalafu' matetu'. Huu ria naa, ara parluu malaka agama feke', rupa-lole' esa no Melkisedek. 12 Tehuu kalu malaka agama rupa-lole bebeu' kati malaka agama rupa-lole paraa', sona atoran paraa' a boe muste kati heni si.
13 De tea na nana malaka agama rupa-lole bebeu' a, ri' Yesus. Huu fo boki Ni neme leo feke', ta neme leo Lewi. Tuka ba'i Musa atoran na, malaka agama rupa-lole' leo' Harun, neme noi leo Lewi, ta bole neme leo feke' mai. 14 Tehuu basa lahenda ra bubulu' rae, ita Ramatuan Yesus Kristus bokin neme leo Yahuda. Tuka ba'i Musa atoran na, ta hapu malaka agama neme leo ria mai.
15 Tehuu Manetualain ta pake atoran paraa' ria, nana huu besa' ia Yesus dadi malaka agama rupa-lole bebeu' leo' Melkisedek. 16 Tuka ba'i Musa atoran na, malaka agama rupa-lole paraa' ara muste reme leo Lewi. Tehuu Yesus ta neme leo ria mai. Leo mae leo' naa, tehuu Manetualain so'u naan dadi malaka agama rupa-lole bebeu', nana huu Ana nanuu kuasa de nasoda naroo, ma ta hapu esa tao nalulutu' Ana boe'. 17 Huu fo mana dui' nai Manetualain Susura Makamoi Na nae,
“O dadi malaka agama rupa-lole' esa mo Melkisedek fai ulu' ria,
tehuu O dadi malaka agama losa' doo na neu.”d
18 Ria sosoa na nae, atoran paraa' a ta nanuu kuasa tulu-fali lahenda. Huu ria naa, Manetualain natika atoran paraa' fo ri' fai a ulu na Ana feen neu' ba'i Musa. 19 Leo mae lahenda nasoda ma tao tuka atoran paraa' sira, tehuu sira bei ranuu sala-siko'. Huu ria naa, besa' ia Manetualain soi eno' malole, ela ita bisa tasoda mole-dame to Ni.
Yesus nana Malaka Agama kahere' lena neme malaka agama rupa-lole paraa' ara
20-21 Fai a ulu na, tepo' fo Manetualain so'u Lewi tititi-nonosin dadi malaka agama, Ana ta helu ma ta soo-supa hata-hata esa no si boe'. Tehuu tepo' fo Manetualain so'u Yesus dadi malaka agama, Ana helu nae,
“Au ia, Ramatua' anuu haak pareta basa-basan!
Au soo-supa, neu' ko Au ta arali hata fo ri' Au helu.
Au so'u O dadi malaka agama,
ela O malala'o maroo nonoi-laka Ma.”e
22 Ma Manetualain helu leo' naa, Ana pake Yesus dadi tanda namahehere' fee ita nae, Ana nau tao hehelu-barataa' malole no ita.
23 Fai a ulu na, malaka agama rupa-lole paraa' a muste hapu kakati' la'o naroo, nana huu mate si. Huu ria naa, muste malaka agama dodou'. 24 Tehuu Yesus nana malaka agama rupa-lole bebeu' nasoda naroo, ma nalala'o naroo Ria nonoi-laka Na. De ta parluu lahenda kati Ni. 25 Huu ria naa, Yesus bisa po'i-tata basa lahenda fo nau resi' Ana leo Manetualain reu. Ana bisa tao leo naa' losa doo na neu. Ma Ana dadi sira lahenda nalelelan, de leo Manetualain neu kose-kose fo hule Ni ela tulu-fali si.
26 Yesus nana malaka agama madema naan seli, raa-la'e ita. Huu no Ria Lahenda malalao-malalafu', ta nanuu sala' hata-hata esa boe'. Ria ta sama leo' lahenda dae-bafo' fo tao sala-siko'. Manetualain nadedema Ni, lena neme basa-basan fo rai dae-ina' ma rai nusatetu-ikutema' a. 27 Huu ria naa, Yesus malole lena neme basa malaka agama rupa-lole paraa' ara. Fai a ulu na, ara muste fee banda tutunu-hohotu' tuka-tuka fai', ela Manetualain sae-safe heni sala-siko nara. Basa besa' ko ara tao tutunu-hohotu' fee lahenda ra. Tehuu Yesus ta parluu tao nasarerei leo naa', nana huu Ana fee heni ao-ina Na noi lai' esa' a, fo dadi tutunu-hohotu'. Ria dai so, de Manetualain sae-safe heni lahenda ra sala-sikon.f
28 Tuka ba'i Musa atoran na, ara so'u lahenda dae-bafo' a dadi malaka agama. Tehuu sira bei ranuu sala-siko'. Huu ria naa, Manetualain tao hehelu bebeu' nae, Ana nau so'u Ana Na dadi malaka agama madema naan seli. Huu fo Ana Na tuka naroo Ria hihii-nanaun.