Paulus naetu' naan nadenu Timotius leo Tesalonika neu
3
1-2 Sadi emi bubulu', fai fo ami la'o ela emi, nana ta ami hihii-nanaum. Ami mahii' maan seli' meu dama emi tehuu ta bisa. Ami ta manenete so', huu ria naa ami maetu' fo madenu Timotius neti. Tehuu au oo Silas mahani' kota Atena. Timotius nana ami toranoom ma ami nonoom, no ami ei' esa sama-sama malala'o Yesus Kristus Tutui Malole Na. Ami madenu ni neti nana ela nanori-nafada emi ma natetea dale mara, ela emi namahere mara boe-boe natea neu' Manetualain.a 3 No ria naa, kalu emi hapu susa-lela boe, emi ta matakeko. Homu mahere emi namahere mara. Huu fo emi bubulu' mae, lahenda fo ramahere Kristus, neu' ko ara hapu susa-lela leo naa' boe. 4 Fai fo ami bei sama-sama mo emi a, ami fee nafarerene' neu' emi mae, lahenda fo ramahere Ramatua Yesus, neu' ko hapu susa-lela rupa'. Besa' ia basan dadi leo' naa, hete!5 Huu fo, au susa aan seli no emi natuu-napadei mara, de au adenu Timotius leo Tesalonika neti, ela ami bisa bubulu' mae, emi bei mamahere maroo Ramatua' a, do ta'a. Huu fo au dale ka doda', boso losa nitu ra malaka na neti fufudi' nala' emi, boe ma masadea Ramatua' a. Kalu dadi tao leo' naa, sona ami nonoi-tatao maulu ma mana dadi taa'!
Timotius fali, de neni tutui' neme jama'at fo nai kota Tesalonika mai
6 Besa' ia Timotius fali neme Tesalonika mai, ma neni tutui' de tao na ami mamaho'o. Ana tui nae, emi mamahere maroo Kristus, ma emi masue-malai ao maroo. Ana nafada nae, emi dale mara mafarene maroo, de mahii' maneta mo ami sama leo' ami boe mahii' maneta mo emi.b
7-8 Toranoo kara emin! Leo mae ami nai ia, mameda maan bera na seli' nana huu hapu susa-lela ta baiana', tehuu Timotius tutuin na tao na ami mamaho'o. Huu fo besa' ia ami bubulu', emi namahere ma natea naroo neu' Ramatua' a.
Paulus hule-haradoi fee jama'at rai Tesalonika
9 De ami hule makasi dodou' neu' Manetualain no dale namaho'o, nana huu emi tuka mahere Ni. 10 Hatu-leledon ami hule-haradoi la'o naroo, ela kalu bisa sona ami maneta moo emi bali. Ami nau manori-mafada emi ela matetea-mamemepe emi namahere ma neu' Ramatua' a.
11 Ami mamahehena' Manetualain, ita Aman ma Yesus Kristus, ita Ramatua Na, soi eno' fo ami bisa meu maneta selu' mo emi. 12 Ami hule neu' Ramatua' a fo Ana tao na emi boe-boe masue-malai ao. Ma emi boe sue-lai basa lahenda ra, sama leo' ami sue-lai emi. 13 No ria naa, Ramatua' a natetea emi dale mara, fo masoda no roo-tetu' ma lalao-lalafu', losa' fai fo Ramatua Yesus natafali mai no lahenda nara, emi mapadei' nai ita Aman Manetualain mata Na, ma ta nanuu sala'.