Matulu-mafali ao esa no esa
6
Toranoo kara emin! Kalu lahenda kamahere' esa tao sala', sona emi fo ri' manuu Dula-dale Malalao-malalafu' a kuasa Na, meu dedea mo ni meni' dale balaroe-balanau'. Boe ma moo fali' ana, ela tuka Manetualain eno matetu Na. Tehuu manea emi ao-ina mara ela boso' tuda leo ria sala na meu. 2 Kalu lahenda hapu susa, sona emi feke' ara tulu-fali ni. No ria naa emi tao tuka Kristus atoran. 3 Kalu lahenda natutua-nadedema aon nae, ria lena neme lahenda feke' a, sekonaa te ta leo naa', sona ana edi-fule selu' ao-ina na ria. 4 De lahenda ra muste esa' ko parisa' aon, hata fo ri' ana tao. Kalu hata fo ana tao ni a, malole a, sona neu' ko nameda naan dai so. Boso' mararaa' ana no lahenda feke'. 5 Au afada ae leo' naa, nana huu lahenda esa' ko lepa' aon hata fo ri' ana tao. 6 Tehuu lahenda fo sipo Manetualain nanori-nafadan, ana muste bati ria hata-nuun fee lahenda fo ri' nanori-nafadan.7 Mafarerene'! Manetualain bubulu' basa-basan. De boso' tipu-dai selu' ao-ina heheli mara, ma boso' tipu-dai Ni. Lahenda sele-kari hata ubea' nai oka-tine, neu' ko ana hapu fali' buna-boan. 8 Leo' naa boe, kalu lahenda tao tadalu' tuka ria hihii-nanaun, neu' ko ana hapu soda nalulutu'. Tehuu kalu lahenda tao hihii-nanau' malole tuka Dula-dale Malalao-malalafu' a hihii-nanaun, neu' ko ana hapu soda roo-tetu manaetu-manabasa taa'. 9 Huu ria naa, emi boso' ao mara mata' a tao hihii-nanau' malole. Naraa no ledo-fain te, ita hapu buna-boa malole, sadi ita tanenete taroo. 10 De kalu ita hapu lela', sona tao mema' hihii-nanau' malole fee basa lahenda ra, lena-lena' fee ita toranoo kamahere nara.
Paulus dui' nate'e susura na
11 Besa' ia au dui' mata ki susura' ia, pake dudui sela' mesan. 12 Mafarerene'! Manatipu-manadai' ara boe ramahere Yesus Kristus fo ri' maten nai ai kake'. Tehuu ara nau raseti emi fo sunat, nana huu ara bii lahenda Yahudi feke' ara neu' ko ese-rumu si, kalu ara ranori-rafada rae, Manetualain boe sipo' no malole lahenda fo ta tuka atoran sunat. Huu ria naa, ara rasosoro poo reu' lahenda Yahudi ra matan. 13 Leo mae ara sunat, tehuu sira ta tuka katema' atoran agama. Ara nau emi sunat, ela dadi sira lahendan. No ria naa, sira partei na so'u-fua si.
14 Tehuu au nau io-oa noi ita Ramatuan Yesus Kristus. Ana mate nai ai kake', ela namate basa hihii-nanau' tadalu' fo lahenda dae-bafo' a taon, tuka dae-bafo' a hihii-nanaun. Huu ria naa, au ta tao dale' neu' dae-bafo' a hihii-nanaun. Ma dae-bafo' a hihii-nanaun boe ta nai au dale'. 15 Sunat, do ta sunat, ria ta penting. Tehuu penting nana ri', ita sipo soda bebeu' neme Manetualain mai. 16 Au hule fo Manetualain natudu Ria dale susue-lalain neu' basa lahenda fo tuka au nanori-nafada ki, de ara bisa rasoda no tetu-tema', mole-dame, ma tesatei-tamadale', ma ratudu sira dale kasian nara esa no esa. Huu fo tebe-tebe sira dadi Manetualain lahendan.
17 Tui tea', te au ta nau tao dale' neu' basa hata ia ra. Au ao-ina ka pii' mesan, nana huu au alalau Yesus Kristus.
18 Toranoo kara emin! Au hule fo ita Ramatuan Yesus Kristus natudu dale malole Na neu' emi basa.
Noi ri naa' so!
Soda-mole' neme au,
Paulus