Boso' tipa-tola' Manetualain tutui soda-mole kahere Na
2
Huu ria naa, ita muste homu tahere hata fo tamanenen la'e-neu' Manetualain Ana Na, ela ita boso' tafarene henin. 2 Fai a ulu na Manetualain pake eila'o-limalope nara, fo rafada Ria hehelu Na neu' ita bei-ba'i nara. Matetu na, ita tamahere basa hehelu' sira, huu fo hehelu' sira bei pake rahere si. Kalu ara ralena laka Ria pareta Na, sona ara hapu huhuku' la'e no sira nonoi-tataon. 3 Tebe nai fai a ulu na leo naa'. Tehuu besa' ia Manetualain Ana Na soi eno bebeu' ela po'i-tata na lahenda dae-bafo' a. Ana nafada eno masoda kahere' ia, neu' lahendan fo ralalau Ni nai dae-ina' a. Boe ma ara rafada ita ela tamahere. Tehuu kalu ita ta tao dale' neu, sona ita soe! 4 Manetualain fee kuasa, de ara tao tanda heran rupa' ara. Ana naonda fee si Dula-dale Na, de ara tao hihii-nanau' feke' dodou' tuka Ria hihii-nanaun. Huu no basa sira, de ita bubulu' eno masoda' ria nana, mema' tebe.Ubea' taon de Manetualain Ana Na naloe-nadae aon dadi lahenda dae-bafo'?
5 Au dedea la'e-neu' dae-bafo rupa-lole bebeu' fo saka' mai. Tehuu Manetualain ta parnaa nafada eila'o-limalope nara nae, neu' ko sira si' urus dae-bafo' a. Huu fo neu' ko lahenda dae-bafo' a ri' urus. 6 Nai Manetualain Susura Makamoi Na, ba'i Daud parnaa natane la'e-neu' lahenda dae-bafo' a beli na nae,
“Manetualain!
Ubea' taon de, Ramatua' a relu-matanae lahenda dae-bafo' a?
Ubea' taon de, Ramatua' a sue-lai si?
Huu fo sira nana noi lahenda dae-bafo' biasa!
7 Tehuu Ramatua' a fee si kuasa,
de hisadei na sira dadi sama ro eila'o-limalope rai nusatetu-ikutema' a.
Ramatua' a boe fee si hada-horomata,
ma so'u si,
8 ela pareta basa-basan fo ri' Ramatua' a adu-tao.”a
De tuka ba'i Daud duduin ria, Manetualain tao na lahenda dae-bafo' a dadi malaka, ela urus basa-basan fo ri' Ana adu na si. Sekonaa te ita bei ta parnaa bubulu' lahenda dae-bafo' esa, pareta basa-basan leo' naa boe'.
9 Tehuu Esa ri' bisa pareta basa-basan. Ria nana ri', Yesus. Ana mai leo lalai nai dae-ina' a, fo dadi lahenda dae-bafo' de lepa doidoso losa' mate. Ana mate leo' naa, ela natudu Manetualain dale malole Na neu' lahenda dae-bafo' a. Boe ma Manetualain io Ni ma nadedeman, de Ana pareta basa-basan fo ri' Manetualain adu-tao na si. 10 De naraa Manetualain fee Yesus lepa doidoso, ela Yesus bisa soi eno soda' soa-neu' lahenda dae-bafo' a. Manetualain nau basa lahenda dodou' bisa rasoda sama-sama ro Ni nai nusatetu-ikutema' a. Manetualain ri' adu na basa-basan. Ma basa-basan fo rasoda a, nana huu Ria.
11 Tantu Manetualain sipo' no malole lahenda fo Yesus tao na si dadi lalao-lalafu', ela ara dadi Manetualain ana Nara. Manetualain boe Yesus Papa Na. No ria naa, Yesus no sira Papa' esa' a. Huu ria naa, Yesus ta mae' hule si nae,
“Emi nana, Au toranoo boki Kara.”
12 Huu fo Yesus nafada Papa Na nae,
“Au nau afada toranoo Kara,
la'e-neu' Papa dale malole Na!
Au nau soda nai sira basa talada,
la'e-neu' Papa marela-masa'an!”b
13 Yesus dedea naroo nae,
“Au amahere aroo Manetualain.”
Yesus dedea bali nae,
“Mita'! Au nai ia,
sama-sama oo Manetualain ana Nara,
fo ri' Ana fee si leo Au mai, ela urus asa.”c
14 Huu no Manetualain anan sira nana lahenda dae-bafo', de Yesus boe muste dadi lahenda dae-bafo' sama leo' sira. Ana muste dadi lahenda dae-bafo', besa' ko Ana mate. Nai Ria mamate Na, Ana naseki nitu a kuasa na. Huu fo malaka tadalu' ria, homu kuasa fo urus basa hihii-nanau' fo ri' nanaheke' no mamates. 15 Ma ana tao na lahenda dae-bafo' a bii' la'e-neu' mamates, losa' ara tuka ria hihii-nanaun, sama leo' ata. Tehuu besa' ia Yesus bisa po'i-tata na lahenda dae-bafo' a reme sira bibii-namata'un mai. 16 Tea na nana, Yesus ta mai fo tulu-fali Manetualain eila'o-limalopen. Tehuu Ana mai ela tulu-fali ba'i Abraham tititi-nonosin, fo ri' ita ia. 17 Huu ria naa Yesus dadi sama leo' ita fo ri' dadi Ria toranoon. No ria naa, Ana bisa dadi ita malaka agama madema naan seli, de tulu-fali ita ela tuka Manetualain hihii-nanaun. Ria boe natudu dale kasian Na neu' ita. Ma Ana dedea ubea', sona Ana tao tukan.
Fai a ulu na ita bei-ba'i nara hule malaka agama ra malaka bau-ina na tao tutunu-hohotu', ela Manetualain sae-safe heni sira sala-sikon. Besa' ia, Yesus dadi tutunu-hohotu', de Manetualain sae-safe heni ita sala-sikon. 18 Tepo' fo Yesus nasoda nai dae-bafo' ia, Ana hapu doidoso' dodou-ina'. Ruma duduku-papau' Ana, ela tao sala'. Leo mae leo' naa, tehuu ta rala Ni. Huu ria naa, kalu bea duduku-papau' ita fo tao sala', sona Yesus bisa tulu-fali ita, ela boso' rala ita.