Paulus nafarene nonoi-tataon nai Tesalonika
2
Toranoo kara emin! Emi basa bubulu', fai fo ami meu malala'o Manetualain nonoi-tataon nai Tesalonika, ami ta sota hihii'. 2 Emi boe mafarene, tepo' fo ami bei ta leo Tesalonika meu, te lahenda fo rai kota Filipi rasususa' ma tao doidoso ami. Tehuu Manetualain natetea ami dale mara, de ami maparani tui-beka Manetualain Tutui Malole Na neu' emi, leo mae lahenda dodou' rahohoe' ro ami.a 3 Tepo' ria, ami meni Tutui Malole ria fee emi nai Tesalonika, ami ta meni nanori-nafada napuputa'. Ami ta meu tao mamakoa, do mapuputa' emi.4 Ta'a! Ami meu no dale roo-tetu'. Manetualain nadenu ami meni Tutui Malole ria fee emi. Ami ta tao mamaho'o lahenda dae-bafo' a dalen, tehuu tao mamaho'o Manetualain, huu fo Ria ri' teteni ami dale mara nae, roo-tetu' do pepeko'.
5 Emi boe bubulu' ami ta lalame maa mara, lena-lena' bali mae saka oonto' sen esa-dua neme emi mai. Manetualain bubulu' ami dale mara. 6 Ami malala'o nonoi-tatao' ia, ta saka i'io' neme' lahenda dae-bafo' a mai, neme emi mai, do neme lahenda feke' ara mai. 7 Ami nana Kristus lahenda nadedenu nara. De ami manuu haak fo tao ao mara sama leo' lahenda bau-ina', tehuu ami ta nau matutua-madedema ao mara leo naa'. Fai ria, ami dadi sama leo' ana aana' nai emi talada.b Ami boe matudu susue mara neu' emi, sama leo' mama boki' a nasusu' ana na. 8 Ami ta meni noi Tutui Malole a fee emi, tehuu ami boe fee heni katema' ao-ina mara, nana huu ami sue ma emi seli.
9 Toranoo kara emin! Emi boe tantu bei mafarene ami moi-tao hatu-leledon, losa' mela-maku maan seli' ela leo' bea na, ami lepa ao mara masoda ma. Huu no fai fo ami meni Tutui Malole ria fee emi, ami ta nau masosota emi. 10 Fai fo ami sama-sama mo basa emi kamahere' fo nai naa, ami masoda no dale lalao-lalafu', masoda tuka roo na, ma ta tao masala' hata esa boe'. Emi basa mita mata' ma Manetualain nita leo' naa boe. 11 Emi bubulu' ami malalau' emi basa, sama leo' ama boki' a nalalau' ana nara, 12 leo-leo' matetea emi basa dale mara, fee nafarerene' neu' emi ma lele'o emi, fo leo-la'o no malole, ela tao mamaho'o Manetualain dale Na. Huu fo Ria dadi Mane'. Ana naloo na emi fo dadi Ria kileo-bobokin, ma hapu hada-horomata' sama-sama mo Ni.
Manetualain fufu'a-aali emi dale mara
13 Ami ta hahae hule makasi neu' Manetualain, nana huu tepo' fo emi mamanene Tutui Malole neme ami, emi mamanene Manetualain Hara-dasin, tehuu ta lahenda dae-bafo' a hara-dasin. Manetualain ri' fufu'a-aali emi lahenda kamahere' ara dale mara.
14 Toranoo kara emin! Emi besa' ko mulai tuka Manetualain eno Na, tehuu emi nusa isi mara, tao rasususa' emi. No ria naa, emi mo lahenda kamahere' fo rai propensi Yudea sama-sama mameda mita susa, huu fo sira hapu susa neme lahenda Yahudi nara mai.c
15 Lahenda Yahudi ruma ta rafaduli Manetualain hihii-nanaun. Huu ria de ara tao doidoso ma raisa mana nesi mata fo ri' Manetualain nadenu si leo sira reu. Leo' naa boe, raisa Ramatua Yesus. Besa' ia ara rasaka eno', fo tipa-tola' ami. Ara musu ro basa lahenda ra, de Manetualain ta nahii' asa.d 16 Lena-lena' ara tao pute-ai rupa' ara, ela ami boso' meni Manetualain Tutui Malole Na fee lahenda fo ta Yahudi. Huu fo ara ta nau Manetualain po'i-tata na lahenda sira. No ria naa, sira boe-boe tao rauunu sala-siko nara. Manetualain namanasa, de neu' ko huku si.
Paulus nahii' naneta selu' no jama'at fo rai Tesalonika
17 Toranoo kara emin! Besa' ia, nau do ta nau, ita esa doo' a no esa, tehuu leo mae ao-paa' a nai doo' a boe, dale' a ta doo' a. Ami saka eno' fo kalu bisa, sona ami mai dama selu' emi, nana huu ami dale mara mahii' maneta mo emi. 18 La'i-la'i au saka' uu dama emi, tehuu nitu ra malaka na, soa tao pute-ai' naroo neu' au. 19 Emi bubulu', tao leo bea' de ami nau meu dama emi? Huu fo ami mamahena emi. Emi ri' tao mamaho'o ma maloloa ami dale mara. Bea ri' hopu nahehere Ramatua Yesus nade Na bali, huu fo noi emi so! Tepo' fo Ramatua' a natafali main, ami laka mara boti' nana huu emi. 20 Mema' tebe! Emi ri' matetea ma maloloa ami dale mara.