Manetualain Ana Na marela-masa'a lena ba'i Musa
3
De leo ia' toranoo kara emin! Manetualain here emi, ma tao emi neu' lahenda lalao-lalafu', de neu' ko emi masoda sama-sama mo Ni nai nusatetu-ikutema' a. Huu no basa hihii-nanau' sira, emi muste afi lutu-lutu la'e-neu' Yesus. Huu fo ita manaku tae, Ria nana Manetualain Lahenda Nadedenun, ma Ria boe ita Malaka Agama Madema Naan Seli. 2 Tepo' fo Manetualain nadenu Yesus, Ana tao tuka Manetualain hihii-nanaun katema'. No ria naa, Ana dadi sama leo' ba'i Musa. Huu fo ba'i Musa boe tao tuka Manetualain hihii-nanaun, tepo fo ana nalalau' ita bei-ba'i fai ulu nara.a3 Leo mae leo' naa, tehuu Yesus marela-masa'a lena ba'i Musa. Huu fo Yesus sama leo' malaka uma-loo. De tea na nana, malaka uma-loo a kahere' lena neme ata nai uma ria dale'. 4 Lahenda ra esa-esa' ko nafoa' ria uma-loon. Tehuu Manetualain nafoa basa-basan. 5 De ba'i Musa tao tuka Manetualain hihii-nanaun, tepo' fo ana dadi ata fee Manetualain uma isi nara. Tepo' ria Ana nafada mema' hata fo ri' neu' ko Manetualain nau tao ni. 6 Yesus boe tao tuka Manetualain hihii-nanaun, tehuu Ria nana ta ata sama leo' ba'i Musa. Huu fo Ria nana, Kristus, Manetualain Anan fo ri' Ana teka-here mema' neme fai a ulu na mai, nau feen leo dae-bafo' ia mai. Ma Kristus tebe-tebe urus nalela' Papa Na uma isi nara. De kalu homu tahere ita namahere na, ma tamahena taroo Kristus, ita boe bisa dadi Ria uma isin.
Boso' masadea foa ela namahere mara sama leo' bei-ba'i ra, nana huu ara ta bisa maso' leo dae fo Manetualain helu ela hahae ao nara leo
7 Huu ria naa, emi muste pasa' ridoo mara ela nenene matalolole hata fo Manetualain Dula-dale Malalao-malalafu Na nafada nae,
“Fai' ia, kalu emi mamanene Manetualain haraoe Na,
8 emi boso' laka batu,
sama leo' lahenda sira,
fo ri' la'o reu-mai losa' teu' haa hulu nai mamana lino-nees.
Ara ta nau tao dale' neu' Musa,
losa' kura bai' Manetualain
ta bisa sabar neu' asa.
9-10 Moi dodoo' ana leo!
Teu' haa hulu Au tao tanda heran rupa'
nai sira matan!
Tehuu ara soba Au kose-kose.
Huu ria naa, Au boe amanasa neu' asa ae,
‘Emi, talalu maan seli!
Huu fo emi masadea foa ela Au eno Ka,
de tuka noi emi eno peko-paki mara!’
11 Au ta anenete relu la'e emi tadalu leo' naa mara so'.
Huu ria naa, Au barataa mema' emi ae,
‘Emi ta bole maso' meu hahae ao mara leo sama-sama mo Au.’”b
12 De toranoo kara emin! Besa-besa ela boso' losa neme emi ruma tao sala', losa' ana ta namahere so', basa de hiru nasadea Manetualain masoda'. 13 Malole lena', tuka-tuka fai' emi matetea esa no esa dalen. Boso' mahani bali! Nana huu emi muda' laesa' nana tipu', fo tao sala' losa emi boe laka batu, ma ta tao dale' neu' Manetualain. 14 Ita bisa dadi tia-lai ma ei' esa to Yesus Kristus, sadi ita tamahena taroo Ni, sama leo' ita besa' ko mulai tamahere Ni.
15 Manetualain Dula-dale Malalao-malalafu Na boe dedea leo naa' nae,
“Fai' ia, kalu emi mamanene Manetualain haraoe Na,
emi boso' laka batu, sama leo' lahenda sira,
fo ri' la'o reu-mai losa' teu' haa hulu nai mamana lino-nees,
nana huu ara ralena laka neu' Musa.”c
16 Besa' ia au nau atane leo ia': lahenda fo ramania-ramanene neu' Musa, basa de hiru rasadea ni a, nana bea? Ita bei-ba'in fo ri' besa' ko Musa napipipi-nalala'o noo si kalua reme dae Masir mai a, hete? 17 Boe ma lahenda fo ri' tao ra Manetualain dale Na hanas a losa' teu' haa hulu, nana bea? Ita bei-ba'in, hete? Ara rasoda peko-paki' nai mamana lino-nees, losa' ara mate, de ratoi si reu' naa. 18 Ma lahenda fo ri' Manetualain barataa mema' asa, fo ta bole maso' leo dae ria reu, ela hahae ao nara leo sama-sama ro Ni, nana bea? Ita bei-ba'in, hete? Ara ta nau ramanene neu' Manetualain.d 19 De tetea', hete! Ita bei-ba'in ta maso' leo dae ria reu, fo hahae ao nara leo sama-sama ro Manetualain, nana huu ara ta ramahere Ni.