Ramatua Yesus lahenda nara muste rasoda reu' esa'
4
Au alala'o Ramatua ka nonoi Na, losa' au dadi lahenda mana huku'. De besa' ia, au nau lele'o emi fo masoda roo-tetu' tuka Manetualain hihii-nanaun, nana huu Ana naloo emi dadi Ria lahendan. 2 Huu ria naa, emi muste masoda no naloe-nadae ao', ma balaroe-balanau' esa no esa. Emi muste sabar, masue-malai ao fo boso' mapeda dale'.a 3 Saka maroo eno na, fo masoda mole-dame esa no esa, nana huu Manetualain Dula-dale Na nabua-naesa no emi. 4 Yesus Kristus lahenda nara dadi esa', sama leo' Ria ao-ina heheli Na. Ma sira basa boe sipo' Ramatua' a Dula-dalen, fo ri' noi esa' a. Ma sira basa ramahena noi neu' Manetualain, nana huu Ria ri' naloo si ela dadi Ria lahendan.5 Ita Ramatua na nanuu haak pareta ita, noi esa' a;
Ita namahere na, noi eno' esa' a,
fo bisa mole-dame to Ni.
Ma ita basa sarani,
ela tabua-taesa to Ni.
6 Manetualain noi esa' a,
ma noi Ria ri' ita Aman.
Noi Ria ri' pareta ita basa.
Noi Ria ri' sama-sama no ita basa.
Ma noi Ria ri' nasoda nai ita basa dalen.
Kristus fee nonoi-laka rupa', ela Ria lahenda nara boe-boe ratea-ramepe
7 Tehuu Yesus Kristus bati kuasa Na fee ita, ela ita esa-esa talala'o Ria nonoi-tataon. 8 Huu ria naa, mana dui' nai Manetualain Susura Makamoi Na nae,
“Ana hene-ae leo mamana madema a neu,
de Ana natati nai naa losa' naseki.
Boe ma Ana noo fali' mana huku' dodou',
ma bati fee lahenda dae-bafo' a hadia.”b
9 (Susura Makamoi' a mana dui' nae, “Ana hene-ae”. Kalu Ana hene-ae sona sosoan na nae, maulu na parnaa Ana onda mai nai dae-ina' ia dae'. 10 De Lahenda fo onda a, nana ri' Kristus. Ria ri' hene-ae fali' leo nusatetu-ikutema' a neu, fo bisa urus basa-basan nai lalai ma dae-ina'.) 11 Kristus fee lahenda Nara kuasa, ela ralala'o nonoi-laka' fo ri' Ana bati-pala fee si. Ana fee ruma kuasa fo dadi Ria lahenda nadedenun, ruma dadi mana nesi matan, ruma dadi mana foo soa-neu' Ria lahenda Nara, ruma dadi manori-mafada malela' neu' Ria lahenda Nara, ma ruma bali dadi manatui-manabeka Tutui Malole leo mamana bebeu' reu. 12 Esa' ko sipo' nonoi-lakan, fo tao namano'u-namadai Kristus lahenda Nara, ela basa si bisa ralala'o Ria nonoi-tataon. No ria naa, ita basa fo ri' tamahere Yesus Kristus boe-boe tea-mepe', 13-14 losa' ita dadi esa' nai ita namahere na. Ma ita basa talela' matetu' Manetualain Ana Na. Ita ta sama leo' ana aana', huu fo ita tuka matetu' Ria eno Na, dadi lahenda namano'u-namadai', du'a-afi naru' ma tasoda tuka Ria hihii-nanaun katema'. Kalu ita tasoda leo naa', sona ita ta sama leo' apa manasobo idu', de hela ni bea' neu boe, ana tuka. Kalu manatipu-manadai' a mai nanori-nafada hihii-nanau' pepeko', sona ita ta tamakoa.
