3-5 Jama'at ara muste tulu-fali ina-falu fo ta ranuu kileo-boboki', ela rahao-rafati si. Tehuu ina-falu fo bei nanuu upu-ana, sona sira muste rahao-rafati ni. Manori-mafada si, fo balas ria memela-mamakun neu' asa. No ria naa ara ralalau' Manetualain, ma tao ramaho'o dale Na. Tehuu ina-falu fo tebe-tebe nasoda mesa' ana, ta nanuu lahenda esa boe' ela rahao-rafati ni. Ana namahena noi' neu' Manetualain. Hatu-leledon ana hule-haradoi hule tutulu-fafali' neu' Manetualain. De jama'at ara muste rahao-rafati ina-falu rupa leo naa' ara.

6 Tehuu ina-falu fo nahii' nasoda noi nai hihi'a-setelee' a, leo mae ana bei nasoda, tehuu masoda na beli' ta'a sama leo' lahenda mana mate' a.

7 Mafarerene' fee jama'at ara basa hihii-nanau' ia ra, ela lahenda feke' ara ta bisa dedea ramumulu sira nade malolen.

8 Huu fo kalu lahenda ta nau rahao-rafati sira kileo-boboki nara, lena-lena' uma isi nara, sona sama leo' ana nalena namahere na. Ria tadalu lena lahenda fo ta nalela' Manetualain.

9 Kalu so'u ina-falu fo tulu-fali mauli-malaka jama'at ara, eno na leo ia': teu nara ta bole kurang neme nee hulu; maulu na ana dite-tama no noi sao tou' esa' a; 10 lahenda ralela' ana noi-tao malole, leo-leo': nahao-nafati ana nara no malole; nalalau' lahenda feke' ara; tulu-fali lahenda kamahere' ara losa nonoi-tatao lulutu-rarae; tulu-fali lahenda nai susa-lela a; ma ana sadia tulu-fali nai basa hihii-nanau' malole.

11 Boso' so'u ina-falu bei muri-ana' fo tulu-fali nai jama'at ara. Boso' losa rahii sasao boe ma ara sao selu', sona ara ta hapu lela' fo ralalau' jama'at ara no malole so'. 12 Kalu sira ledo-fain ta'a fo ralalau' jama'at ara, sona sama leo' tao ralutu hehelu nara nai Manetualain matan. Neu' ko lahenda sale si. 13 Boso' losa ara mulai aomata', boe ma ara rapue maso-kalua lahenda uma nara, ratui' dedea mana dadi taa', losa dedea ramumulu lahenda naden. Ma tadalu lena bali, rahii' sososo' leo lahenda feke' a urusan, ma dedea ta la'e eno na. 14 Malole lena' ina-falu fo bei muri-ana' ara sao selu', ela ara boki ma urus uma-loo nara. No ria naa lahenda fo musu roo ita, ta hapu eno' fo dedea ramumulu ita nade na. 15 Ina-falu muri-ana' ruma la'o sala eno' a, losa' ara tuka nitu ra malaka na eno-dalan.

16 Kalu ina kamahere' fo kileo-boboki ni esa dadi ina-falu, sona ina kamahere' ria muste tulu-fali ina-falu ria. Boso' rataa' jama'at ara rahao-rafati ni, ela ara bisa tulu-fali ina-falu feke' fo tebe-tebe ta ranuu toranoo' esa boe'.

17 Emi muste fee hada-horomata neu' mauli-malaka jama'at ara, ma bae matetu kadi nara. Lena-lena' mauli-malaka sarani' fo tui-beka fee lahenda kamahere' ara Manetualain Hara-dasin, ma ranori-rafada emi. 18 Manetualain Susura Makamoi Na nae, “Kalu pake sapi a aai hade ela ono heni deke na, sona boso' rapa maisa' bafa na, ela ana bisa naa boe.” Ma mana dui' bali nae, “Bea noi-tao, sona ana naraa hapu kadi.”^a

19 Kalu bea kolaa' mauli-malaka jama'at, sona boso' o sipo'! Muste sakasii dua do telu tutui nara sama, besa' ko o sipo' fo parisa' ana.^b 20 Kalu masa'ain so, tehuu ana bei nasoda tuka naroo sala' ria, sona masa'ain nai jama'at ara matan, ela lahenda feke' ara bii, de ta tao sala'.

21 Malala'o basa eno' ia ra nai jama'at ara, ma boso' mete mata' ma ta nabenu'. Au fua fee o nonoi-laka' ia nai Manetualain no Yesus Kristus matan. Manetualain eila'o-limalope teteka-hehere nara boe sakasii!

22 Boso' haelai so'u lahenda dadi mauli-malaka. Teteni matalolole ni dei. Kalu so'u sudi la'e lahenda bea, boe ma ana tao sala', sona emi boe lepa-masaa maan nana huu ria nonoi-tataon. Manea matalolole ao ma ela lalao-lalafu' naroo.

23 Au amanene rae, o tei ma napode naroo, de boso' minu oe hihii'. Malole lena', mulai besa' ia o epo' anggor bai' neu' oe dei minu.

24 Lahenda ruma bei ta losa mana ee dedea' ara matan fo parisa' asa boe', tehuu mete feke' sala nara. Tehuu lahenda feke' ara bali sona basa ria dei, besa' ko lahenda bubulu' sala nara. 25 Leo' naa boe nonoi-tatao malole ruma nananita' mema'. Ma nonoi-tatao malole ruma nafuni', tehuu losa bea boe neu' ko nananita'. Huu fo hihii-nanau' malolole ta bisa nafuni'.