Kalu lahenda kamahere' ara rabua, sona ita muste tao leo bea'?
2
Masososa na, au hule emi hule-haradoi fee basa lahenda ra. Emi meu mataa Manetualain, sona hule Ni tulu-fali basa lahenda fo ri' rai susa-lela a. Ma hule makasi, huu fo Ana tao malole neu' sira basa. 2 Hule-haradoi leo naa' boe, fee mane' ara ma basa lahenda mana homu pareta. No ria naa, ita basa tasoda no tesatei-tamadale' ma mole-dame tuka Manetualain hihii-nanaun, masoda raa-la'e soa-neu' lahenda fo do'o-tabe Ni. 3 Huhule-haradoi rupa leo naa' a tao la'e Manetualain Manasoi-manatefa dale Na. 4 Ana nau po'i-tata na lahenda masala-masiko', ela ara hapu soda' mana basa taa', ma bubulu' hihii-nanau' bea ri' matetu'. Leo ia':5 Manetualain noi esa'.
Ma noi lelete esa' a neni fee ita lahenda dae-bafo' a mole-dame to Manetualain. Lelete ria ri' Yesus Kristus.
Yesus, Lahenda Tetea'.
6 Ana fee ao-ina Na, ela soi-tefa na ita basa teme sala-siko' ara mai, de ta hapu huhuku'.
Naraa no ledo-fai na, Manetualain soi Tutui Malole ria neu' loa na, fo nafada basa lahenda ra. 7 Boe ma Ana here na au dadi Ria lahenda nadedenun, ela au uu afada lahenda fo ta Yahudi nai basa mamana' ain, ma anori-afada si ela ramahere Ramatua Yesus ma rasoda tuka eno roo-tetu' a. Hata fo au afadan a, nana tebe leo' naa. Au ta dedea fufudi'.a
8 Au hihii-nanau ki leo ia': nai mamana' bea-bea oo, kalu emi mabua fo hule-haradoi, sona emi dale mara muste malole esa no esa. Boso' mamananasa ao'. Boso' mareresi'. Kalu emi so'u lima mara fo hule-haradoi, sona emi dale mara muste malalao-malalafu' dei.
9-10 Leo' naa boe soa-neu' ina' ara, Au nau sira kao-pake no hada', ela naraa nai lahenda matan. Boso' kao-pake seli uuku', ralane rupa laka-doo nara, pake bua-loas mabeli, pake lilo-henu, ma mutiara fo tao fee lahenda mete rasuu tino' asa. Hata fo tao na ina' ara napu' mesan, nana ri', malalao-malalafu' ma hada-parii malole. Ria ri' naraa soa-neu' ina' fo do'o-tabe Manetualain.b 11 Kalu jama'at ara rabua ela ramanene nanori-nafada', sona ina' ara tuka atoran fo nenene ratalolole nanori-nafada' ria. Boso' raboboto' ma tao isu-ote'. 12 Tuka au, sona ina' ara ta naraa so'u-fua ao nara pareta tou' ara ma ranori-rafada si. Malole lena' ina' ara nenee'. 13 Huu fo Manetualain adu naulu' Adam. Basa ria besa' ko Hawa.c 14 Ma nitu ra malaka na ta edi-fule naulu' Adam, tehuu ina' a dei. Mulai neme fai ria mai, lahenda dae-bafo' a nalena-laka neu' Manetualain atoran na.d 15 Huu fo leo mae leo' naa boe, ina' ara bisa hapu popo'i-tatata', nana huu ara boki-lae. Sadi ara ramahere tebe-tebe Kristus, rasue-ralai ao, rasoda no dale lalao-lalafu' ma rasoda roo-tetu'.e