Susura' ia neme au, Paulus, Manetualain here na au dadi Yesus Kristus lahenda nadedenun. Yesus nadenu au aru'u-alosa' soda' mana basa taa'. Soda' mana basa taa' ria, Manetualain helu basa neu' lahenda kamahere' ara.

Timotius! O sama leo' au ana boki ka. De au hule-haradoi ela Manetualain, ita Aman ma Yesus Kristus ita Ramatuan, fo Ara sue-lai ma ratudu dale malole nara ma fee o masoda no tetu-tema', mole-dame ma tesatei-tamadale'.^a

3 Hatu-leledon au hule-haradoi fee o. Au hule makasi neu' Manetualain, nana huu o tuka mahere Ni. Au alalau Ni no dale malalao-malalafu', sama leo' ita bei-ba'i nara ralalau Ni. 4 Au afarene tepo' fo ri' ita tasida', o luu ma tuda. Au dale ka nahii' naan seli aneta oo ko selu', ela au dale ka namaho'o.

5 Au boe afarene tepo' fo o mulai mamahere tebe-tebe Ramatua Yesus. Namahere rupa leo naa' a, naoka-nasamu mema' nai o beim Luisa ma o mamam Yunike dale nara. Ma au boe amahere tebe-tebe ae, namahere rupa leo naa' a nasoda nai o dale ma.^b

6 Tepo' fo au fua lima ka neu' o laka ma ma hule-haradoi fee o, fai ria Manetualain fee o bebe'i-bara'ai' losa' moi-tao fee Ni. De besa' ia au hule fo o mamomori' selu' babati-papalam ria. 7 Huu fo Manetualain Dula-dale Na, ta fee ita dadi lahenda mana bii'. Tehuu Ana fee ita bebe'i-bara'ai', henu' no susue-lalai', ma tauli tatalolole ao-ina' ara. 8 De boso' mae' dedea la'e-neu' ita Ramatuan fo ri' nanuu haak pareta ita. Ma boso' mae', nana huu au lahenda mana huku'. Tuka matetu na huku au, nana huu au alalau Ni. Kalu o tui-beka Ramatua' a Hara-dasin, sona o muste sadia lepa-masaa susa-lela sama leo' ami. Kalu hapu susa-lela leo naa', sona neu' ko Manetualain fee o bebe'i-bara'ai'.

11 De Manetualain so'u na au dadi Yesus Kristus lahenda nadedenun, ela au tui-beka Tutui Malole Na, ma au anori-afada lahenda rai basa mamana' ain.^c 12 Basa ia ra tao fee au doidoso nai bui dale'. Tehuu au ta mae'! Huu fo au bubulu' lahenda fo ri' au amahere ni, nana ri' Ramatua Yesus. Ma au bubulu' no matetu', Ana nabe'i nanea nonoi-laka' ia, nana huu Ria ri' fee au. Neu' ko Ana fee bebe'i-bara'ai' ela au alala'o nonoi-laka' ia losa' Ana natafali selu' mai. 13 De manori tuka nanori-nafada roo-tetu' fo ri' au atudun neu' o. Mamahere maroo ma sue-lai basa lahenda ra ela natudu nae, o dadi esa' mo Yesus Kristus. 14 Manetualain fee o hata mabeli esa ri' nanori-nafada roo-tetu' a. De maboi matalolole hata ria! Pake Manetualain Dula-dale Malalao-malalafun fo ri' nai ita basa dale na, ela Ana tulu-fali o maboi ma manea hata ria no malole.

15 Tantu o mamanene rae, Figelus no Hermogenes, ma lahenda feke' fo reme propensi Asia,^d ara foa ela au. 16-18 Tehuu Onesiforus sona feke'. Ana ta heo' neme au mai. O mita mata' maulu na au bei nai kota Efesus, ana tulu-fali au la'o naroo. Fai fo ana mai nai kota Roma ia, ana saka nalelei' au nai basa mamana' ain. Mate'e na ana hapu au nai bui dale'. Tehuu ana ta mae'. Ana mai dama au la'o naroo nai bui ia, ela natetea au dale ka.

De au hule-haradoi fo Manetualain natudu dale malolole Na neu' Onesiforus no basa kileo-boboki nara. Naraa no dae-bafo' a nonoe na, Manetualain naetu' lahenda dae-bafo' ara dedean, au amahehena' Manetualain naetu' no malole neu' Onesiforus asa.