6
De emi muste manori nanori-nafada' fo ri' lena ria, nana huu emi manori nanori-nafada dasar doo' a la'e-neu' Kristus. Huu ria naa, besa' ia ta parluu manori masarerei nanori-nafada' dasar la'e-neu' lahenda muste foa ela sala-siko nara; nanori-nafada' la'e-neu' lahenda fo ramahere Manetualain; 2 nanori-nafada' la'e-neu' sarani; nanori-nafada' la'e-neu' fua lima' fo sipo Manetualain Dula-dale Malalao-malalafu Na; nanori-nafada' la'e-neu' Manetualain neu' ko fee mana mate' ara rasoda selu'; ma nanori-nafada' la'e-neu' lahenda neu' ko neu nataa Manetualain ela sipo Ria naetu Na nae, bea ri' bole nasoda no Ni la'o naroo ma bea ri' ta'a. 3 Tehuu kalu Manetualain fee isin, sona mai ita tanori nanori-nafada' fo ri lena bali. Nana huu nanori-nafada' ria ri', au nau anori-afadan.4-6 Sekonaa te, lahenda bubulu' Kristus nanori-nafadan ma rameda ra Manetualain dale malole Na, losa' Ana fee si Ria Dula-dale Malalao-malalafu Na. Ara bubulu' Manetualain Hara-dasin, ma rameda ra kuasan fo ri' neu' ko Ana paken kalu dae-bafo' a noe. Leo mae leo' naa, tehuu ara tu'u-tapa heni namahere nara, boe ma rasadea foa ela Kristus. Huu ria naa, ta bisa hapu eno' ela ara ratafali hule ampon, fo rasoda malole ro Manetualain. Kalu lahenda ta nau saledale-tu'etei' leo naa', ria sama leo' sira paku ramate Manetualain Ana Na nai ai kake' a, boe ma ara ramumulu-ramamae' Ana nai lahenda dodou' matan.
7 Lahenda rupa leo naa' a, sama leo' dae fo ri' ta neni buna-boa malole. Sekonaa te kalu uda a mai sona dae mana dadi' a, bisa neni buna-boa' fo nanuu sosoa-raraa' neu' maue-maosa. Boe ma Manetualain naonda ua-nale' fo tao na dae ria, buna-boan tamba dodou'. 8 Tehuu lahenda fo nasadea Kristus, sama leo' dae mana mori ko-kau'. Ma ko-kau' sira ta ranuu sosoa-raraa' hata-hata esa boe'. Ta doo bea boe' te, Manetualain mai nateta' huhuku' neu' dae ria. Boe ma Ana hotu heni buna-boa' fo ri' ta ranuu sosoa-raraa' hata-hata esa boe'.a
9 Toranoo susue kara emin! Leo mae au dedea no hara bera' bai' leo' naa, tehuu au boe bubulu' emi ta hiru masadea Kristus. Huu fo emi mamahere Ni, ma masoda mara nanuu buna-boa malole. 10 De mafarerene' te Manetualain dale Na roo-tetu', ma Ana ta nafarene heni emi sosota mara. Emi moi-tao sota maan seli, fo tulu-fali Ria lahenda nara ma sue-lai si. Tebe emi malala'o Ria nonoi-tataon neme ulu' mai. Ma emi bei tao leo naa' la'o naroo. 11 Tehuu besa' ia, au nau emi basa moi-tao sota lena bali, ela tao tuka leo naa' maroo losa' babasa na. No ria naa, neu' ko emi sipo basa hihii-nanau' malole, fo ri' emi mamahehena' neme Manetualain mai. 12 Sadi emi boso' aomata! Emi muste tuka conto neme lahenda fo ramahere Manetualain doo' a so. Huu fo sira ramahena raroo Ni, losa' ara sipo hata fo ri' Ana helu.
13-16 Conto leo-leo' ita ba'in Abraham. Fai a ulu na Manetualain tao hehelu-barataa no ni neni' sosoo-susupa'. Kalu lahenda dae-bafo' a soo-supa, ana biasa pake Manetualain nade Na, ela Manetualain dadi ria sakasii na, nana huu Manetualain lena neme ria. Ma kalu hapu dedea', basa lahenda bubulu' rae, lahenda ria dedea na la'e, nana huu ana helu-barataa pake Manetualain nade Na. Ria nana mema' lahenda dae-bafo' a enon. Tehuu tepo' fo Manetualain helu-barataa no ba'i Abraham neni' sosoo-susupa' pake Ria nade Na, nana huu ta hapu esa lena Ni boe'. Ana helu nae,
“Neu' ko Au fee ua-nale' dodou-ina',
neu' o mo tititi-nonosi mara.
Neu' ko ara tamba dodou',
losa' ta hapu lahenda bisa reke rala si.”b
Manetualain helu basa nae leo' naa, boe ma ba'i Abraham namahere, ma namahena-nabani naroo neu' Manetualain, leo mae doo' a besa' ko ana sipo hata fo ri' Manetualain helu. 17 No ria naa, ita bubulu' kalu Manetualain tao hehelu-barataa' no Ria lahendan, sona Ana heke hehelu-barataa' ria pake sosoo-susupa', ela dadi tanda namahere' nae, hata fo Ana helu a tebe ma ta naralin. 18 Hihii-nanau' dua nana ta bisa rarali. Masososa' a, ri' Manetualain hehelu Na. Ma kadua na, ri' Ria sosoo-susupan fo ri' Ana pake ni dadi tanda namahere' neu' hehelu Na. De kalu Manetualain helu hihii-nanau' esa, tantu Ana tao tukan, nana huu Ana ta bisa dedea fufudi'. Huu ria naa, boso' ita dale na doda' neu' Ria hehelu-barataan.
Ita talai teu saka popo'i-tatata' nai Ria, de besa' ia ita tahani ma tamahena taroo Ni. 19 No ria naa, ita dale na tama, sama leo' ofa' esa hana seli nafa a, de nafu nai namo-sesee'. Ita tamahena-tabani neu' Yesus Kristus fo ri' dadi ita malaka agama madema naan seli. Fai a ulu na, naraa la'e lahenda Yahudi ra fai malolen, malaka agama madema naan seli maso' nesi' tema' mana pepele' fo babaa Kama Malalao-malalafu' Naan Seli, ela nataa Manetualain nai naa.c 20 Tehuu besa' ia Yesus maso' naulu' neu soi eno' fee ita. Ria boe malaka agama madema naan seli, rupa-lole' esa no Melkisedek fai ulu' ria. Tehuu Yesus kahere' lena neme malaka agama rupa-lole paraa', nana huu Ana ta parnaa hahae nalala'o Ria nonoi-tataon.d