3 Leo' naa boe neu' ina lasi' ara. Mafada si ranea ratalolole natuu-napadei nara, ma rasoda tuka noi Manetualain hihii-nanaun. Boso' dedea ramumulu lahenda naden. Boso' lili-ne'a noi ara-ralu. Tehuu ara muste ranori-rafada lahenda ra fo rasoda no malole. 4 No ria naa, ara ranori-rafada ma ratudu eno malole neu' ina muri-ana' ara, ela sue-lai sao-ana nara. 5 Ara muste ranori-rafada si fo rasoda balaroe-balanau', lalao-lalafu', ator uma-loo nara no malole, hada' sao nara ma fee sao nara rauli-ralaka uma-loo. Kalu rasoda leo naa', sona neu' ko ta hapu lahenda dedea ramumulu-ramamae' Manetualain Hara-dasin.

6 Leo' naa boe, manori-mafada tou muri-ana' ara, ela rasoda no balaroe-balanau'.

7 Titus! O muste masoda matalolole, fo dadi conto soa-neu' lahenda feke' ara. O moi-tao hata ubea' muste tao ni no matetu', sama leo' o manori-mafada lahenda ra boe. Boso' mamimina' mo o nonoi-tataom. 8 Kalu o manori-mafada lahenda, sona muste pake nanori-nafada matetu', ela lahenda ra ta hapu eno' fo sale o. No ria naa, lahenda fo ri' soa' ita, ara mae' nana huu ara ta hapu eno' fo sale ita.

9 Manori-mafada ata ra, ramanene neu' sira malakan nai basa hihii-nanau' ubea' a, ma tao ramaho'o malaka nara dalen. Ara boso' rasisipo bafa' ro malaka nara. 10 Ara ta bole ramana'o malaka na hata-heton. Ara muste rasoda no roo-tetu', losa' dadi reu' malaka nara lahenda namaheheren. Sira muste dadi lahenda malole ma dite-tama rahere. Kalu lahenda feke' ara rararaa' ata nara masoda na leo' naa ro basa-basan fo ri' ita tanori-tafada, tantu ara manaku rae, nanori-nafada' sira kahere' naan seli. Huu fo ita tanori-tafada la'e-neu' Manetualain ita manapo'i-manatatan.

11 Manetualain natudu dale malolen neu' basa lahenda ra, ma soi eno' ela ara hapu popo'i-tatata' reme sala-siko' a mai. 12 Huu ria naa, ita muste tu'u heni masoda' fo ta malole ma basa hihii-nanau ao-paa tadalu' ara. Ita tasoda nai dae-bafo besa' ia, sona muste tanenete, ma tasoda no malalao-malalafu' ma dite-tama tahere Manetualain. 13 Besa' ia ita tamahena tae, Yesus Kristus natafali mai no marela-masa'an! Ria dadi babati-papala' soa-neu' ita basa. Ria nana, ita Ramatua marela-masa'an fo ri' po'i-tata na ita. 14 Ana fee heni ao-ina Na dadi tutunu-hohotu', ela soi-tefa na ita teme basa sala-siko ara. Ana tao na ita dadi Ria lahendan fo tasoda no dale malalao-malalafu', ma nau tao malole la'o naroo.^a

15 Titus, manori-mafada basa ia ra neu' jama'at ara. Fufu'a-aali si ela ara tuka basa nanori-nafada' sira. Bea ri' tao sala', sona matudu fee si eno malole. Lahenda ta bole radadae o nana huu o manuu haak tao basa sira.