15 Fai bea ma ita dedea to lahenda, sona muste no matetu' ma balaroe-balanau' henu' susue-lalai', boso' bara'aai. Ma kalu ita tasoda leo naa' sudi nai hihii-nanau' ubea' a, sona ita dadi rupa-lole' esa leo' Kristus. Ria nana ita Malakan fo ri' ator ita. 16 Ma ita sama leo' Ria ao-ina Na. Kalu lahenda ein, liman, idun, ma bafa na roi-tao ratulu-rafali ao, tuka esa-esa' ko nonoi-lakan, sona ao-ina na tamba bara'ai'. Leo' naa boe Kristus lahenda nara. Kalu ita tasue-talai ao ma tatulu-tafali ao, sona ita basa boe-boe tea-mepe'.c
Foa ela eno masoda paraa' a fo tuka eno masoda bebeu'
17 Nenene matalolole hata fo ri' besa' ia au saka' afadan, huu fo Ramatua' a ri' nafada. Emi boso' masoda sama leo' lahenda fo ta ralela' Manetualain. Hata fo ara tao ni a, nana tuka noi sira koa-pakanaan. 18 Ara la'o ratotofa' sama leo' lahenda la'o nai maiu'. Ara rasoda bika-bati reme Manetualain, nana huu ara laka batu ma ta nau tao dale' neu' Ana. 19 Ara ta mae'. Huu ria naa, ara tuka noi sira hihii-nanau nara ma rasoda makekeo-makakanu'. Tehuu ara ta doa' boe'.
20 Tehuu Kristus eno masodan fo ri' emi manorin, ta leo naa'. 21 Hata fo emi manorin la'e-neu' Yesus Kristus, nana tebe nanori-nafada matetu' ria. Tantu emi mamanene so! 22 De foa ela emi eno masoda paraam ria! Kalu emi masoda makekeo-makakanu' tuka lahenda dae-bafo' a hihii-nanaun, sona emi hapu eedi-fufule' naroo. Emi ta manuu haak nai naa so'.d 23 Tehuu neme' naa ela Manetualain tao nabeu emi dale mara, ma dudu'a-aafim, 24 fo emi dadi lahenda dae-bafo' bebeu' tuka Ria rupa-lolen. Huu ria naa, emi muste matudu dale bebeu', lalao-lalafu' ma roo-tetu'.e
25 De besa' ia, hahae napuputa' a leo! Dedea roo-tetu' esa no esa, huu fo ita basa dadi esa', sama leo' ao-paa' esa nanuu ei', lima', mata' ma idu'.f 26 Kalu mamanasa, sona boso' mamanasa losa' tao sala'. Malole lena' emi malolole ao' leo! Boso' mapeda nasa-bolii' losa' ledo a tena.g 27 No ria naa, nitu ra malaka na ta bisa fufudi-lele'o nala' emi. Boso' mataa' ana hapu lela' bai' boe'! 28 Lahenda fo namana'o, hahae leo! Malole lena' lahenda leo naa' a noi-tao natalolole neni' ria puse-titi na, ela bisa bati sosota na buna-boan fee lahenda manato'a-manataa' ara. 29 Kalu dedea, sona boso' dedea tadalu' leo mae noi dedea' esa' a! Malole lena', dedea noi malole. Ma fee lahenda lelea-nonore', ela tulu-fali si no matetu' ma matetea dale nara. 30 Boso' tao dale hedi Manetualain Dula-dale Malalao-malalafu Na, huu fo Ria nai emi dale mara. Ma Ana ee-dede' basa emi nae, emi nana Manetualain nuu-enan. Ria Dula-dale Na boe nae, neu' ko losa dae-bafo' a nonoe na, te Manetualain po'i-tata na emi, fo emi hapu soda' mana basa taa'. 31 Boso' mapeda dale' mo lahenda feke'! Boso' heku nisi ma mo lahenda! Boso' mamanasa ao'! Boso' mahuu-malena! Boso' dedea mamumulu lahenda! Ma boso' tao hihii-nanau' tadalu feke' ara! 32 Tehuu malole lena' emi masue-malai ao, ma tao hihii-nanau' malole esa no esa. Emi muste mafarene heni lahenda salan ma fee ampon neu' ana, sama leo' Manetualain sae-safe heni emi sala mara, nana huu emi mabua-maesa mo Kristus.h