Kalu tamahere Yesus Kristus, ita bisa tasoda mole-dame to Manetualain, sama leo' ita hahae ao' ara to Ni
4
Tehuu besa' ia ita muste afi naru', nana huu Manetualain bei helu nae, Ria lahenda nara bisa hahae ao nara sama-sama ro Ni. De boso' losa neme emi ruma ri' tipa-tola' hata fo ri' Manetualain helu. 2 Ita tamanene tutui malole ria, sama leo' ita bei-ba'in boe. Tehuu no ara ta ramahere tutui' ria, de ara ta onto hata-hata esa boe'. 3 Tehuu kalu ita tamahere, sona ita bisa hahae ao' ara leo sama-sama to Manetualain. Fai a ulu na Ana helu leo naa' neu' ita bei-ba'i nara, tehuu basa de namanasa ma nafada si nae,“Au ta anenete mete-relu emi tadalu leo' naa mara so'.
Huu ria naa, Au barataa mema' emi ae,
‘Emi ta bole maso' leo naa' meu,
fo hahae ao mara sama-sama mo Au.’”
De ita bubulu' tepo' fo Manetualain adu lalai no dae-ina' a, Ana ator mema', ela Ria lahenda Nara bisa hahae ao nara ma rasoda sama-sama ro Ni.a 4 Nai tutui' la'e-neu' Manetualain adu lalai no dae-ina' a, hapu dudui' la'e-neu' Manetualain hahae aon nae,
“Manetualain noi-tao nabasa si,
de balahaa', naraa la'e fai kahitu na,
Ana hahae aon.”b
5 Ma nai babati feke' bali, Manetualain dedea neu' ita bei-ba'in nae,
“Emi ta bole maso' leo naa' meu,
fo hahae ao mara sama-sama mo Au.”c
6 De Manetualain nau lahenda nara hahae ao nara, fo rasoda sama-sama ro Ni. Tehuu ita bei-ba'in fo ri' ramanene raulu' tutui malole ria, ara ta bisa maso' leo naa' reu, nana huu ara ta tao tuka Manetualain hihii-nanaun. 7 Tehuu Manetualain here na ledo-fai feke', de Ria lahenda Nara bisa maso' reu hahae ao nara sama-sama ro Ni. Huu fo Ana pake ba'i Daud de dedea nae,
“Fai' ia, kalu emi mamanene Manetualain haraoe Na,
boso' matetea-mamemepe dale mara sama leo' batu,
tehuu nenene matalolole.”d
8 Ba'i Daud dedea nae, “fai' ia”, ana ta nafada la'e-neu' fai a ri', tepo' fo Yosua napipipi-nalala'o noo bei-ba'i ra upu-ana nara maso' leo dae Kana'an reu. Ba'i Daud dedea nae leo' naa, tehuu lahenda sira mate si doo' a so.e 9 Huu ria naa, ita bubulu' Manetualain ator na ledo-fai feke', fo Ria lahenda Nara bisa hahae ao nara, ela rasoda sama-sama ro Ni. 10 Ma lahenda fo maso' leo naa' neu ela hahae aon sama-sama no Manetualain, ana hahae neme nonoi-tataon sama leo' Manetualain boe hahae neme Ria nonoi-tataon, naraa la'e fai kahitu na, tepo' fo Ana adu basa dae-bafo' ia.f 11 De saka tao eno na leo' bea fo emi bisa maso' meu hahae ao mara, fo masoda sama-sama mo Manetualain. Boso' losa ta hapu esa maso' leo naa' neu boe', nana huu ana ta nau namanene Manetualain Dedea-nafadan, sama leo' ita bei-ba'i nara.
12 Manetualain Hara-dasin ratudu eno masoda matetu'. Sira ranuu kuasa fo maso' leo ita dale nara reu, ela parisa' ita dudu'a-aafin, ma ita hihii-nanaun katema', bea ri' la'e ma bea ri' ta la'e. Hara-dasi' ria tebe tande na lena heni felas a, hina ao-paa' a losa dui-aalun, de fee basan pela'-pela. 13 Nai lalai no dae-ina' a katema', ta hapu esa nanafuni' neme Manetualain mai, huu fo Ana bisa nita matetu' basa-basan. Ma neu' ko ita muste teu tasare Ni, ela tui basa-basan fo ri' ita tao.
Yesus dadi Malaka Agama Madema Naan Seli lena neme malaka agama rupa-lole paraa' ara
14 Ita muste homu tahere ita namahere na, nana huu Manetualain Anan, Yesus, dadi ita malaka agama madema naan seli. Huu fo Ana nai Manetualain matan nai nusatetu-ikutema' a, dadi lelete fo tulu-fali ita. 15 Ana bisa dadi lelete malole soa-neu' ita, huu fo Ana bubulu' ita nana lahenda dae-bafo'. Kalu lahenda duduku-papau' ita ela tao sala', sona muda' laesa' rala ita. Yesus boe hapu duduku-papau' sama no ita, tehuu ta parnaa rala Ni. 16 Huu ria naa, mai ita tapararani ao' ara tanenea' Manetualain nai kadera pareta Na. Huu fo Ria dale malole. De kalu ita hule-haradoi neu' Ana, sona tantu Ana nau natudu dale kasian Na, fo tulu-fali ita naraa la'e ledo-fain.