Paulus hule jama'at rai kota Tesalonika hule-haradoi fee si
3
Toranoo kara emin! Boso' mafarene henin, hule-haradoi fee ami. Hule-haradoi fo ela lahenda fo sudi rai bea lai-lai ramanene Ramatua' a Tutui Malole Na ma fee hada-horomata neu' Tutui Malole ria, sama leo' tepo' fo emi sipo Tutui Malole ria. 2 Ma hule-haradoi boe, ela ami po'i meme' mana tao kaco ra, ma lahenda tadalu feke' ara, huu fo ta basa lahenda ra ramahere Tutui Malole ria.3 Tehuu Ramatua' a hopu nahere dedea-nafadan. De Ana bisa natetea emi dale mara, ma nanea emi neme tadalu' ara mai. 4 Ami boe mamahere mae, Ramatua Yesus neu' ko nafofoa emi dale mara, losa emi tuka hata fo ami mafadan neu' emi. Ma neu' ko emi tao leo naa' losa doo na neu.
5 Ami mamahena Ramatua Yesus napipipi-nalala'o emi, ela boe-boe malela' mae, Manetualain sue-lai emi. Ma malela' mae, emi bisa manenete nai doidoso dale', sama leo' fai maulu' a Kristus nanenete nai doidoso Na dale'.
Basa lahenda ra muste roi nonoi', boso' aomata'
6 Toranoo kara emin! Au afada mema' emi pake Ramatua Yesus Kristus kuasa Na. Boso' mabua mo lahenda kamahere aomata' ara, huu fo ara ta tuka conto neme ami nonoi-tataom. 7 Emi basa bubulu' mae, emi muste hai conto tuka ami leleo-lala'o mara, tepo' fo ami bei leo mo emi a. Ami ta tutu'u hihii' ledo-fai esa boe'. Emi mita mata'. 8 Ami moi-tao sota maan seli hatu-leledon, ela ami boso' tao maheta emi. Ami boe ta parnaa sipo hihii' lahenda nanaa-nininun. 9 Ami nana, Ramatua' a lahenda mana noi nara. De ami manuu haak, hule sudi hata ubea' neme' emi mai. Tehuu ami ta nau pake haak ria. Ami mae tao nonoi-tatao malole ela emi tao tuka. 10 Fai maneu' ara ami foa ela hohoro-lalane' neu' emi nae, “Bea ta noi nonoi', sona ta bole naa-ninu.”
11 Ami hapu haraoe' rae, ruma reme emi mai soa noi rorolo dae a, ta nau roi nonoi'. Sosoa nara noi sososo' leo lahenda uman dale' reu. 12 Lahenda rupa leo naa' ara, ami fee si nafarerene' pake Ramatua Yesus Kristus kuasa Na, ela ara hahae rorolo dae a. Malole lena', ara mulai roi nonoi', fo saka nanaa' reni' sira puse-titi nara.
13 Toranoo kara emin! Boso' aomata tao malole!
14 Tanda matalolole lahenda fo ta nau tuka hata fo ami dui' ana nai susura' ia dale'. Boso' tao dale' neu' asa, ela ara mae'. 15 Tehuu boso' tao si sama leo' emi musu-noo mara. Masa'ai si no malole sama leo' emi toranoo boki mara.
Paulus dui' nate'e susura na
16 Ramatua' a nana Mane' Mole-dame. Au hule fo Ana bati fee emi Ria mole-dame Na, nai basa hihii-nanau' ara. Ma au hule Ramatua' a sama-sama no emi la'o naroo.
17 Dedea mate'e oe' ia, au dui' mata ki, ela emi bubulu' mae, susura' ia tebe-tebe neme au mai. Basa susura' feke' ara au tao si leo naa' boe.a
18 Au hule fo ita Ramatuan Yesus Kristus natudu dale malole Na, neu' emi basa.
Susura' ia te'e ada' ia,
Paulus