3
Manetualain fee emi masoda bebeu', sama leo' Ana tao na emi masoda selu' sama-sama mo Kristus. Besa' ia, Kristus natuu' nai mamana hada-horomata nai Manetualain boboa ona Na. Huu ria naa, emi muste du'a-afi hihii-nanau' fo ri' tao namaho'o Manetualain dale Na.a 2 Du'a-afi maroo la'e-neu' hihii-nanau' fo Manetualain nahii'. Boso' tao dale' neu' hihii-nanau' fo tao namaho'o noi lahenda dae-bafo' a dale na. 3 Nana huu tepo' fo Kristus mate, emi mate sama-sama mo Ni boe. Boe ma emi masoda bebeu ma nanaheke' no Kristus, fo ri' sama-sama no Manetualain nai nusatetu-ikutema'. 4 Kristus nasoda nai emi dale', ma Ana tao na emi masoda roo-tetu'. Fai bea ma Ana natafali mai, emi toda sama-sama mo Ni. Basa sira nana, kahere' naan seli!Masoda' paraa' ma masoda' bebeu'
5 Huu ria naa, emi muste tu'u-tapa heni dale hihii tatao tadalu' mara. Conto leo-leo': mahii' hohoke; mahii' tao hihii-nanau' makakeo-makakanu' ara; mahii' tao tuka hihii-nanau ao-paa'; mahii' tao tadalu rupa' ara; ma tendetuu fo nau basa-basan dadi reu' o nuu-enam (sekonaa te, tendetuu' a sama leo' sosoko' ria, huu fo so'u madedema hihii-nanau' feke' de seti heni Manetualain). 6 Hihii-nanau' sira tao ra Manetualain namanasa naan seli, losa' Ana nau huku basa lahenda fo ta ramanene Ni. 7 Maulu na, emi masoda leo naa' boe, huu fo emi dale mara nanaheke' no hihii-nanau' tadalu' ara.
8 Tehuu besa' ia, emi muste tu'u-tapa heni katema' dale hihii tatao tadalu mara. Conto leo-leo': mahii' mamanasa; dale hanas; napeda dale'; dedea mamumulu lahenda nade malolen; ma dedea tadalu'. 9-10 Ma emi boso' mapuputa' esa no esa. Nana huu emi tu'u-tapa heni dale hihii tatao tadalu mara, ma foa ela emi eno masoda paraa mara so.b
Ma besa' ia, emi kati ni neni' dudu'a-aafi beu'. Ria sama leo' lahenda tu'u-tapa heni kakao-papake paraa makekeo nara, de pake kakao-papake bebeu makamoi'. Manetualain ri' adu na emi. Ma besa' ia tao Na emi boe-boe bubulu' Ana, ma tao na emi neu' ko dadi rupa-lole' esa sama leo' Ria.c 11 Nai soda bebeu' a dale', ita ta mete lahenda neme rou dea na tae, sira nana lahenda Yahudi, do lahenda ta Yahudi; lahenda fo sunat, do ta sunat; rarela' hadas, do ta rarela' hadas;d ata, do ta ata. Basa sira ta penting! Penting nana ri' kalu sira nanaheke' ro Kristus, ma kalu Ana nasoda nai sira dalen.
12 Manetualain here emi, nana huu Ana sue-lai emi. Ria maksud Na, ela emi dadi Ria lahenda lalao-lalafun, feke' neme lahenda dae-bafo' a mai. Huu ria naa, emi muste dadi lahenda manuu dale kasian, dale malole, dale naloe-nadae ao', dale balaroe-balanau' ma sabar. 13 Emi muste sabar ma esa bubulu' neu' esa. Kalu neme emi mai ruma saka dedea' no ria tia-lain, sona boso' mapeda dale'. Tehuu emi muste mafarene heni sala' ria, ma fee ampon neu' ana, sama leo' Ramatua' a nafarene heni emi sala mara.e 14 Mafarerene', te susue-lalai' a penting neme basa-basan mai. Emi muste pake susue-lalai' nai dale mara, sama leo' lahenda pake kakao-papake' nai ao-ina na. Susue-lalai' a, sama leo' abas fo heke-tenun dadi tema' malole. Ria ri' heke ita dadi teu' esa.
15 Ita bisa mole-dame to Manetualain, nana huu Kristus. De emi muste mataa' Kristus mole-dame Na ator emi dale mara. Manetualain nau emi basa masoda mole-dame esa no esa, nana huu emi basa nanaheke' dadi ao-paa' esa. Ma emi muste manuu dale makasi la'o naroo, huu fo Ana teka-here emi.
16 Kristus Hara-dasin nara, muste ator emi dale mara ma emi masoda ma. Hara-dasi' sira sama leo' hata-heto mabeli, fo ri' Ana fee emi. Emi bisa bubulu' hihii-nanau' dodou', tuka Manetualain dudu'a-aafin, nana huu Hara-dasi' sira ratudu eno'. Emi bisa pake si, fo manori-mafada ma fee nafarerene' neu' esa no esa. Kalu emi manori-mafada lahenda mara, sona boso' bara'aai si, tehuu pake dale balaroe-balanau' fo henu' no makasi. Pake sosoda i'io-o'oa', sosoda rohani, ma basa sosoda' fo ri' emi dui' ela io-oa Manetualain. 17 Boso' mafarene henin, te hata fo emi dedea ma tao a, ria nonoo' leo nae emi Ramatuam Yesus Kristus ri' tao basa sira. Ma hule makasi maroo neu' Ria Aman, Manetualain.f
Lahenda Kristen ara, muste rasoda leo bea' esa no esa?
18 Sao ina' ara! Emi muste mamania-mamanene neu' sao mara, nana huu ria naraa soa-neu' lahenda fo tuka Ramatua Yesus Kristus.g
19 Sao tou' ara! Emi muste sue-lai sao mara, ma boso' ese-rumun fo tao dale hedi ni.h
20 Ana' ara! Emi muste mamania-mamanene neu' ina-ama mara nai basa hihii-nanau', huu fo ria tao namaho'o Ramatua' a dale Na.i
21 Ina-ama ra! Boso' mahehedi' ana' ara, ela dale nara boso' doda' ma rapeda dale' ro emi.j
22 Ata ra! Nai dae-bafo' ia, emi muste tao tuka malaka mara nai basa hihii-nanau'. Boso' makate' noi nai fai fo ri' ara roi rerelu' emi. Tehuu saka eno na, fo tao mamaho'o dale nara kokosen. Moi-tao basa hihii-nanau' no matetu', huu fo emi bubulu' Manetualain noi rerelu' emi. 23-24 Emi tao sudi hata ubea', sona moi-tao no matetu' ma ao masee'. Emi muste moi-tao sama leo' moi-tao fee emi Ramatuam Yesus Kristus, ta fee lahenda dae-bafo' a. Emi malalau' Ana, neu' ko Ria bati-pala fee emi posaka'. 25 Tehuu kalu emi ta moi-tao no matetu', neu' ko Ana huku emi. Huu fo Ria nana, roo-tetu' ma ta mete mata'.k