Atoran soa-neu' lahenda fo dadi mauli-malaka jama'at
3
Mema' tebe lahenda rae, “Lahenda fo nau dadi mauli-malaka jama'at, sona sosoa na nae, ana here na nonoi-tatao' esa malole na seli.” 2 Mauli-malaka jama'at masoda na muste leo ia': hada-pariin malole ma dite-tama no noi sao ina' esa' a. Nanea nala ao na. Ma dale na balaroe-balanau'. Lahenda hada' ana. Uma na lelesun mana soi' soa-neu' fui ra. Ma ana nabe'i nanori-nafada lahenda feke'. 3 Boso' mana mafu', boso' baunasa. Lahenda fo naraa, nana ri' lahenda fo nanuu dale susue-lalai', nahii' noi mole-dame, ma ta mana naa lena-mata'. 4 Ana muste ator uma-loon no malole. Ana nara muste hada-horomatan ma ramanene neu' ana. 5 Kalu ana ta bisa ator nala uma-loon, sona tao leo' bea fo ana bisa ator Manetualain jama'at nara?6 Malole lena' here lahenda fo namahere na natea nai Kristus dale'. Boso' so'u mauli-malaka jama'at neme lahenda fo besa' ko namahere Ramatua Yesus, ela ana boso' koao. Boso' losa Ramatua' a hukun sama leo' Ana huku nitu ra malakan. 7 Here lahenda hada-parii malole. No eno' ria ana ta mae' hata-hata esa boe'. Ma nitu ra malaka na ta bisa ratuda ni.a
Lahenda fo tulu-fali mauli-malaka jama'at
8 Leo' naa boe, neu' lahenda manatulu-manafali mauli-malaka jama'at ara. Sira muste lahenda hada-parii malole, ta maa masarali', ta mana mafu', ma boso' mana tendetuu'. 9 Dale nara muste lalao-lalafu' ma ara muste homu rahere Manetualain nanori-nafadan fo ri' natudun neu' ita lahenda kamahere' ara. 10 Parisa' matalolole masoda nara, ma nonoi-tatao nara. Kalu lahenda sala' ta'a, sona besa' ko so'u si tulu-fali mauli-malaka jama'at ara.
11 Leo' naa boe neu' sira sao ina nara.b Muste ina' fo hada-pariin malole. Boso' sosoa nara noi dedea ramumulu lahenda naden. Muste ranea ralela' ao nara, ma lahenda bisa ramahere si.
12 Manatulu-manafali mauli-malaka jama'at ara boe muste tou' fo dite-tama no noi sao ina' esa' a. Sira boe muste ator ralela' uma-loo ma ana nara. 13 Kalu ara ralalau' jama'at ara no malole, sona tantu lahenda boe-boe hada' asa. Ma ara boe-boe raparani, ta bii' dedea la'e-neu' sira namahere na neu' Yesus Kristus.
Ita namahere na huu-pedan
14-15 Timotius! Au amahehena' ta doo' a so' te au bisa mai dama o. Kalu au pute-ai fo ababako', sona susura' ia losa naulu' o lima ma. Au dui' ia fo afada o ae, Manetualain kileo-boboki nara masodan muste leo bea'. Boso' mafarene henin, te Manetualain masoda' losa doo na neu. Ma lahenda nara sama leo' uma esa batu tutuu-tetende' ma dii toka' matea fo doru' nahere Manetualain nanori-nafada roo-tetu Na.
16 Manetualain natudu hata nino kahere' neme ita namahere na. Leo ia':
Kristus mai nai dae-bafo' a,
pake ita lahenda dae-bafo' a rupa-lolen.
Manetualain Dula-dale Na boe natudu nae,
Yesus nana tebe-tebe Manetualain Anan.
Manetualain eila'o-limalopen rai nusatetu-ikutema' a rita Ni boe.
Manetualain nahene-naae' Ana leo nusatetu-ikutema' a neu,
ma so'u nadedema Ni.
Basa lahenda nusa' ara ramanene Tutui Na.
Nai basa mamana' nai dae-bafo' a lahenda ramahere Ni.
Ita namahere na leo naa'!