Ami telu haitua susura' ia, fee emi jama'at nai kota Tesalonika. Emi ri' here ao mara tuka Manetualain ita Aman, ma Yesus Kristus ita Ramatua na.

Ami hule fo Manetualain natudu dale malole Na neu' emi ela emi bisa masoda no tetu-tema', mole-dame ma tesatei-tamadale'.^a

2 Ami hule makasi kose-kose neu' Manetualain, nana huu emi namahere mara. Tuka-tuka fai', ami hule-haradoi fee emi basa. 3 Ami mafarene maroo neu' nonoi' fo ri' emi tao, huu fo emi mamahere Ramatua' a, ma sue-lai Ni. Emi manenete mahere neu' nonoi' sira, nana huu emi mamahena Ramatua Yesus Kristus. Ami meni basa sira kose-kose leo ita Aman Manetualain mata Na neu.

4 Toranoo kara emin! Ami bubulu' Manetualain sue-lai emi ma here na emi dadi Ria kileo-boboki Nara. 5 Fai maneu' ara, ami leo Tesalonika meu, ami tui-beka fee emi Manetualain Tutui Malole Na. Fai ria, emi nenene matalolole ami dedea-nafada mara. Emi ta moi mamanene' a, tehuu emi boe mita mata' Manetualain kuasa Na, neme Dula-dale Malalao-malalafu' Na. Ria ri' tao na emi tebe-tebe sipo' Manetualain Tutui Malole Na. Tepo' ria, emi mita mata' ami natuu-napadeim mae, ami tao leo' bea, ela emi bubulu' tebe-tebe Manetualain eno-dalan. 6 Huu no emi maetu' nau tuka Manetualain hihii-nanaun, de emi masoda tuka ami leleo-lala'om, ma masoda tuka Ramatua Yesus leleo-lala'on. Tehuu fai fo emi sipo' Tutui Malole a, lahenda ruma rasususa' emi. Leo mae leo' naa boe, emi ta matakeko, huu fo Manetualain Dula-dale Malalao-malalafu' Na, tao ramaho'o emi dale mara.^b

7 No ria naa, emi matudu eno' neu' basa lahenda kamahere' fo rai propensi Makedonia, ma propensi Akaya. 8 Tehuu ta noi nai naa, huu fo Manetualain Tutui Malole Na boe tui-bekan neme emi fo nai Tesalonika, losa basa mamana' ain. De ami bei dedea ubea' bali, huu fo basa lahenda ramanene emi namaherem neu' Manetualain. 9 Nai basa mamana' ain, lahenda ratui' rae, fai maneu' ara emi sipo' ami no malole. Boe ma emi tu'u-tapa heni basa sosoko mara, de matafali tuka Manetualain roo-tetu' a. Huu fo emi nau dadi Manetualain Masoda' a nuu-enan. 10 Sira boe ratui' rae, emi mahani Manetualain Anan Yesus neme nusatetu-ikutema' a mai. Fai maneu' ara lahenda raisa Ni, tehuu Manetualain feen nasoda selu'. Kalu Manetualain nau fee huhuku' neu' lahenda dae-bafo' a, neu' ko Ramatua Yesus soi-tefa na ita teme Manetualain nasa-bolii Na.