2 Emi muste makate hule-haradoi. Ma muste mameda la'e-neu' hihii-nanau' fo ri' emi dedea mo Manetualain, ma hule-haradoi meni' dale' henu' no makasi. 3 Boso' mafarene henin hule-haradoi fee ami, hule fo Manetualain soi eno', ela ami bisa tui-beka fee lahenda hihii-nanau' fo maulu na nafuni' la'e-neu' Kristus. Mafarerene' te au maso' bui a, nana huu au tui-beka fee lahenda la'e-neu' Kristus. 4 Hule-haradoi fo au bisa tui-beka Tutui Malole a no matetu', ela lahenda bisa bubulu' ratalololen.

5 Masoda no roo-tetu' nai lahenda fo ri' bei ta ramahere Kristus talada. Pake matalolole fai lela' fo Manetualain feen neu' emi.^b 6 Kalu emi dedea, sona dedea no balaroe-balanau'. Dedea sona la'e lahenda dalen, ela sira boso' doa' neu' emi dedea-nafadam. Pake dedea roo-tetu', fo kalu lahenda ratane emi, sona bisa mataa matafali' asa no malole.

7 Tikikus saka' mai tui emi la'e-neu' au leleo-lala'o ki. Ria nana, ami toranoo susuem fo ri' dite-tama nahere nalalau' Ramatua' a lahenda Nara. Maulu na, ria sama-sama no au malala'o Ramatua' a nonoi-tataon.^c 8 Au adenu ni, fo ana bisa neu natetea emi dale mara, ma bisa tui emi la'e-neu' ami nai ia.^d 9 Au adenu fali' Onesimus, fo tuka noo ni boe. Onesimus nana, toranoo susue' fo dite-tama nahere. Ria nana, emi lahendam. Sira dua, neu' ko tui emi la'e-neu' basa hihii-nanau' fo ri' dadi nai ia.^e

10 Aristakus haitua fee emi haraoe soda-mole'. Ara ena ni nai bui a, sama-sama no au. Barnabas toranoo na anan fo ri' nade Markus haitua haraoe soda-mole' boe. Maulu na, au helu mema' emi ae, kalu Markus mai dama emi, sona sipo' ana no malole.^f 11 Yesus, (fo taloo ni tae, “Yustus”) ana haitua fee emi haraoe soda-mole' boe. Neme basa tia-lai fo sama-sama ralala'o Manetualain nonoi-tataon, noi sira telu si' dadi lahenda Kristen neme lahenda nusa Yahudi a mai. Sira si' tao ratetea au dale ka.

12 Emi tiam Epafras nai ia, ma ana haitua fee emi haraoe soda-mole' boe. Ana dadi Yesus Kristus atan. Ana hule-haradoi naroo fee emi, ma hule fo Manetualain tao natetea emi namaherem, ma tao na emi bubulu' matetu' Ria hihii-nanaun.^g 13 Au afada mema' emi ae, Epafras noi-tao sota naan seli fee emi, ma fee lahenda Kristen fo rai kota Laodikia ma kota Herapolis.

14 Haraoe soda-mole' neme Demas ma doter Lukas, fo ri' ita sue-lais!^h

15 Au haitua haraoe soda-mole' fee toranoo kamahere' fo rai kota Laodikia. Boso' mafarene henin malosa' au haraoe soda-mole ka fee Mama Nimfa no basa lahenda kamahere', fo biasa rabua rai uma na.

16 Kalu emi basa nai Kolose, lees basa susura' ia, sona haituan fee lahenda kamahere' rai kota Laodikia, ela sira bisa lees boe. Ma emi muste lees susura' fo ri' au parnaa haitua fee si.

17 Mafarerene' fee Arkipus mae, “O boso' mafarene henin malala'o mabasa nonoi-laka', fo ri' o sipo neme Ramatua' a mai.”ⁱ

18 Boso' mafarene henin te ara bei ena au nai bui dale' ia.

Au hule fo Manetualain natudu dale malole Na neu' emi.

Au ri' lima-ree mata ki susura' ia.