Lahenda fo namahere Yesus Kristus sipo soda' bebeu'
2
Maulu na, emi malena-laka Manetualain pareta Nara ma tao sala rupa'. Huu ria naa, Ana tao emi sama leo' mana mate'. 2 Maulu na, emi masoda tuka dae-bafo' a hihii-nanaun, ma tuka nitu ra malaka na hihii-nanaun. Losa besa' ia, nitu ria bei fufudi-lele'o naroo lahenda dae-bafo' a, ela ara soa' Manetualain. 3 Maulu na, ita tasoda leo naa', losa' hata fo ita tamedan, do du'a-afin, do ita tao tuka noi ita hihii-nanaun. Ita lahenda dae-bafo' a tadalu' sama leo' lahenda feke' ara, huu ria naa Manetualain namanasa naan seli neu' ita, 4-5 ma Ana tao ita sama leo' lahenda mana mate' fo bika-bati teme' Ana mai. Leo mae leo' naa, tehuu Ana kasian neu' ita, nana huu sue na ita seli. Huu ria naa, Ana natudu dale malole Na ma Ana fee Yesus Kristus mai, ela fee ita soda' bebeu'. De Ramatua' a po'i-tata na ita, nana huu Ria dale malole Na.a 6 Yesus Kristus maten, tehuu Manetualain fee Ni nasoda selu'. Boe ma Manetualain nahene-naae' Ana leo nusatetu-ikutema' a neu, homu pareta nai naa. Manetualain tao leo naa' neu' ita boe. Ana fee ita soda' bebeu', boe ma Ana nahene-naae' ita ma ita homu pareta sama-sama to Kristus nai nusatetu-ikutema' a. 7 No ria naa, mulai neme besa' ia losa doo na neu, Manetualain natudu susue-lalain, ma dale malole marela-masa'an, nana huu ita tamahere Yesus Kristus.8-9 Tepo' fo emi mamahere Kristus, Manetualain po'i-tata na emi, nana huu Ria dale malole Na. Ana po'i-tata na emi, nana ta huu Ana nau balas hata fo ri' emi tao. Ria nana hadia, de Ana fee pardeo emi, huu ria naa emi ta hapu nete' de koao neu' hata fo ri' emi tao.b 10 Ita tasoda nana huu Manetualain adu na ita. Boe ma Yesus Kristus fee ita soda' bebeu', ela ita tao hihii-nanau' malole fo ri' Manetualain naetu' mema' neme fai a ulu na mai.
Manetualain sipo no malole basa lahenda nusa' ara
11 Toranoo kara emin! Emi bubulu' lahenda Yahudi ra homu rahere sira atoran sunat na, ma ara ta hika-hada' neu' emi lahenda fo ta Yahudi, nana huu emi ta tuka sira atoran! Sekonaa te ria nana noi atoran la'e-neu' lahenda dae-bafo' a ao-paa na, ta la'e-neu' lahenda dae-bafo' a dale na. 12 Tepo' fo emi bei ta mamahere Yesus Kristus, emi ta manuu haak dadi Manetualain lahendan. Emi bei ta maso' nai Manetualain hehelun, fo fai a ulu na Ana hekenee-barataa mema' no Abraham ma tititi-nonosi nara. Tepo' ria, emi leo nai dae-bafo' ia, ta bisa mamahena neu' Manetualain, nana huu emi bei dadi lahenda dea, 13 fo bika-bati meme Manetualain mai. Tehuu besa' ia, Yesus Kristus soi eno', ela emi bisa mabua-maesa mo Manetualain. Huu no Kristus maten de tao nasufu Manetualain dale Na, de emi bisa mole-dame mo Ni ma bisa dadi Ria lahenda Nara.
14 Fai a ulu na, ami lahenda Yahudi a ta bisa masoda mole-dame mo emi lahenda nusa feke'. Sama leo' tembok a tada bati ita. Tehuu no Yesus Kristus maten nai ai kake', Ana tao na tembok ria refa henin, de ita fo fai a ulu na musu-noo' a, bisa ta dame ao ela dadi lahenda nusa' esa. 15 Fai a ulu na lahenda Yahudi ra saka eno', fo rasoda malole ro Manetualain, pake sira atoran agama nara. Tepo' fo Yesus Kristus mate, Ana ta pake eno paraa' a, tehuu soi eno bebeu', ela lahenda nusa Yahudi ma lahenda nusa feke' ara, bisa rasoda malole ro Manetualain. No ria naa, basa si rabua-raesa dadi nusa beu' esa, de rasoda mole-dame.c 16 De Kristus mate nai ai kake' a, ela tao na lahenda nusa kadua' fo ramusu ao a dadi esa', ma no fali' asa leo Manetualain reu. Kristus tao namopo basa-basan fo maulu na dadi manaduduku-manapapau', de tao na si ramananasa ao'.d 17 Ana leo dae-bafo' ia mai, neni Tutui Malole fee lahenda Yahudi sama-sama ro lahenda feke' ara nae, “Fai a ulu na emi masoda musu-noo', tehuu besa' ia hapu eno', de emi bisa masoda mamole-madame ao.”e 18 De ami lahenda Yahudi, ma emi fo ta Yahudi sama-sama hapu eno' leo ita Aman Manetualain teu, nana huu Yesus soi eno' fee ita basa. Ma Manetualain Dula-dale Malalao-malalafu Na boe natudu eno' ria neu' ita basa.
Yesus Kristus lahenda nara sama leo' uma huhule-haradoi'
19 Huu no Yesus Kristus tatao Na, de emi lahenda ta Yahudi, ta lahenda dea so', fo ta manuu haak hata esa boe. Besa' ia emi manuu haak nai nusatetu-ikutema' a, huu fo dadi Manetualain kileo-bobokin. 20 Conto sama leo' Manetualain saka' nafoa uma esa. Ana natende batu buku' a, ri' Yesus Kristus. Boe ma Ana nafoa fanderen na, ri' mana nesi matan ma lahenda nadedenu nara. Ana natutule' batu ra reu' basa sira lain. Batu sira nana si' ita basa fo dadi Ria kileo-bobokin. 21 Ita sama leo' Manetualain uma tea-mepen, nana huu batu sira natutule natalolole' reu' batu buku' ria lain. Neu' ko uma ria boe-boe tamba bau-ina', losa' dadi neu' Ramatua a uman. 22 De besa' ia, Manetualain tao na emi fo ta lahenda Yahudi dadi sama leo' batu, sama-sama mo ami lahenda Yahudi. Manetualain natutule' na ita basa, fo dadi mamana leleo' fee Ria Dula-dale Na.