Besa-besa mo lahenda fo nanori-nafada lalala' fee jama'at ara
4
Tehuu Manetualain Dula-dale Na nafada ledo-ledo nae, neu' ko jama'at ruma ta sipo' hata fo ita tamaheren. Boe ma tuka nitu ra nanori-nafadan fo tipu-dai ra lahenda heo reme' roo-tetu' a mai. 2 Lahenda fo nanori-nafada leo naa', ria nana masarole-masarali'. Sira mema' lahenda mapuputa'! De tao rapoke dale ana boboko nara. 3 Ara ranori-rafada lahenda fo boso' sao. Sira boe raluli nanaa rupa' ara. Sekonaa te, Manetualain adu basa nanaa' fo lahenda kamahere' ara raa ma hule makasi neu' Ana, huu fo ara bubulu' nanori-nafada roo-tetu' a. 4 Basa-basan fo Manetualain adu a tebe malole. De boso' maluli rupa' ara! Lahenda muste sipo' ma hule makasi neu' Manetualain. 5 Huu fo Manetualain Hara-dasin ma ita huhule-haradoin tao na basa sira dadi lalao-lalafu'.Ramatua Yesus ata malolen
6 Timotius! Mafarerene' fee ita toranoo kamahere nara basa hihii-nanau' ia ra. Kalu o tao leo naa', sona o dadi Yesus Kristus ata malolen. Manetualain Hara-dasin tao na o mamahere Ni, ma fee o bubulu' nanori-nafada' bea ri' roo-tetu'. O homu mahere Manetualain Hara-dasin sama leo' nanaa-nininu', de neni fee o mapii-bara'ai'. 7 Boso' tutu'u ledo-fai no tutui mana dadi taa', fo ta natuti-nanato' no Manetualain. Boso' tao aafi' neu' sira tutui luli rupa nara. Malole lena' tao bara'ai ao-ina ma ela masoda tuka Manetualain hihii-nanaun nai basa hihii-nanau' dale'.
8 Lati ao-ina' a ela bara'ai' a, sona malole.
Tehuu ria sosoa-raraan noi baiana'.
Tehuu lati ao-ina' a fo tuka Manetualain hihii-nanaun nai basa hihii-nanau' dale',
ria sosoa-raraan dodou'.
Sosoa-raraa' ria,
ta noi nai masoda' besa' ia,
tehuu neu' ko nai masoda mana mai a boe.
9 Dedea-nafada' ia ra tebe! De pedan neu' dale ma, ela boso' mafarene henin. 10 Ita tamahena neu' Manetualain masoda' a. Ria ri' Manasoi-manatefa soa-neu' basa lahenda ra, lena-lena' soa-neu' ita fo sipo' ma tamahere Ni. Huu ria naa, ita toi-tao tahere no basa bebe'i-bara'ai'.
11 Manori-mafada katema' ia ra. Ma madenu lahenda ra tuka nanori-nafada' sira. 12 Boso' mataa' lahenda raua-raai o, nana huu o bei muri-ana'. Matudu eno malole neu' lahenda kamahere' ara, ela ara tuka o dedea-nafadam, leleo-lala'om, dale susue-lalaim neu' lahenda, namahehere ma neu' Yesus Kristus, ma masoda lalao-lalafum. 13 Tepo' fo emi mahani au mamai ka, sona boso' mafarene henin fo lees Manetualain Hara-dasin neu' lahenda kamahere' ara. Matetea dale nara ma manori-mafada matalolole si.
14 Malala'o matalolole babati-papala' fo Manetualain fee de o sipon tepo' fo mauli-malaka jama'at ara hule-haradoi, ma fua lima nara reu' o laka ma. Fai ria sira boe rafada Manetualain hehelu Na la'e-neu' o masodam, ma o nonoi-tataom. De boso' mapo'i babati-papala' fo ri' o hapu a. 15 Malala'o basa hihii-nanau' sira no makate'! Ela basa lahenda rita o masodam ma nonoi-tataom la'o mata'. 16 Manea-masala'e ao-ina ma ela masoda no roo-tetu'. Ma manea-masala'e nanori-nafada matetu' a. Huu fo kalu o mahere nai basa sira dale', sona neu' ko soi ma aom meme sala-siko' a, de hapu soda' mana basa taa' sama-sama mo basa lahenda fo ri' ramanene neu' o.