Lahenda makaresi' a muste mai naulu', besa' ko Ramatua Yesus natafali mai
2
Toranoo kara emin! Besa' ia ami nau mafada emi la'e-neu' fai bea ita Ramatuan Yesus Kristus mai, ma la'e-neu' ita tabua to Ni.a 2 Boso' muda' laesa' hapu eedi-fufule', fo moi patararaa' a, kalu lahenda rae Ramatua' a natafali mai so. Leo mae ara rafada rae, sira bubulu' neme Manetualain Dula-dale Na, do ramanene neme lahenda, do ara hapu susura' neme ami mai, boso' mamahere si. Huu fo basa sira, nana dedea fufudi'. 3 Boso' mataa' lahenda tao ramakoa emi. Huu fo lahenda makaresi' esa muste mai naulu', besa' ko Ramatua Yesus natafali mai. Lahenda ria soa' tebe-tebe Ramatua' a, losa' tao na lahenda dodou' soa' Ana boe. Lahenda ria, mema' talalu naan seli! Huu ria naa, naraa ana maso' naraka. 4 Ana tao aon dema lena basa dewa ra ma soa' basa hata fo lahenda do'o-tabe neu' asa, losa' ana maso' leo Manetualain Uma Mamaso Yahudi Ina Na dale' neu, boe ma ana fapa ara na nae, “Au ia, Manetualain!”b5 Emi mafarene, do ta'a? Fai maneu' ara au afada mema' emi, la'e-neu' lahenda ria, tepo' fo au bei sama-sama oo emi a, hete?
6 Besa' ia lahenda makaresi' ria ta ledo-fai natudu aon, nana huu esa ri' namakee ni. Ma emi boe bubulu' ubea' ri' namakee ni. 7 Besa' ia lahenda tadalu' ria noi-tao nafufuni', nana huu bei hapu esa namakee ni. Tehuu neu' ko mana mamakee' ria napo'i lima na. 8 Boe ma lahenda tadalu' ria toda mai de ana mulai noi-tao ledo-ledo. Tehuu tepo' fo Ramatua Yesus natafali mai no rela-sa'an, Ana nalulutu' lahenda tadalu' ria, neni' noi dedea' esa' a.c
9 Tehuu, tepo' fo Ramatua Yesus bei ta mai, nitu ra malaka na fee kuasa bau-ina' neu' lahenda tadalu' ria, fo ana bisa tao tanda heran rupa' ara, losa' lahenda ra afi rae, ana pake Manetualain kuasa Na.d 10 No ria naa, lahenda dodou' hapu eedi-fufule' neme lahenda tadalu' ria napuputa na mai. Sira, nana neu' ko bika-bati reme Manetualain mai. Ana soi eno' fo nau po'i-tata na si, tehuu ara tipa heni Ria maksud malole Na, ma ta nau ramahere nanori-nafada roo-tetu'. 11 De Manetualain ena etu dale nara reme aafi roo-tetu' a, ela ara ramahere basa mapuputa' sira. 12 No eno' ria, Manetualain fee si hapu huhuku mabera, nana huu ara ta nau ramahere nanori-nafada roo-tetu'. Huu fo ara rahii' tao noi tadalu' a.
Lahenda kamahere' ara muste ranenete rahere
13 Toranoo kara emin! Ami muste hule makasi maroo neu' Manetualain, nana huu Ana sue-lai emi. Ana bei ta adu dae-bafo' ia, Ana naetu' mema' fee emi soda' mana basa taa'. Boe ma Ana fee Dula-dale Na tao nalalao-nalalafu emi, nana huu mamahere nanori-nafada roo-tetu'. 14 Tepo' fo ami tui-beka Tutui Malole a neu' emi, Manetualain pake Tutui Malole ria, fo naloo emi mameda mita ita Ramatuan Yesus Kristus rela-sa'an.
15 Toranoo kara emin! Manenete maroo ma homu matalolole basa-basan fo ami manori-mafadan neu' emi a. Mafarerene' neu' basa-basan fo ri' ami dui'.
16-17 Ami hule-haradoi maroo neu' Manetualain, ita Aman, ma Yesus Kristus, ita Ramatua Na. Ami hule fo Ara ratetea emi dale mara, ela emi tao basa hihii-nanau' malole ra. Ami hule leo naa', nana huu ami bubulu' Ramatua' a sue na ita basa seli. Huu no Ria dale malole Na, de Ana ta hahae natetea ita dale nara. No eno' ria, ita bisa tamahena taroo Ni.