sira fo leo rai kota Laodikia, ma sira fo bei ta parnaa raneta ro au. Nenene matalolole! Au nau emi basa bubulu' au oi-tao sota aan seli fee emi ma fee sira. 2 Au maksud ka, nau atetea sira basa dale nara, ela sira boe bisa nanaheke' dadi esa', nana huu ara rasue-ralai ao. Ma ramahere tebe-tebe, nana huu ara bubulu' matetu' Manetualain maksud Na fo ri' maulu na nafuni'. Mana mafuni' ria ri' Kristus! 3 Kalu emi nanaheke' dale' esa mo Kristus, besa' ko Ana fee katema' dudu'a-aafi' tande' fo emi parluu, ma nanori-nafada emi pake dudu'a-aafi' tande' ria, ela tao hihii-nanau' malole. Dudu'a-aafi' tande' ia ra, sama leo' hata posaka mabeli.

4 Au afada emi basa hihii-nanau' ia ra, ela boso' lahenda mai rapuputa', ma lalame maa nara ro emi. 5 Tebe au doo' a oo emi. Leo mae leo' naa, tehuu au ta afarene heni emi, nana huu au dale ka nanaheke' no emi. Ma amaho'o, nana huu au bubulu' emi masoda roo-tetu', ma emi bei mamahere tebe-tebe Kristus.

6 Huu no maulu na emi sipo' Yesus Kristus dadi emi Ramatua ma, de besa' ia, emi muste mamanene maroo Ni. Ria dadi emi Ramatua ma. 7 Kalu emi masoda nanaheke' mo Ni, sona emi sama leo' ai huu' fo ri' boe-boe natea-namepe, nana huu oka na narolo losa dae dale'. Ma emi sama leo' uma tea-mepe', nana huu rafoa ni nai fanderen matea. Emi mamahere tebe-tebe, sama leo' parnaa emi manori a. Ela leo' bea na emi dale mara henu' no makasi, nana huu basa hihii-nanau' fo ri' Manetualain taon soa-neu' emi.

8 Besa-besa ela emi boso' tuka lahenda feke' fo pake lahenda dae-bafo' a dudu'a-aafin, de naheo' heni emi meme eno roo-tetu' a mai. Ma boso' tuka lahenda dae-bafo' a nanori-nafada malelan huu-peda taa'. Sira nanori-nafadan ria, neme noi' lahenda dae-bafo' a dudu'a-aafin ma atoran dae-bafo' a. Tehuu nanori-nafada sira, ta raoka-rasamu rai Kristus dale'.

9 Basa-basan fo nai Manetualain ao-inan dale', sira rai Kristus ao-inan dale' boe. Ma Kristus dadi lahenda dae-bafo' sama leo' ita. 10 Huu no emi nanaheke' mo Kristus, ma dadi meu' Ria lahendan, de Ana tao na emi mamano'u-mamadai. Ria ri' dema lena basa kuasa ma basa mana pareta, leo mae malole do tadalu'.

11 Fai fo lahenda Yahudi sunat a, ara ee heni ‘mamae nara’ rou peda na fo dadi tanda nae, sira nana Manetualain lahendan. Tepo' fo emi dadi Kristus lahendan, emi boe ‘sunat’. Ria sosoa na leo ia': sunat nana, ta la'e-neu' lahenda ee heni rou' fo nai ao-ina na, tehuu la'e-neu' Kristus ee heni basa hihii-nanau' tadalu' a neme ita dale na. Ri' basa hihii-nanau' tadalu' fo ita taon, nana huu ita lahenda dae-bafo'.

