5
Lahenda fo ara so'u ni dadi malaka agama madema naan seli, ria nonoi-laka na ri' muste tulu-fali lahenda, ela urus sira tututi-nanaton ro Manetualain. Ana muste sipo sira neneni-fefeen ma banda tutunu-hohotun, fo ri' fee neu' Manetualain. Ria boe muste fee banda tutunu-hohotu, ela Manetualain sae-safe heni lahenda sala-sikon. 2 Kalu lahenda ta nalela' eno masoda matetu', do lahenda heo neme eno masoda' ria mai, sona malaka agama a ta tao nasususa' asa. Ria dale Na malole a neu' asa, nana huu ria boe lahenda dae-bafo', fo muda' laesa' ralan sama leo' sira. 3 Huu no ria boe lahenda dae-bafo' fo rala ni sama leo' sira, de malaka agama ria boe muste fee banda tutunu-hohotu', ela Manetualain sae-safe heni ria sala-sikon.a 4 Lahenda ta bisa so'u aon dadi malaka agama madema naan seli. Noi Manetualain nanuu haak here lahenda leo' naa, sama leo' fai a ulu na Ana so'u na Musa a'an Harun.b5 Leo' naa boe neu' Kristus. Ana ta so'u aon dadi malaka agama madema naan seli. Huu fo fai a ulu na Manetualain so'u Ni nae,
“O nana, Au Ana Ki,
Fai' ia, Au so'u O homu pareta.”c
6 Babati feke' nai Manetualain Susura Makamoi Na, Ana nafada nae,
“O dadi malaka agama rupa-lole' esa mo Melkisedek fai ulu' ria,
tehuu O dadi malaka agama losa doo na neu.”d
7 Tepo' fo Yesus soda Na nai dae-bafo' ia saka' basan, boe ma Ana hule-haradoi ta pake hahae' ma dola, hule tutulu-fafali' neu' Manetualain ela natetea Ni. Huu fo Ana bubulu' nae, Manetualain kuasa Na, bisa fee Ni soda'. Boe ma Manetualain namanene Yesus, nana huu Ana tuka matetu' Manetualain hihii-nanaun.e 8 Yesus nana, Manetualain Anan. Leo mae leo' naa, tehuu Ana muste hapu doidoso, fo Ana nanori tuka Manetualain hihii-nanaun. 9 Tebe-tebe Ana tao tuka matetu' Manetualain hihii-nanaun katema'. Huu ria naa, besa' ia Ana dadi Ai Huu Masoda' soa-neu' basa lahenda fo ramahere Ni, ela ara bisa rasoda ro Manetualain la'o naroo. 10 Manetualain so'u Yesus dadi malaka agama, rupa-lole' esa no Melkisedek malaka agama fai ulu' ria.
Emi namahere ma neu' Kristus boso' tu'u-kari henin
11 Bei hihii-nanau' dodou' au nau dedean la'e-neu' Kristus no Melkisedek, tehuu susa laesa' au afada hihii-nanau' sira neu' makaledo na, nana huu emi bei sama leo' ana aana pakanaa', de bei ta bisa bubulu' matetu'. 12 Sekonaa te emi mamahere doo' a so. Tuka matetu na, emi muste dadi mesen, de bisa manori-mafada lahenda feke'. Tehuu tuka matetu na, emi bei sama leo' ana boki beu' a bei ta bisa naa, huu fo besa' ko bisa ninu noi sosoe'. Emi bei parluu lahenda nanori-nafada emi basa hihii-nanau' nete' neme Manetualain Susura Makamoi Na. 13 Au bisa araraa' emi mo ana boki beu' a leo naa', nana huu emi bei ta bubulu' matetu' nanori-nafada nete' la'e-neu' Kristus, ela emi bisa masoda roo-tetu'.f 14 Tehuu kalu ana boki beu' a nambau-ina, sona ana ta ninu sosoe' so', tehuu ana naa nanaa mepe'. Ria sama leo' lahenda fo nanori, losa' ana bubulu' matetu' Manetualain nanori-nafadan, ela ana nalela' nae bea ri' malole ma bea ri' tadalu'.