La'e-neu' ata a no malaka na
6
Malaka ruma ata nara ramahere Ramatua Yesus, sira muste fee hada-horomata neu' malaka na, ela lahenda dea ra ta hapu eno' fo dedea ramumulu-ramamae' Manetualain, ma ta radadae ita nanori-nafadan.2a Ata ruma malaka na namahere Ramatua Yesus, sona ata ra ta bole radadae sira malaka na, nana huu ana namahere Ramatua Yesus. Ara muste ralalau' malaka na malole lena, nana huu sira sama-sama lahenda kamahere', de muste rasue-ralai ao.
Nanori-nafada' fo sala ma seseba malole
2b Timotius! Manori-mafada jama'at ara basa ia ra ma fufu'a-aali si, ela tao tuka basa sira. 3 Ita nanori-nafada roo-tetu na dadi nete' fo tao tuka Manetualain hihii-nanaun. Lahenda bea nanori-nafada feke' neme ia mai, sona ana ta sipo' Ramatua Yesus Kristus nanori-nafada roo-tetu Na. 4 Lahenda rupa leo naa' a, koao na seli, tehuu pakanaa na seli! Ria hedi na ri', saka noi dedea laka' nalelena ao'. Basa sira reni ete ao', nahuu-nalena', namumulu-namamae' ma napaneneo'. 5 Lahenda rupa leo naa', ta basa aadu-tatao musu-nasa'. Dudu'a-aafi nara tadalu'. Ara ta bubulu' malole na ri' ubea'. Ara afi rae, kalu sira makate la'e-neu' agama, sona bisa ramasu'i.
6 Mema' kalu ita leleo-lala'on tao la'e Manetualain dale Na, sona bisa neni fee ita oonto bau-ina'.
7 Mafarene matalolole! Tepo' fo boki ita, ta teni hata esa leo dae-bafo' ia mai boe'. Ma fai fo ita mate, ta teni hata esa kalua neme dae-bafo' ia mai boe'. 8 De sadi hapu nanaa' ma kakao-papake', sona dai so!
9 Tehuu lahenda fo rahii' ramasu'i, sona tuda rala sosoba rupa' ara dale', ma hapu duduku-papau' ii-ona', nana huu ara du'a-afi noi hata-heto. Basa sira reni soe, ma tao ralulutu' sira masodan. 10 Huu fo basa tadalu rupa' huu-okan nana ri' neme dale noi doi-tali. Lahenda ruma usi noi doi-tali, losa ara heo reme namahere matetu' a. No ria naa, ara tao ralulutu' selu' sira masodan.
Homu mahere nanori-nafada' fo ri' o sipo
11 Timotius! O nana Manetualain nuu-enan. De doo' a meme basa tadalu' ara mai. Masoda lalao-lalafu', tao mamaho'o Manetualain dale Na nai basa hihii-nanau', mamahere maroo Yesus Kristus, sue-lai basa lahenda, manenete nai susa-lela ma balaroe-balanau mo basa lahenda. 12 Malala'o tebe-tebe basa nanori-nafada' fo ita tamahere. Manetualain fee o soda' mana basa taa', de boso' tu'u-karin. Ma o mafada namahere ma nai lahenda matan. 13-14 Besa' ia au hule o tao hehelu leo ia': tao tuka Ramatua Yesus pareta Na katema'. Boso' malena-laka pareta esa boe, ela lahenda ta hapu o sala ma. Tao tuka basa sira no matetu', losa' fai fo ita Ramatuan Yesus Kristus natafali mai. Au hule o helu leo naa' nai Manetualain matan. Ria ri' fee ani hahae' neu' basa-basan. Ma au hule o helu leo naa' nai Yesus Kristus matan. Ria ri' tui neu' loan nai gubernor Pontius Pilatus matan.a
15 Ramatua Yesus marela-masa'a, Ria ri' homu kuasa!
Ria, Mane' Bau-ina' neme basa mane' ara.
Ma Ria, Malaka Bau-ina' neme basa malaka ra.
Naraa no ledo-fain,
Manetualain neu' ko tao makaledo hihii-nanau' ia ra.
16 Noi Ria ri' ta mopo-mate.
Ana nasoda nai makaledo' a dale', fo lahenda dae-bafo' ta bisa relu Ni.
Ta hapu lahenda esa bisa nita Ni.
Basa-basan fee hada-horomata neu' Ana.
Basa kuasa a lala'en nai Ria lima Na losa' doo na neu!
Noi ri naa' so! Amin!
La'e-neu' lahenda kamasu'i ara
17 Mafarerene' fee lahenda kamasu'i rai dae-bafo' a, fo ara boso' koao ma boso' ramahena neu' sira hata-heto nara. Huu fo hata-heto sira neu' ko sapu-lalo. Malole lena' ara ramahena neu' Manetualain masoda'. Huu fo Ria ri' bati-pala fee ita basa-basan no namano'u-namadai', ela namaho'o-natadale' nai ita dalen. 18 Mafarerene' fee si ela ara tao malole. Ma tulu-fali lahenda no namano'u-namadai' neme ua-nale' fo ri' Manetualain fee si. 19 No ria naa ara rabubua hata-heto fo neu' ko dadi nete' soa-neu' soda' fai mana mai' nai nusatetu-ikutema'.
Paulus dui' nate'e susura na
20 Timotius! Manea matalolole basa-basan fo ri' Manetualain peda si rai o lima dale ma. Doo' a meme dedea nakaroroko' sosoa-raraa taa'. Boso' malelena ao' la'e-neu' hihii-nanau' fo ta neni hada-horomata neu' Manetualain. Mafarerene'! Lahenda ruma tao ao nara reu' lahenda malela'. Sekonaa te sira ‘malela na’ nete' ta'a. 21 Huu fo lahenda ruma ramahere nanori-nafada napuputa' ara, losa heo reme namahere' a mai.
Au hule fo Manetualain natudu dale malole Na neu' emi basa.
Soda-mole',
Paulus