Muu tui-beka Manetualain Hara-dasin
4
1-2 Neu' ko Yesus Kristus natafali leo dae-bafo' ia mai, homu pareta sama leo' mane'. Leo mae lahenda fo bei nasoda, ma lahenda fo ri' mate si, basa si reu rataa Ni fo Ana naetu' sira dedea nara. De au hule tebe-tebe nai Manetualain no Yesus Kristus matan, fo muu tui-beka fee lahenda ra Manetualain Hara-dasin. Sadia la'o maroo! Boso' afi mae ledo-fain malole, do ta'a. Matudu lahenda salan. Ma masa'ai si no malole ma sabar. Matetea dale nara pake nanori-nafada roo-tetu'.3 Huu fo balahaa-binesa', lahenda ta nau ramanene nanori-nafada matetu' a so'. Ara rahii' ramanene noi mesen fo tutui nara la'e no sira ridoo namanene nara. 4 Ara ta nau ramanene nanori-nafada matetu' a. Tehuu rahii' ramanene noi tutui papake taa' ara!
5 Leo mae leo' bea boe, o muste balaroe-balanau aom. Manenete nai doidoso dale'. Muu tui-beka Tutui Malole a ela lahenda ra sipo' Yesus Kristus. Malalau' lahenda no dale namaho'o, losa' basa nonoi-tatao' ria. Boso' moi no dale poo seseri'.
6 Boso' tao aafi' neu au, huu fo au fai mamate ka nanenea' so. Au sama leo' galaas a, isi na saka' basa ni.a 7 Tehuu au apo'i-lalai' basa no malole. Au alai losa too a so. Au tuka ahere Yesus Kristus, ma ta heo leo bai' uu boe'. 8 Besa' ia, bei ahani noi hihii-nanau' esa. Ri' beker juara fo ita Ramatua na peda mema' ana fee basa lahenda fo rasoda no roo-tetu'. Ita Ramatua na nana mana ee dedea matetu'. Neu' ko naraa no ledo-fai na, Ana fee au beker juara ria. Ma ta noi au mesa' ka. Tehuu basa lahenda fo sue-lai Ni, ma rahani mamai Na, sira hapu beker leo naa' boe!
Paulus fee hehelu' la'e-neu' hihii-nanau' rupa'
9 Timotius! O lai-lai mai dama au dei! 10 Huu fo besa' ia, au mesa' ka. Kreskes leo propensi Galatia neu so. Ma Titus boe leo nusa Dalmatia neu so. Tehuu Demas nahii' noi hihii-nanau' dae-bafo papake taa' ia, ana foa ela au de leo kota Tesalonika neu.b 11 Noi Lukas mesa' ana leo no au nai ia. Saka ma Markus fo emi dua mai bela' a. Huu fo ana bisa tulu-fali rupa' ara neu' au nai ia.c 12 Au adenu Tikikus leo kota Efesus neu so.d 13 Kalu o mai sona mafarerene' muni au jeket ka fo ri' au la'o elan nai Karpus uma na nai kota Troas. Ma mafarerene' muni au susura kara, lena-lena' mana dui' nai banda rou' a.e
14 Aleksander mana tutu riti ria, ana tao tadalu' dodou' neu' au. Pesin neme' naa, huu fo neu' ko Ramatua' a balas ana tuka ria nonoi-tataon.f 15 Besa-besa mo lahenda ria, nana huu ana nahii' nalena-laka ita dedea-nafadan.
16 Tepo' fo au masososa apadei nai mana ee dedea' ara matan fo asala'e au dedea ka, ta hapu lahenda esa sama-sama no au boe'. Basa si lao' ela au. Neme' naa! Ela Manetualain nafarene heni sira sala-siko nara. 17 Leo mae leo' naa boe, tehuu Manetualain ta foa ela au. Ana fee bebe'i-bara'ai' neu' au, ela au bisa tui-beka Tutui Malole Na ma ta kura-kai hata esa boe'. Au tui-beka leo' naa neu' basa lahenda fo ta Yahudi, ela ramanene Tutui Malole ria. Ma au boe po'i a ao ka eme mamates a. 18 Neu' ko Manetualain po'i na au eme basa tadalu' ara. Ma Ana napipipi-nalala'o au no soda', maso' leo nusatetu-ikutema' a uu. Ria ri' homu pareta nai naa.
Manetualain marela-masa'a! Au io-oa ma so'u amadedema Ni, ta namaetun! Amin.
Paulus dui' nate'e susura na
19 Boso' mafarene henin fee haraoe soda-mole' neu' susi Priskila,g no saon, bu Akila. Leo' naa boe neu' Onesiforus kileo-boboki nara katema'.h 20 Erastus leo nai kota Korintus. Fai maneu' ara au foa ela Trofimus nai kota Miletus, huu fo tepo' ria ana namahedi bera'.i 21 Malale fo bei ta losa fai oe faa' a, te o losa nai ia so. Toranoo' Ebulus, Pudes, Linus, susi Klaudia ma toranoo' Kristen feke' rai ia, sira basa ralosa' haraoe soda-mole' fee emi.
22 Au hule Manetualain sama-sama no o losa doo na neu. Ma Ramatua' a natudu dale malole Na neu' emi basa.
Noi ri naa' so,
Paulus