Paulus neni Tutui Malole fee lahenda fo ta Yahudi ra
3
Manetualain ta fifika-fafae feke' lahenda Yahudi ma ta Yahudi, huu ri na de Ana nadenu au, Paulus, tui-beka Yesus Tutui Malole Na fee emi fo ta Yahudi nai kota Efesus. Au alala'o nonoi-tatao ki ria, losa' au dadi lahenda mana huku'. 2 Tantu emi bubulu' Manetualain nadenu au, nana huu Ana nau natudu dale malole Na neu' emi. 3 Tebe, fai a ulu na Manetualain bei ta nafada lahenda dae-bafo' a la'e-neu' hata fo Ana naetu' soa-neu' lahenda fo ta Yahudi. Tehuu besa' ia Ana nafada hihii-nanau' ia ra neu' au. Ma ia ri', au dui' eetu' asa fee emi. 4 Kalu lees mabasan, sona emi bisa bubulu' Manetualain maksud Na la'e-neu' Yesus Kristus fo ri' Ana nafada neu' au. 5 Fai a ulu na, lahenda dae-bafo' a bei ta bubulu' Ria maksud Na. Tehuu besa' ia, Ana pake Dula-dale Na, fo nafada maksud ria neu' mana nesi matan, ma Ria lahenda nadedenu Nara. 6 Neme ulu' mai Manetualain naetu' basa leo ia': kalu lahenda fo ta Yahudi ramahere Yesus Kristus Tutui Malole Na, ara bisa dadi Manetualain ana nara, sama leo' lahenda Yahudi ra. Huu ria naa, besa' ia ita basa dadi kileo-boboki' esa, ma ita bisa sipo bela' ua-nale' neme Ama' Manetualain mai.7 Manetualain natudu dale malole Na, ma here na au dadi Ria lahenda nadedenun. Ana natudu kuasa Na neu' au, fo alala'o Ria nonoi-tataon. 8 Neme basa Manetualain lahenda nara, au ri' lahenda aana' aan seli. Leo mae leo' naa, tehuu Manetualain here au fo alala'o Ria nonoi-tatao marela-masa'an. Ana nau au afada lahenda fo ta Yahudi, la'e-neu' Kristus dale susue manaetu-manabasa taa Na. 9 Mulai neme Manetualain adu dae-bafo' ia, lahenda bei ta bubulu' Manetualain fee Kristus mai, tehuu besa' ia Ana nau au tui-beka fee basa lahenda ra la'e-neu' Ria maksud Na. 10 Ria maksud Na malole na seli. Ma Ana nau pake lahenda Nara fo ratudu dale hihii malolen ria, neu' basa kuasa ma basa mana pareta rai lalai. 11 Tepo' fo Ana bei ta adu dae-bafo' ia, Ana naetu' nau soi eno' ela po'i-tata na lahenda dae-bafo' a. Huu ria naa, Ana pake ita Ramatuan Yesus Kristus, fo tao tuka leo naa'. 12 Huu ria naa, ita fo tamahere Yesus Kristus, boso' boe bii teu dedea to Manetualain bali. Ana sipo' ita sudi fai bea a.
13 Mafarerene'! Au doidoso nana huu au alalau' emi lahenda fo ta Yahudi. Leo mae leo' naa, tehuu emi dale mara boso' doda'. Huu fo au lepa doidoso' ia, ela emi sipo malole na.
Paulus hule makasi neu' Manetualain
14 Tepo' fo au afi la'e Ama' Manetualain dale susue marela-masa'an, boe ma au sunda' undulaka ka fo hule makasi neu' Ana. 15 Ria ri' dadi Ama', neu' basa kileo-boboki' nai dae-bafo' ma nusatetu-ikutema' a.
16 Manetualain namasu'i naan seli ma dale Na malole ina',
de au hule-haradoi fo Ana fee emi Dula-dale Na ma kuasa Na, ela emi dale mara tea-mepe'.
17 Au hule fo Yesus Kristus nasoda nai emi dale mara, nana huu emi mamahere maroo Ni.
Ma au hule-haradoi fo emi masoda mabua-maesa mo Ria susue-lalain, sama leo' ai huu' fo boe-boe natea, nana huu oka na narolo losa dae dale'.a
18-19 Au hule-haradoi, fo emi mo basa Manetualain lahenda nara, bisa sama-sama bubulu' Kristus susue-lalain fo ri' lahenda dae-bafo' a ta bisa uku-sudi ralan. Susue-lalai' ria, bau na seli, loa na seli, dema na seli ma dodou' naan seli'!
Au hule-haradoi, fo emi bisa mameda mita Ria susue-lalain, losa' susue-lalai' ria henu dale mara ma masoda mara.b