Eno masoda' fo tao namaho'o Manetualain dale Na
4
De leo ia', toranoo kara emin! Ami lele'o emi, ela leo' bea na, emi masoda mara, tao na Manetualain dale Na namaho'o, sama leo' ami manori-mafada emi. Tebe emi masoda tuka basa sira. Huu fo ita dadi Ramatua Yesus kileo-bobokin nara, de ami hule emi boe-boe moi-tao mahere selu'. 2 Emi basa bubulu' hata fo ami manori-mafadan neu' emi a, nana pake Ramatua Yesus kuasa Na. 3 Manetualain hihii-nanaun leo ia': masoda no malalao-malalafu'! Boso' makekeo-makakanu'. Boso' hohoke. 4 Emi muste manea matalolole ao-ina mara, fo masoda no malalao-malalafu' ela lahenda ra hada-horomata emi.a 5 Boso' tuka hihii-nanau ao-paa' a, sama leo' lahenda fo ta nalela' Manetualain. 6 Boso' saka oonto' ma hohoke lahenda fo sama-sama ramahere Manetualain. Manetualain nana Ramatua', neu' ko balas nonoi-tatao tadalu' leo naa' ara. Basa sira ami mafada emi la'i-la'i ma fee nafarerene' neme ulu' mai. 7 Manetualain naloo na ita, fo dadi teu' lahenda Nara. Ria maksud Na, ita muste tasoda lalao-lalafu', boso' makekeo-makakanu' sama leo' mana hohoke ra. 8 Bea ta tuka nanori-nafada' ia, sona ana ta tipa-tola' noi ami, tehuu ria boe tipa-tola' Manetualain, fo ri' fee Dula-dale Malalao-malalafu' Na neu' emi.9 Au ameda aan ta parluu dui' selu' fee emi la'e-neu' masue-malai ao toranoo' no toranoo', nana huu Manetualain ri' nanori-nafada emi nae, muste masue-malai ao. 10 Ami mamanene rae emi sue basa toranoo' fo rai propensi Makedonia. Tehuu, toranoo kara emin! Besa' ia ami hule fo emi sue-lai lahenda feke' a lena bali. 11 Saka eno' fo emi bisa masoda no tetu-tema'. Boso' sososo' leo lahenda feke' a nonoi-tataon, esa' ko noi' ria nonoi-tataon. Emi muste moi-tao, saka nanaa-nininu' meni' emi sosota heheli mara. Boso' mamahena lahenda feke'. Ami fee mema' nafarerene' ia neu' emi neme ulu' mai. 12 Kalu emi masoda leo naa', sona emi ta maheta lahenda feke'. Kalu lahenda feke' fo ta ramahere Kristus, ara rita emi masoda leo' naa mara, sona neu' ko ara rae, “Tebe lahenda fo ri' tuka Ramatua Yesus nana rasoda tuka roo-tetu na!”
La'e-neu' Ramatua Yesus natafali mai Na
13 Toranoo kara emin, besa' ia au nau afada emi hihii-nanau' esa, ela emi bubulu' tebe-tebe la'e-neu' lahenda mana mate' ara. Ita bubulu' neu' ko lahenda mana mate' ara rasoda selu'. De kalu Ramatua Yesus lahendan ruma mate, sona emi boso' susa, sama leo' lahenda fo ta bubulu' hihii-nanau' ia. 14 Ita bubulu' Yesus mate, boe ma Manetualain fee Ni nasoda selu'. Kalu leo' naa, sona neu' ko Manetualain boe fee lahenda kamahere mana mate' ara rasoda selu', ma nabubua naa si sama-sama ro Ramatua Yesus.
15-17 Huu fo kalu Ramatua Yesus natafali mai, ana onda neme nusatetu-ikutema' a leo dae-ina' a mai, neu' ko hapu haraoe bau-ina' fee pareta. Boe ma Manetualain eila'o-limalope nara malakan fo nai nusatetu-ikutema' a, fee pareta fuu saki. Boe ma Ramatua' a lahenda mana mate nara rasoda selu'. Sira roo ita fo ri' bei tasoda ia, nana so'u leo oa' a teu, ela sama-sama sipo' Ramatua Yesus mamai Na. De ita hapu soda' mana basa taa'.b