Nai dae-bafo' a nonoe na, lahenda dadi sama leo' ubea?
3
Timotius! Dae-bafo' a fai nonoe na nanenea', te neu' ko susa-lelan dodou' naan seli. Au afada mema' o leo naa'. 2 Neu' fai ria te lahenda sue-lai noi ao-ina heheli nara ma du'a-afi noi doi-tali. Ara radedema ao nara ma radadae lahenda feke' ara, soa ramumulu' a, ta nau ramanene ina-ama, ta hule ralela' makasi, manori taa' ara, ta rahii' hihii-nanau' fo ri' la'e-neu' Manetualain, 3 ta sue-lai lahenda, ta nau mole-dame ro lahenda, ara rahii' ramumulu lahenda, ta ranenete rala ao nara, makaresi', ta rahii' dedea' malole, 4 rahii' se'o heni tia-lai nara, ta dodoo-tatai naru', tao uni sira ralela', tuka hihii-nanau' ao-paa' a lena heni tuka Manetualain. 5 Ara tao ao nara dadi' lahenda fo tuka Manetualain, sekonaa te rou'. Manetualain kuasa Na ta nai sira dale nara. Boso' manenea' mo lahenda rupa leo naa' ara.6 Lahenda rupa leo naa' ara, kodi lahenda uman reu no mata-idu maleleka nara, fo fufudi-lele'o ina' fo dale na balanau' fo ri' muda laesa' hapu sosoba'. Ina' rupa leo naa' ara, masoda nara lepa sala-siko dodou' naan seli, ma tuka hihii-nanau ao-paa rupa'. 7 Ramanene mesen bebeu' mai ranori-rafada hihii-nanau' bebeu', sona roi tuka-tuka' a. Tehuu ara ta parnaa bubulu' bea ri' la'e ma bea ri' sala. 8 O mafarene Yanes no Yamres tutui na, hete?a Tepo' ria dua si ralelena ao' ro ba'i Musa. Mesen besa' ia ra, hada-parii nara leo naa' boe. Ara ta sipo' nanori-nafada matetu' a. Sira dudu'a-aafin ta malole a, ma namahere nara ta tuka matetu na so'. 9 Mesen pepeko' rupa leo naa' ara, ta bisa ranenete rala doo' a. Doo-doo boe ma basa lahenda bubulu' koa-pakanaa nara! Sama leo' maulu' na lahenda ra bubulu' Yanes no Yamres napuputa nara.
Homu mahere nanori-nafada' fo ri' o sipo
10 Timotius! O bubulu' katema' au masoda ka. O bubulu' basa-basan fo ri' au anori-afada. O bubulu' au leleo-lala'ok. O bubulu' au maksud ka. O bubulu' hata fo au amahere. O mita mata' au sabar ka neu' lahenda ra, ma au susue-lalai ka neu' asa. Ma o bubulu' au anenete tao leo' bea, nai au doidoso ka dale'. 11 O boe bubulu' ara fepa-li'u ramimina' au, losa au lepa doidoso rupa'. Au hapu doidoso leo naa' ara nai kota Antiokia, Ikonium ma Listra. Tehuu Manetualain po'i na au eme basa sira mai.b 12 Tebe basa lahenda fo ramahere Yesus Kristus, ma rasoda lalao-lalafu' tuka Manetualain hihii-nanaun, tantu lahenda tao doidoso si. 13 Lena-lena' bali lahenda tadalu' ara ro mapuputa' ara, boe-boe tadalu raroo. Ara tipu-dai ratuda lahenda feke', sekonaa te sira boe nana tipu'.
14 De o muste homu mahere nanori-nafada' fo ri' o sipo. Ma hata fo ri' o mamaheren a, tuka maroo ni. Huu fo ria nana roo-tetu'! O bubulu' matetu' bea ri' nanori-nafada basa sira neu' o, hete? O bisa mamahere si!c 15 Mulai neme o bei aanam ria, o bubulu' Susura Makamoi' a isi-liin! Susura' sira ratudu eno masoda', ela mabua-maesa mo Manetualain nai nusatetu-ikutema' a, nana huu mamahere Yesus Kristus. 16 Basa-basan fo mana dui' nai Susura Makamoi' a nana tebe Manetualain ri' fee neu' lahenda ra fo dui' asa. Susura' ria, sosoa-raraan, ri': nanori-nafada lahenda ra roo-tetu', natudu lahenda sala-sikon, hela-nore fali' lahenda leo eno roo-tetu' a, nanori-nafada lahenda ela tuka-tuka fai' leo la'o tuka Ramatua' a hihii-nanaun. 17 No ria naa, Susura Makamoi' a, tao namano'u-namadai Manetualain lahenda Nara, ela ara rabe'i tao basa nonoi-tatao malole.