Lahenda Kristen ara masoda matetu na
3
Mafarerene' fee jama'at ara, fo ramanene neu' mana pareta ra, ma lahenda mana homu kuasa. Ara muste tuka basa atoran ara. Muste sadia tao malole la'o naroo. 2 Boso' popode' maa nara fo dedea ramumulu lahenda ra nade malolen. Boso' rasisipo bafa', tehuu malole lena' rasoda balaroe-balanau' neu' basa lahenda ra.3 Maulu na, tepo' fo ita bei ta talela' Ramatua Yesus, ita ta bubulu' hata esa boe', ma muda' laesa' hapu eedi-fufule'. Ita ta nau tamanene lahenda feke' a. Ita tasoda tuka noi hihii-nanau ao-paa rupa', tao tadalu' soa-neu' lahenda feke' ma ete' ao ara esa no esa.
4 Leo mae ita masoda na nalulutu' leo' naa boe, Manetualain ita manapo'i-manatata na natudu susue-lalain, ma dale malole Na neu' ita. 5 Ana po'i-tata na ita, ta huu no ita nonoi-tatao malolen, tehuu no Ria susue-lalain neu' ita. Ana sae-safe heni ita sala-sikon, pake Dula-dale Malalao-malalafu' Na fo tao nabeu ita masoda na, sama leo' boki natafali' ita. 6 Manetualain naonda fee laesa' Dula-dale Na neu' ita namano'u-namadai, huu no Yesus Kristus mate ela po'i-tata na ita teme sala-siko' a. 7 Huu no Yesus dale malole Na, de Ana tao natetu ita nabua-naesa na to Ama' Manetualain, sama leo' Ama-ana'. De ita bubulu' neu' ko hapu soda' mana basa taa'. Masoda' ria dadi ita posaka na! 8 Hata fo au dedea ia mema' tebe leo' naa.
Hata fo au anori-afadan ia, neni sosoa-raraa' neu' basa lahenda ra. De o muste fufu'a-aali lahenda ra, ela ara tuka matetu' nanori-nafada' sira. Huu fo lahenda bea namahere Manetualain, ana muste saka eno' fo tao malole. 9 Boso' sososo' leo dedea papake taa' a, leo-leo': nasisipo bafa' neu' dedea' fo huu-pedan ta'a, mareresi' lalala' mo lahenda, matipa-to'a la'e-neu' emi tititi-nonosim bea ri' bau lena, ma mahuu-malena la'e-neu' Yahudi ra atoran hadas nara. Basa sira sosoa-raraa taa'. Tutu'u hihii' ledo-fai! 10 Muu fee nanori-nafada' neu' lahenda fo tao nabika-nabati' jama'at ara. Kalu ana bei tao selu' leo naa', sona masa'ain no hara bera'. Kalu ana bei tao naroo, sona boso' boe mabua-maesa mo ni. 11 Lahenda rupa leo naa' a, dudu'a-aafin ta natetu. Ria nonoi-tataon ri' natudu basa lahenda ra ria sala-sikon.
Paulus dui' nate'e susura na
12 Au nau adenu Artemas do Tikikus, ela neti dama o nai pulu Kreta. Kalu ana losa, sona o lai-lai mai dama au nai kota Nikopolis. Huu fo fai masufu' ia, de au ahii' uu leo nai naa.a 13 O malela' lahenda malela hohoro-lalane' fo nade Senas, no nonoon Apolos, hete? Ara nau leo dae doo' reu. De o tulu-fali si ela ara boso' to'a-taa hata esa nai eno'.b 14 Lahenda fo tuka Ramatua Yesus, ara ta bole ratuu' eke lima-ei nara. Ara muste ranori roi-tao malole, ma tulu-fali lahenda manato'a-manataa' ara. No ria naa, sira masoda nara ranuu sosoa-raraa'.
15 Ami basa nai ia, haitua haraoe soda-mole' neu' o, Titus, ma neu ita nonoon fo sama-sama tamahere Ramatua Yesus.
Au hule-haradoi neu' Ramatua' a fo natudu dale malole Na neu' emi basa.
Noi ri naa' so,
Paulus