2 Besa-besa mo mana mapuputa' fo ri' raseti lahenda rae, “Emi muste sunat fo dadi tanda nae, emi nana Manetualain lahendan.” Sekonaa te, Manetualain ta pareta nae leo' naa! Sira sala ria so! Leo mae leo' naa, tehuu ara bei usi rahere lahenda, sama leo busa ma'aa'. 3 Ara rae Manetualain sipo' lahenda nana huu ara sunat. Tehuu sala ria! Ita bubulu' Manetualain sipo' lahenda nana huu ramahere Yesus. Manetualain lahenda tetea nara nana si', ita fo tamahere Yesus! Ita ri' do'o-tabe neu' Ana tuka Ria Dula-dale Malalao-malalafu Na. Ita ri' so'u tadedema Yesus Kristus, huu fo Ana soi eno', de ita bisa dadi Manetualain lahendan. Ita ta bisa hapu popo'i-tatata', nana huu tuka lahenda dae-bafo' a atoran.

4 Maulu na au afi sala, sama leo' sira boe. Au ae, lahenda bisa dadi Manetualain lahendan, sadi ara sunat. Sekonaa te, ria nana lahenda dae-bafo' a atoran! Kalu tui lahenda dae-bafo' a nonoi-tataon, sona au bisa dedea koao' lena neme basa-basan nana huu maulu na, au nonoi-tatao ki tuka matetu' lahenda Yahudi ra atoran agama nara. 5-6 Tuka atoran agama a, tepo' fo au ina-ama kara boki basa au fai' falu, boe ma ara sunat au. Au boe lahenda Yahudi tea', huu fo au eme leo Benyamin, tititi-nonosi' neme ba'i Israel. Au makate tuka matetu' basa atoran neme partei agama Farisi, losa' ta hapu lahenda esa sale au bai' boe'. Lena-lena' bali, au makate tao doidoso lahenda fo tuka Kristus, nana huu au afi ae, lahenda ia ra tu'u heni ita atoran agama na.^a

7-8 Tehuu besa' ia au saledale-tu'etei ka mai tuka Yesus Kristus. De au ta koao neu' masoda maulu ka. Maulu na au afi ae, basa sira reni sosoa-raraa' neu' au, tehuu besa' ia sira sosoa-raraa taa' so. Hata fo ri' kahere' naan seli, nana ri': au bisa alela' Yesus Kristus fo ri' nanuu haak pareta au. Basa hihii-nanau' feke' a au tao si reu' kadafu'. 9 Au nau asoda abua-aesa oo Yesus Kristus. Leo mae au tuka atoran agama a katema' boe, Manetualain ta sipo' au. Leo mae au ae au lahenda roo-tetu', Ana ta sipo' au boe'. Tehuu au muste amahere Kristus dei, besa' ko Manetualain sipo' au nae, “Huu no Kristus sae-safe heni o sala-siko mara, de o malalao-malalafu'.”

10 Au hihii-nanau ki leo ia': au nau alela' Kristus. Au boe nau bubulu' Manetualain kuasan fo ri' Ana paken de fee Yesus Kristus nasoda selu' neme mamate Na. Uni' ko leo lahenda nau tao rasususa' au, nana huu au tuka Kristus, sona pesin neme' naa. Huu fo lahenda tao rasususa' Kristus boe. Kalu lahenda nau raisa au, nana huu au alalau' lahenda ra, sona au sipo'. Huu fo Kristus boe mate leo naa' soa-neu' au. 11 Ma kalu au mate, sona neu' ko Ana fee au asoda selu'.

12-13 Toranoo kara emin! Au ahii' tuka Kristus eno masoda Na ma Ria hihii-nanaun katema'. Tehuu tui neu' tea na, au bei ta tuka matetu' leo' naa. Huu ria naa, au ahehere ao ki, nana huu Yesus Kristus here au fo tuka Ni. Au sama leo' lahenda fo nalai ina' a, de ana bisa losa too a. De au alai aroo mata uu, ma ta lipe dea' fo afi hihii-nanau' maulu' ara. Au afarene heni si. 14 Tehuu au alai ina' losa too a, de hapu beker. Au hadia ka nana ri': neu' ko Manetualain sipo' au nai nusatetu-ikutema' a, nana huu au amahere Yesus Kristus.

15 Au hule emi basa fo ri' mori ma maoka-masamu nai Kristus dale' a, bisa dale' esa mo hihii-nanau' ia ra. Tehuu kalu bea nanuu dudu'a-aafi feke', sona ela Manetualain ri' natudu fee eno kalua roo-tetu'. 16 Leo mae leo' naa, tehuu ita muste hopu tahere, ma tao tuka basa hihii-nanau' roo-tetu', fo ri' Manetualain nanori-nafadan neu' ita.

17 Basa toranoo kara emin! Emi muste hai conto neme au eno masoda ka. Emi ruma rai naa, eno masoda mara sama leo' au boe. Tehuu bea ri' bei', sona bisa nanori natalolole neme sira mai, fo tao tuka leo' naa boe.^b 18 Besa-besa mo lahenda fo ri' ralena laka neu' Kristus, ma ara ta sipo' no malole Ria mamate Na nai ai kake'. Sira eno masodan ria, ri' natudu sira nalena-laka nara neu' Kristus. Au parnaa afada emi la'e-neu' lahenda rupa-mata leo naa' ara, tehuu besa' ia au afada selu' emi bali no luumata-pinuidu. 19 Neu' ko Manetualain tipa-tola' asa, boe ma tu'u-tapa si leo ai-pila naraka a reu, nana huu ta dale' esa ro Ni. Ara tao noi hihii-nanau' tadalu', ma ara saka eno' fo tao ramaho'o ao-ina heheli nara, losa' ara koao ro sira tadalu nara. Ara ta mae'. Sira du'a-afi sama leo' lahenda fo ta ralela' Manetualain.

20 Emi boso' tao tuka si, tehuu tao tuka ami. Huu fo ita dadi Manetualain lahendan, ma ita homu haak nai nusatetu-ikutema' a. Besa' ia tahani ita Ramatuan Yesus Kristus. Neu' ko Ana onda fali' neme nusatetu-ikutema' a mai, fo po'i-tata na ita teme Manetualain nasa-boliin. 21 Neu' ko Kristus narali ita ao-ina mana dadi taa', manamopo-manamate' ia, dadi ao-ina bebeu' fo ta mopo-mate, sama leo' Ria ao-ina marela-masa'an. Ana tao narali ita ao-ina na, pake kuasa bau-ina Na. Ma Ana pake kuasa ria boe, de tao na basa-basan fo nai mamana' bea a, raloe-radae ao nara tuka Ria pareta Na.