2 Tesalonika
Paulus susura kadua na
fee jama'at rai kota Tesalonika
Soda-mole'
1
Au, Paulus ma nonoo kara Silas no Timotius, ami malosa' haraoe soda-mole' neu' emi.Ami haitua susura' ia fee emi jama'at nai kota Tesalonika. Emi ri' here ao mara tuka Manetualain, ita Aman, ma Yesus Kristus, ita Ramatua Na.a 2 Ami hule fo Ara ratudu dale malole nara reu' emi, ela emi bisa masoda no tetu-tema', mole-dame ma tesatei-tamadale'.
Paulus hule makasi neu' Manetualain
3 Toranoo kara emin! Naraa ami hule makasi la'o naroo neu' Manetualain, huu no emi boe-boe mamahere Ni ma emi tamba masue-malai ao. 4 Huu ria naa, ami tui Manetualain jama'at nara rai basa mamana' ara la'e-neu' emi. Ami tui mae, emi manenete maroo nai namahere mara dale', leo mae lahenda feke' ara ese-rumu rasususa' emi.
5 Basa ia ra ratudu rae, neu' ko Manetualain naetu' emi dedea mara no matetu'. Doidoso fo besa' ia emi lepa-masaa, tao na emi maraa dadi Ria lahendan. Ria ri' emi Mane' ma. 6 Boso' bii, huu fo Manetualain tuka roo na. Meten! Neu' ko, Ana balas lahenda fo ri' tao doidoso emi. 7 Ma Ana fee emi hahae meme' doidoso' fo ri' emi lepa-masaa. Ana tao leo naa' fee ami boe.
Neu' ko basa ia ra dadi, tepo' fo Ramatua Yesus onda mai sama-sama no eila'o-limalope kahere' ara reme nusatetu-ikutema' a. 8 Ara onda mai ro ai-pila' bau-ina'. Ana balas lahenda bea fo ta nalela' Manetualain, ma ta nau tuka Ramatua Yesus Tutui Malole Na. 9 Ana fee huhuku mabera neu' basa si, losa' ralulutu' losa doo na neu. Ana usi heni si reme' mata Na mai, de ara ta rameda rita Ria kuasa marela-masa'a Na.b 10 Tepo' fo Ana mai, basa lahenda kamahere' ara, so'u radedema nade Na ma fee hada-horomata neu' Ana. Neu' ko emi boe nai lahenda kamahere' ara talada, nana huu emi sipo' ma Tutui Malole fo fai maneu' ara ami tui-bekan neu' emi a.
11 Huu ria naa, ami hule-haradoi fee emi la'o naroo, ela Manetualain tao emi meu' lahenda fo raadale'-to'etei'. Ami boe hule fo Ana fee kuasa Na neu' emi, ela bisa tao basa hihii-nanau' malole, tuka hata fo emi maetu' nau tao ni, ma hata fo emi mamahere. 12 Kalu emi masoda tuka eno' ria, neu' ko lahenda ra so'u radedema Ramatua Yesus Nade Na. Ma emi boe hapu i'io', nana huu emi tuka Ni. Basa ia ra neu' ko dadi, nana huu ita Aman Manetualain ma ita Ramatuan Yesus Kristus dale malole Nara.