Au, Paulus, au alosa' haraoe soda-mole' ia neu' o. Manetualain so'u au dadi Yesus Kristus lahenda nadedenun. Ita tamahena neu' Ramatua Yesus Manatulu-manafali, nana huu Manetualain ita Manasoi-manatefa na.

Timotius! O sama leo' au ana boki ka, nana huu au atudu eno' fo o mamahere Kristus. Au hule-haradoi neu' Manetualain ita Aman, ma Yesus Kristus ita Ramatuan, fo Ara sue-lai ma ratudu dale malole nara neu' o, ma bati fee o masoda no tetu-tema', mole-dame ma tesatei-tamadale'.^a

3 Fai maneu' ara ita dua sama-sama nai kota Efesus. Fai fo au nau leo propensi Makedonia uu, au atutulu' o leo nai Efesus. Fai ria, hapu lahenda ruma tao ramakoa jama'at ara reni' nanori-nafada pepeko'. De au hule o muu masa'ai si, fo ara boso' ranori-rafada raroo leo' naa. 4 Ara tutu'u sira ledo-fain, ma rasisipo bafa' neu' tutui fai ulu' pepeko'. Sira boe rasesefi bafa' la'e-neu' leo ra tititi-nonosi nara boe. Hihii-nanau' rupa leo naa' ara, tao fee lahenda rahuu-ralena ma ta rasoda no namahere' neu' Manetualain.

5 Au fee nanori-nafada' neu' o fo manori-mafada lahenda kamahere' ara ela rasoda no nasue-nalai ao'. Ara rasoda leo naa' kalu dale nara malole, dudu'a-aafi nara roo-tetu' ma ramahere no dale katematua.

6 Mesen ruma heo doo' a reu ma tu'u-kari heni nanori-nafada' ria. Sira boe tutu'u ledo-fai, fo reu rasisipo bafa' ma dedea ratotofa'. 7 Ara ratudu ao nara rae, sira nana mesen fo ranori-nafada ba'i Musa hohoro-lalane nara. Ara tao ao nara sama leo' mesen bau-ina', tehuu ara ta bubulu' hata fo ara ranori-rafadan.

8 Ita basa bubulu' ba'i Musa Hohoro-lalanen katema' nana malole! Sadi ita talala'o asa tuka Manetualain hihii-nanaun. 9 Manetualain ta fee hohoro-lalane' sira neu' lahenda fo rasoda no roo-tetu'. Tehuu Ana fee neu' lahenda madedea laka' fo ri' ta nau ramanene pareta, masoda nara doo' a reme Manetualain, rahii' tao tadalu', ta tao dale' neu' Manetualain, mana madadae hihii-nanau' malalao-malalafu', mana kanisa', mana maisa ina-ama boki', 10 mana hohoke, tou' sao tou', mana homu lahenda fo se'o ela feen dadi ata, mapuputa', mana sakasii pepeko', ma sudi bea fo tao basa hihii-nanau' nalena-laka' neu' nanori-nafada matetu' a. 11 Nanori-nafada matetu' a ri' neme Tutui Malole fo Manetualain fee neu' au. Manetualain marela-masa'a. Naraa na, lahenda so'u radedema Ni.

12 Au hule makasi dodou' neu' ita Ramatuan Yesus Kristus, nana huu here na au dadi Ria lahenda kamaheren, ma fee au mapii-bara'ai', losa au bisa alala'o Ria nonoi-tataon. 13-14 Sekonaa te fai maneu' ara, au ahii' dedea amumulu-amamae' Yesus, ma tao doidoso lahenda fo ri' tuka Ria eno masoda Na. Au ahii' ese-rumu ma tao alulutu si. Au tadalu leo naa', nana huu tepo' ria au ta bubulu' hata fo au taon, ma bei ta amahere ita Ramatuan Yesus Kristus. Tehuu Ana ta nafarene heni au ma natudu susue-lalain neu' au.^b Lena-lena' bali, Ana natudu naroo dale malole Na neu' au! Ana fee au babati-papala' manano'u-manadai', ela amahere tebe-tebe neu' Ana, ma bisa sue-lai lahenda ra sama leo' Ana sue-lai au.

15 Dedea' ia tebe, de ita tamahere matetu' tae, “Yesus Kristus onda nai dae-bafo' ia, ela po'i-tata lahenda masala-masiko' ara.” Neme basa lahenda mana tao sala' ara, au ri' tadalu lena. 16 Leo mae au tadalu' leo' naa, tehuu Manetualain naetu' ta huku au. Ana nau pake au dadi conto ela atudu Yesus Kristus dale sabar Na neu' lahenda fo tadalu' naan seli sama leo' au. No ria naa lahenda feke' fo ri' tao sala-siko', sira boe bisa ramahere Ni, ela ara hapu soda' mana basa taa'.

18 Timotius au ana dale malole ka! Nonoi-laka' ia au feen neu' o, de muste malala'o ana, natetu na maulu na Manetualain mana nesi mata nara rafada a. Kalu o tuka basa dedea-nafada' sira no malole, o dadi sama leo' soldadu esa bisa natati nalela' soa' basa tadalu' ara. 19 Mamahere maroo Kristus. Manea o dale ma ela malalao-malalafu' losa doo na neu. Lahenda ruma ta nau ramanene neu' dale ana boboko nara, losa' tao nalulutu' sira namahere nara, sama leo' ofa' a nalulutu' nana huu hara nai tete' lain. 20 Himeneus no Aleksander, leo naa'! De au heo heni si reme lahenda kamahere' ara, sama leo' fee heni si leo nitu ra malaka na reu. Au tao leo naa', nana ela dadi nanori-nafada' esa, ela boso' ramumulu-ramamae' Manetualain bali.