Ita mana tuka Kristus, muste tasoda sama leo' soldadu fo tuka naroo komendaan
2
Timotius, au ana susuek! Yesus Kristus nana dale malole. Ana nau fee o bebe'i-bara'ai'. De o muste sipo' ana, huu fo o mabua-maesa mo Ni. 2 Maulu' na au anori-afada o la'e-neu' Manetualain eno roo-tetu Na nai lahenda dodou' matan. De besa' ia au hule o, ela basa hata fo ri' o mamanene neme' au mai, muu manori-mafada selu' asa fee lahenda fo o bisa mamahere si. Ara muste ranori-rafada ralela' nanori-nafada' ria neu' lahenda feke' ara bali.3 Ita basa ia nana, sama leo' Yesus Kristus soldadu nara. De ita lepa bela' doidoso sama leo' Ria boe. Huu no o nana soldadu malole, de o muste lepa ma nuu babati ma. 4 Soldadu fo ri' nalala'o nonoi-laka', ana ta neu sososo' no nonoi-tatao feke'. No ria naa, ana tao na komendaan na namaho'o.
5 Hai conto feke' neme napo'i lalai' a. Kalu ita tapo'i lalai', sona muste tuka atoran a. Kalu ta'a sona dea' teu leo, huu fo ta hapu juara so'. Leo' naa boe, kalu ita nau talala'o Ramatua' a nonoi-tataon, sona muste tuka atoran a.
6 Mete neu' lahenda maue-maosa a. Ana noi-tao mela-maku naan seli nai oka-tinen. Huu no ana tao leo naa', de hapu naulu' oka-tinen buna-boan. 7 Afi matalolole conto sira. Neu' ko Manetualain fee o bubulu' basa sira.
8 Afi matalolole neu' Yesus Kristus. Ria nana, mane' Daud tititi-nonosin. Ana mate, tehuu Manetualain fee Ni nasoda selu'. Dedea' ria dadi neu' Tutui Malole fo au uu tui-bekan nai basa mamana' ain. 9 Huu no au tui-beka Tutui Malole ria, de au hapu doidoso leo ia'. Lena-lena' bali ara heke au reni' rante, sama leo' au lahenda tadalu'. Leo mae leo' naa, tehuu ta bisa heke Manetualain Hara-dasin. 10 De au sadia lepa doidoso rupa'. Sadi Manetualain lahenda teteka-hehere nara bisa hapu soda' mana basa taa'. Neu' ko Manetualain so'u nadedema si la'o naroo, nana huu ara dadi Yesus Kristus lahenda nara. 11 Dedea-nafada' ia ra mema' tetebes ara:
“Kalu ita sipo' tae, Kristus mate kati ita, ria sama leo' ita boe mate la'o ela masoda paraa' a,
fo tasoda sama-sama to Ni.
12 Kalu ita tanenete nai doidoso a sama leo' Kristus,
ita boe tatuu' hopu pareta sama-sama to Ni.
Tehuu kalu ita talena Ni,
Ria boe nalena natafali' ita.a
13 Leo mae ita ta dite-tama too Ni,
Ana dite-tama no ita losa doo na neu,
Ana ta bisa dedea fufudi'. Hata fo ri' Ana dedea ni, neu' ko Ana tao natetun.”
Lahenda mananoi-manatao fo Manetualain io si
14 Mafarerene' fee lahenda kamahere' ara, ela boso' rafarene heni basa hihii-nanau' ia ra. Madenu neni' Manetualain nade Na, ela ara hahae rasisipo bafa' la'e-neu' dedea' a sosoa na. Huu fo basa sira sosoa-raraa taa'. Ada' ralutu lahenda mamanene ra dudu'a-aafi nara. 15 Makate moi-tao ela hapu i'io neme Manetualain. Lahenda leo naa' ara ta parluu mae', nana huu tao natetu ria nonoi-laka na no malole. O muste dadi lahenda mana manori-mafada Manetualain Hara-dasin no roo-tetu'. Huu fo Hara-dasi' ria tebe! 16 Doo' a neme dedea' fo ta nanuu huu-peda', ma neme dedea-nafada fo ta neni hada-horomata neu' Manetualain. Dedea-nafada leo naa' a tao na lahenda boe-boe tao tadalu'. 17 Dedea-nafada tadalu nara ralalaba sama leo' diopado'. Himeneus no Filetus dedea nara leo naa'! 18 Dua si ranori-rafada sala rae, basa lahenda mana mate' ara rasoda selu' so. Tehuu ta tebe leo' naa! No ria naa, ara heo doo' a reme eno roo-tetu' a. Hata fo ri' ara ranori-rafada ni, tao ralutu lahenda ruma namahere nara.
19 Tehuu tutuu-tetende' fo ri' Manetualain nafoan a, ta natakeko. Nai tutuu-tetende' ria mana dui' nae, “Ramatua' a nalela' Ria lahenda Nara”, ma “Lahenda fo do'o-tabe Manetualain, ana muste doo' a neme tadalu' a mai.” Tutuu-tetende' ria, nana ri' Manetualain lahenda Nara.b
20-21 Nai lahenda kamasu'i ara uma nara dale' hapu hata-heto rupa'. Ruma tao si reme lilo pilas ma lilo fula'. Tehuu ruma tao si reme ai ma dae pilas. Hata-heto malole ra, manuu uma' a namaho'o pake si rai feta-dote bau-ina'. Tehuu hata-heto bale-bale fai', manuu uma' a mae' pake si rai lahenda matan. Leo' naa boe lahenda ra. Kalu bea nadoo' ao na neme tadalu' a mai, ana sama leo' hata-heto malole ra. Mauma' a nahii' pake ni, nana huu nanuu sosoa-raraa' fo tao nonoi-tatao malole rupa'.
22 Lahenda muri-ana' ara, muda' laesa' nana hiki', nana huu tuka hihii-nanau ao-paa'. Tehuu Timotius, o muste manea matalolole ao ma, fo boso' tuka hihii-nanau ao-paa leo naa' a. Tuka-saka mahere nonoi-tatao malole. Mamahere maroo Ramatua' a. Masoda no nasue-nalai ao' ma mole-dame mo basa lahenda ra. Basa lahenda fo ramahere neu' Ramatua' a ma rasoda no dale malalao-malalafu', ara rahii' tao malole la'o naroo. De Timotius! O muste masoda sama leo' sira! 23 Au afada selu' bali! Boso' masisipo bafa' neu' dedea' fo ta nanuu huu-peda'. Basa sira tao fee lahenda rahuu-ralena. 24 Lahenda fo roi-tao fee Ramatua' a, ta naraa rahuu-ralena'. Ara muste balaroe-balanau ro basa lahenda, ranori-rafada ralela' lahenda, ma sabar neu' lahenda mana saka dedea laka' ara. 25 Ara muste ranori-rafada lahenda fo ri' soa' asa, no balaroe-balanau'. No ria naa, Manetualain bisa tao nabeu dale nara, losa saledale-tu'etei nara, ela sipo hata roo-tetu' a. 26 No ria naa, dudu'a-aafi nara ramaneu selu', de po'i ra ao nara reme nitu ra malakan fo ri' ana heke-pa'a naa si, ela tuka ria hihii-nanaun.