Sadia fo sipo' Ramatua' a mamai Na
5
Toranoo kara emin! Ami ta parluu dui' mae, Ramatua' a mamai Na, la'e li'u hida, do bula' a fai' hida. 2 Huu fo emi basa bubulu', Ria mamai Na, nakeke' a sama leo' na'o a mai nai fai hatu'.a 3 Ria mamai Na sama leo' lahenda ratuu' nee-nee, kekeneu te ara hapu soe. Ma sama leo' ina kairus a, kekeneu te nameda boboki'. Kalu basa ia ra dadi, sona ita ta bisa tipa heni si! Ramatua' a natafali mai na leo naa' boe.4-6 Toranoo kara emin! Boso' losa, Ria mamai Na, noi saa' na emi, sama leo' na'o a mai fatilada na, naraa la'e emi suku mamanee. Emi boso' leo naa'! Ita ta tasoda nai ma'iu-mahatu' a dale', sama leo lahenda feke' fo suku ramanee. Nana huu ita fo tamahere Yesus, tasoda nai makaledo' a, sadia fo sipo' Ana, ma tanea tatalolole ita ao-ina' ara. Basa hihii-nanau' ia ra emi bubulu' asa! 7 Lahenda suku nai hatu', ma lahenda mafu' boe nai hatu'. 8 Emi boso' tao leo naa', huu fo ita tasoda nai makaledo' a dale'. Emi muste manea ao mara. Kalu emi mamahere maroo Ramatua' a ma masue-malai ao, sona sama leo' soldadu fo pake hata babaa ara'. Ma kalu emi mamahena maroo neu' Ramatua Yesus fo ri' po'i-tata na emi meme Manetualain nasa-boliin mai, sona sama leo' soldadu a babaa laka na pake silaka besi.b
9 Manetualain ta teka-here ita, ela hapu Ria huhuku Na. Tehuu Ana teka-here ita, ela hapu popo'i-tatata', nana huu tamahere Yesus Kristus ita Ramatua na. 10 Ana mate kati ita. De neu' ko Ana natafali mai, sona leo mae ita mana mate', do bei tasoda, basan hapu soda' mana basa taa'.c 11 Huu ria naa, pake au dedea-nafada ki sira fo esa natetea esa dalen, ma matulu-mafali ao sama leo' maulu na emi tao.
Paulus fee nanori-nafada' neu' jama'at rai Tesalonika
12 Toranoo kara emin! Fee hada-horomata neu' ina-ama mauli-malaka uma mamaso' ara. Sira roi-tao mela-maku raan seli fee emi, ma sira fee nafarerene' ela emi boso' tuda. 13 Doru' asa meni' emi susue-lalaim, huu fo ara roi-tao rahere soa-neu' emi. Masoda mole-dame esa no esa.
14 Toranoo kara emin! Ami saka' mafarerene' fee emi hihii-nanau' hida leo ia': mafada aomata' ara fo roi-tao tebe-tebe. Matetea dale manadoda' ara, tulu-fali lahenda aana' ara. Sabar neu' basa lahenda ra.
15 Boso' balas tadalu' no tadalu'. Tao noi nonoi-tatao malole fee basa lahenda ra. Tao malole neu' lahenda feke' ara, boso' noi neu' ita lahenda nara.
16 Mamaho'o-matadale maroo. 17 Hule-haradoi la'o naroo. 18 Leo mae susa, do mamaho'o, hule makasi neu' Manetualain. Manetualain nahii' basa lahenda fo tuka Yesus Kristus a tao leo naa'.
19 Boso' ena-babaa Manetualain Dula-dale Malalao-malalafu' Na nonoi-tataon. 20 Kalu toranoo' esa nae, ria sipo hehelu' neme Manetualain mai, sona boso' madadae ria dedea-nafadan! 21 Muste parisa' matalolole hehelu' ria ela bubulu' mae, naoka-nasamu tebe-tebe neme' Manetualain mai, do ta'a. Kalu tebe, sona tuka leo. 22 Maheo' meme' basa tadalu' ara mai.
Paulus dui' nate'e susura na
23-24 Au hule-haradoi neu' Manetualain ela tao nalalao-nalalafu' emi. Ria tao na ita tamole-tadame ao. No ria naa, fai fo ita Ramatuan Yesus Kristus natafali mai, emi bisa mapadei' nai Ria mata Na ta nanuu sala' so'. Tebe! Ramatua Yesus naloo emi dadi Ria lahenda Nara. Ria dale na roos. Ana dedea ubea', sona tao natetun. De ita bubulu' neu' ko Ana napipipi-nalala'o emi no malalao-malalafu', leo Manetualain mata Na meu.
25 Toranoo kara emin! Boso' mafarene henin fo hule-haradoi fee ami nai ia.
26 Au hule ela emi fee haraoe soda-mole' neu' basa Manetualain jama'at nara rai naa.
27 No Ramatua Yesus kuasa Na emi muste lees au susurak ia, fee basa jama'at ara.
28 Au hule fo ita Ramatuan Yesus Kristus natudu dale malole Na neu' emi basa.
Te'e ada' ia leo,
Soda-mole'
Paulus