2 Au hule ina' sira dua, si' Yodia no Sinteke, fo boso' rareresi' bali. Ara muste radame ao, ela rasoda malole esa no esa. Huu fo sira dua Ramatua' esa, de sira dua dale' esa.

3 Tia-lai mananoi-manatao ki! Au hule fo, o urus toranoo ina' sira dua, losa' ara malole ra ao nara. Maulu na parnaa ara roi-tao sota raan seli, fo tulu-fali au tui-beka fee lahenda la'e-neu' Manetualain Tutui Malole Na. Sira boe parnaa roi-tao leo naa' sama-sama ro Klemens, ma tia-lai feke' ara. Sira basa nade nara, mana dui' nai Manetualain susura dudui nade', lahenda fo neu' ko rasoda sama-sama ro Ni nai nusatetu-ikutema' a.

4 Huu no emi dadi Ramatua' a lahendan, de emi dale mara muste ramaho'o hatu-leledon. Au afada selu' bali: dale mara ramaho'o la'o naroo!

5 Emi dale mara boe muste balaroe-balanau neu' basa lahenda. Ma boso' mafarene henin, te Ramatua Yesus mamai Na nanenea' so. 6 Kalu emi hapu susa, sona dale mara boso' doda' hata esa boe. Tehuu hule-haradoi neu' Manetualain, ela Ana tulu-fali emi nai basa hihii-nanau'. Ma basa-basan fo ri' emi hule, boso' mafarene henin so'u dale mara hule makasi neu' Ana. 7 Kalu emi tao leo naa', neu' ko Manetualain tao na emi dale mara tama. Mema' lahenda dae-bafo' a ta bisa bubulu' rae ubea' taon, de emi dale mara ta doda'. Tehuu no emi mamahere Yesus Kristus, de Manetualain tao na dale mara tama. Huu fo Ana nanea emi, de emi dale mara ma dudu'a-aafim boso' kaco.

8 Toranoo kara emin! Koe na leo ia': boso' du'a-afi mafarara'u. Tehuu manea emi dudu'a-aafim, dodoo hihii-nanau' fo raa la'e Manetualain dale Na, ma hihii-nanau' malole fo tao namaho'o lahenda dalen. Emi muste afi roo-tetu' ma lalao-lalafu'. Afi hihii-nanau' matetu' ara ma malole ra. Saka eno' fo lahenda feke' a bisa hapu hada-horomata. Saka eno' fo so'u-fua hihii-nanau' malole ra. Ma emi du'a-afi maroo basa hihii-nanau' malole ia ra. 9 Au anori-afada emi tuka Manetualain eno masoda Na. Emi boe muste tuka au eno masoda ka, ma tao tuka basa-basan fo ri' parnaa au dedea ma tao. Kalu emi tuka leo naa', sona Manetualain natetea emi dale mara, ela tesa-tama ma bisa masoda no mole-dame.

10 Au hule makasi ma io-oa Manetualain, nana huu emi ta mafarene heni au. Mema' au bubulu' maulu na emi mafarene au, tehuu bei ta hapu lela' fo tulu-fali au. 11 Au ta anuu maksud hule emi hata-hata esa boe'. Au ta parnaa kura-kai hata esa boe', nana huu au ateme aan, de hapu ubea' sona dai so. 12 Parnaa au masoda ka ta hapu hata-hata esa boe'. Au boe parnaa asoda nai manano'u-manadai' a. Au parnaa amalaa ma abete. Nai basa hihii-nanau' lala'en, au anori a koe na, de au bisa anenete nai masoda ka dale'. 13 Au bisa lepa-asaa basa hihii-nanau', nana huu Kristus tao natetea au!

14 Leo mae leo' bea boe, au hule makasi, nana huu emi matudu dale malole mara, fo tulu-fali au nai susa ka dale'. 15 Maulu na, tepo' fo au la'o ela propensi Makedonia, fo uu tui-beka Manetualain Tutui Malole Na nai mamana feke' ara, noi emi meme kota Filipi a ri' tulu-fali au doi la'o eno'. Jama'at feke' ara, ta'a. Tehuu emi bubulu' tutui' ria so. 16 Conto leo-leo', tepo' fo au nai kota Tesalonika, emi haitua doi' lai'esa-lai'dua, fo tulu-fali au boe.^a 17 Besa' ia, au ta anuu maksud hule hata neme emi mai. Au nau Ramatua' a balas fee emi ua-nale', nana huu emi dale mara malole a mo au. 18 Au sipo basa tutulu-fafali' fo ri' emi haitua neme Epafroditus mai. Ria dadi ua-nale' soa-neu' au, losa' besa' ia au ta kura-kai hata esa boe'. Ria boe dadi sama leo' tutunu-hohotu maboo meni', fo lahenda tunu-hotu ela do'o-tabe neu' Manetualain. Ma Manetualain sipo' tutunu-hohotu' ria no malole, nana huu ria ri' tao namaho'o dale Na.^b

19 Manetualain fo ri' au do'o-tabe Ni, namasu'i naan seli. Ma Ana bubulu' matetu' emi parluu mara. Boe ma neu' ko Ana natudu dale malole Na, ma fee emi ua-nale rela-sa'an, huu fo emi dale' esa mo Yesus Kristus. 20 De ela ita so'u tadedema Ama' Manetualain nade Na la'o naroo, losa doo na neu. Tebe ria!

21 Au haitua haraoe soda-mole' soa-neu' basa lahenda fo ri' tuka Yesus Kristus nai kota Filipi.

Au tia-lai ki fo rai ia, haitua fee emi haraoe soda-mole' boe.

22 Basa lahenda kamahere' fo rai kota Roma, haitua haraoe soda-mole' boe.

Leo' naa boe basa toranoo' fo roi-tao nai mane bau-ina' a uma mana pareta na. Ara haitua fee emi haraoe soda-mole'.

23 Au hule fo ita Ramatuan Yesus Kristus, natudu dale malole Na neu' emi basa.