12 Fai fo ara sarani emi pake oe, ria sama leo' emi nana natoi' sama-sama mo Kristus. Boe ma emi hapu soda bebeu', sama leo' Ria hapu soda bebeu' a boe. Emi hapu leo' naa, nana huu emi mamahere Manetualain pake kuasa marela-masa'an, fo fee Yesus nasoda selu' neme mamate Na mai. Ana pake kuasa ria, fo noi-tao nai emi dale mara.^a

13 Maulu na, emi sama leo' mate, nana huu emi manuu sala-siko rupa', ma bei ta dadi meu' Manetualain lahenda Nara. Leo mae leo' naa, tehuu Ana sae-safe heni emi sala-siko mara katema', ma fee emi soda bebeu', sama leo' Ana fee Kristus nasoda selu'.^b 14 Matetu na, ita muste hapu huhuku', nana huu ita talena laka neu' Manetualain atoran nara. Tehuu Ana ose heni ita huhuku nara, tepo fo ara paku Kristus nai ai kake' a.^{c d} 15 Nai naa, Ana naseki kuasa maiu-mahatu' ara, ma basa-basan fo ri' pareta no tadalu'. Boe ma Ana namamae' asa rai lahenda dodou' matan. Ria sama leo' soldadu naseki nai natati ao' a, de la'o rule-feo ranononda ratudu sira musu-noon fo ri' ara raseki si.

16 Kalu lahenda nau ratuda emi la'e-neu' atoran nanaa-nininu', sona boso' tao dale' neu' asa. Ma kalu lahenda nau radedea ro emi la'e-neu' fai malole ra, do feta bula bebeu', do atoran fai hahae ao', sona boso' mamanene si.^e 17 Hata rupa leo naa' ara, ta penting! Huu fo hata sira sama leo' salao', de neu' ko sapu-lalo. Tehuu Kristus nana tea'. Ria nasoda naroo.

18 Kalu lahenda nau ratuda emi, nana huu emi ta tuka atoran fo ri' sira tao, sona boso' mamanene. Kalu emi mamanene neu' asa, sona emi ta bisa sipo hihii-nanau' fo ri' Manetualain nau fee emi. Tehuu besa-besa! Tebe lahenda rahii' saka eno' ela ratuda emi. Ara nau emi muste maloe-madae ao mara, ma soko neu' Manetualain eila'o-limalopen rai nusatetu-ikutema' a, nana huu ara raendobuko mei-afe' a natudu si leo' naa. Ara tao ao nara lena reme lahenda feke' ara mai. Sekonaa te, ta leo naa'! Sira dudua-aafin sama leo' lahenda dae-bafo' a boe. 19 Sira ta nanaheke' ro Kristus. Sekonaa te, Ria nana Laka'. Ma Ria lahenda Nara, sama leo' ao-inan fo Ria ator. Ana tao na lahenda nara boe-boe tea-mepe', pake Manetualain kuasa Na. No ria naa, ara dadi sama leo' ua' ma dui', fo nanaheke nahere' de ratulu-rafali ao esa no esa, losa' ao-ina katema' esa bisa noi-tao no malole.^f

20 Emi mate sama-sama mo Kristus. Ma emi ta nanaheke' mo kuasa maiu-mahatu' nai dae-bafo' ia so'. Ubea' taon, de emi bei tuka maroo dae-bafo' a atoran rupa-rupa nara? Ara rae leo ia': 21 “Boso' homu ia; boso' mia ria; boso' tototo ia.” 22 Tehuu lahenda dae-bafo' a ri' tao atoran sira, fo ranori-rafadan soa-neu' lahenda ra. Sekonaa te atoran sira ator noi hihii-nanau' fo neu' ko sapu-lalo! 23 Uni' ko leo lahenda bisa tao tuka atoran sira, dale nara rae, neu' ko lahenda hada' asa, ma tao si reu' lahenda malela', lahenda dudu'a-aafi naru', lahenda maloe-madae ao', ese-rumu selu' ao-ina nara, makate soko-taku. Sekonaa te ta'a! Atoran sira ta bisa ator ratalolole lahenda dae-bafo' a dudu'a-aafin, ma lahenda dae-bafo' a dalen fo ri' rahii' tao tadalu'!