Susura' ia neme au, Paulus, Manetualain atan ma Yesus Kristus lahenda nadedenun. Ana nadenu au ela atetea Ria lahenda teteka-hehere Nara namaheren. Ana nadenu au fo atudu eno roo-tetu', ela ara rasoda tuka Manetualain hihii-nanaun. No ria naa Manetualain lahenda nara ramahena rae ara bisa hapu soda-mole' mana basa taa'. Manetualain bei ta adu dae-bafo' ia, tehuu Ana helu mema' nae, neu' ko lahenda nara hapu soda-mole' mana basa taa'. Ma tebe Ana ta dedea fufudi'. Naraa la'e ledo-fain, Manetualain natudu ledo-ledo nae, Ana po'i-tata na lahenda reme sala-siko nara, ela ara bisa hapu soda-mole' mana basa taa'. Boe ma Ana pareta au uu tui-beka Tutui Malole Na neu' basa lahenda rai basa mamana' ain.

Titus! O sama leo' au ana boki ka, nana huu o mo au sama-sama tamahere Kristus. De au hule-haradoi neu' Manetualain ita Aman ma Yesus Kristus Manasoi-manatefa, ela ratudu dale malole Nara neu' o, fo masoda no tetu-tema', mole-dame ma tesatei-tamadale'.^a

5 Fai maulu' a au la'o ela o nai pulu Kreta, ela o bisa ator ma hihii-nanau' hida fo ri' bei parluu nai naa. Ma ela so'u ma lahenda fo naraa nauli-nalaka jama'at ara rai sira esa-esa' ko kotan. Boso' mafarene heni atoran fo au afada o la'e-neu' mauli-malaka jama'at ara. Nae: 6 kalu nau so'u lahenda dadi mauli-malaka jama'at, ria masoda na ta bole sala' esa boe'. Ana muste dite-tama no noi sao ina' esa' a. Lahenda ria ana nara boe muste ramahere Yesus Kristus. Boso' losa lahenda rae, ana' nara tao nahuu-nalena', ma laka batu'. 7 Mauli-malaka jama'at ara ralala'o Manetualain nonoi-tataon. De ara muste rasoda no roo-tetu', ma ranuu nade malole. Boso' so'u lahenda; mana koao', bau'nasa, mana mafu', mahuu-malena', ma lahenda mana tendetuu doi-tali. 8 Lahenda fo dadi mauli-malaka jama'at, ara muste rahii' sipo' lahenda nai uma nara no malole. Ara muste rahii' noi malole; muste balaroe-balanau', muste tuka noi roo na, muste dale malalao-malalafu', ma nauli natalolole ao-ina na. 9 Ara muste homu rahere Manetualain Hara-dasin, fo ri' fai maulu' a ita tanori-tafada si a. No ria naa, ara bisa ratudu Manetualain eno roo-tetu Na, fee lahenda feke' ma bisa tao ratetu' nanori-nafada pepeko' ara.^b

10 Lahenda dodou' rahii' ralena laka neu' nanori-nafada matetu' a, dedea-nafada nara ta nanuu huu-peda', ma rahii' noi napuputa' a. Lena-lena' lahenda Yahudi ra rae, basa lahenda fo nau hapu popo'i-tatata', sona ara muste sunat. 11 Ara pake sira nanori-nafada masala nara, fo hela reni kileo-boboki' ruma losa' la'o ela Ramatua' a nanori-nafada roo-tetun. Lahenda rupa leo naa' ara saka noi doi-tali tuka eno napuputa'! Masa'ai si ela boso' ranori-rafada raroo nanori ta matetu' a. 12 Fai esa boe ma pulu Kreta lahenda nara mana helon esa tui la'e-neu' asa, nae:

13 Tebe lahenda sira leo naa'! Huu ria naa, o muste masa'ai si no hara bera', ma lea-nore fali' lahenda fo ri' nanatipu-nanadai' ela matetea selu' sira namahere nara neu' Ramatua' a. 14 Lele'o si ela ara boso' ramanene selu' lahenda Yahudi ra tutui tutura nara. Sira boe muste hahae tuka pareta neme lahenda fo ta sipo' nanori-nafada matetu' a.

15 Mafarerene' matalolole! Soa-neu' lahenda dale malalao-malalafu', basa-basan malalao-malalafu'. Tehuu soa-neu' lahenda dale makekeo-makakanu', ma ta ramahere Ramatua' a, ta hapu hihii-nanau' esa malalao-malalafu' boe'. Nana huu sira dale nara ma dudu'a-aafin mema' makekeo-makakanu'. 16 Ara manaku rae, sira ralela' Manetualain. Tehuu sira masoda nara sama leo' ta ralela' Ana. Sira masarole-masarali'. Iku a lahenda dale tadalu'! Ara ta nau tuka Manetualain hihii-nanaun. Boso' mamahena mae lahenda rupa leo naa' ara bisa tao malole!