Kristus soi-tefa na ita
5
Fai a ulu na, lahenda Yahudi ra lepa bera' sira atoran agama nara. Tehuu besa' ia Kristus so'u heni mabera sira reme lahenda fo ri' ramahere Ni. Huu ria naa, besa' ia ita po'ilota'. De boso' emi nanaedi-nanafule' fo meu lepa selu' atoran sira, sama leo' ata!2 Nenene! Au Paulus, ri' mana dedea' ia. Kalu emi sunat tuka lahenda Yahudi ra atoran, sona Kristus maten ela soi-tefa na emi a, sosoa-raraa' ta'a so. 3 Kalu lahenda sunat, ria boe muste lepa na selu' atoran sira katema'. Emi mafarene, do ta'a? Maulu na au afada mema'. 4 Lahenda fo nau pake atoran ela tao na Manetualain sipo' ana no malole, ria tao aon bika-bati neme Kristus mai. No ria naa, ana tipa heni Manetualain dale malole Na. 5 Ita tamahere Yesus Kristus, nana huu Dula-dale Malalao-malalafu' a kuasa Na, de ita tiadea-radaara ma tamahena, neu' ko Ana sipo' ita no malole. 6 Leo mae lahenda sunat, do ta'a, ria ta penting. Tehuu penting, nana ri' lahenda namahere Kristus, ma sue lahenda feke'.
7 Maulu na, emi masoda tuka eno matetu' a. Tehuu besa' ia bea ri' napuputa' nala' emi, losa' emi ta tuka eno' ria so'? 8 Nanori-nafada napuputa' fo emi mamanene ni a, ta neme Manetualain mai. Sekonaa te Ria ri' naloo emi ela dadi Ria lahendan. 9 Hata fo ri' ara ranori-rafadan a, masososa na noi dedea' esa-dua. Tehuu neu' ko nanori-nafada' ria tao nalutu emi dudu'a-aafim. Sama leo' lahenda ame rabua ralu tetei' bai' no uu', fo saka' tao roti. Doo-doo boe ma ralu tetei' ria tao na uu mana ame' a aifuu katema'.a 10 Huu no ita dadi esa' to Ramatua Yesus Kristus, de au amahere ae, neu' ko Ana tao na emi mamahere selu' hata fo au anori-afada a. Ma Manetualain ri' neu' ko huku sudi la'e bea fo ri' tao nalutu emi namahere ma.
11 Leo ia', toranoo kara emin! Kalu au anori-afada ae, lahenda muste sunat, sona tantu au ta hapu selu' eese-rurumu' sama leo' besa' ia. Ma lahenda Yahudi ra ta tipa heni au nanori-nafada ki la'e-neu' Yesus mamate Na nai ai kake'. 12 Tehuu lahenda fo ri' tao ra emi laka mara dile la'e-neu' sunat, pesi si reme' naa ela sira si' ee heni ‘mamae’ nara!
13 Toranoo kara emin! Manetualain soi-tefa na emi, ela emi boso' boe nanaheke' mo atoran agama a. Tehuu emi boso afi mae emi po'ilota', de masoda tuka emi hihii-nanaum! Matetu na ri', emi muste masue-malai ao, ma malalau' esa no esa, sama leo' ata nalalau' ramatua na. 14 Nai Manetualain Susura Makamoi Na mana dui' nae, “O muste sue-lai lahenda feke' ara, sama leo' o sue-lai ao-ina heheli ma.” Kalu emi sue-lai maroo leo naa', sona ria sama leo' emi tao matetu basa atoran agama Yahudi.b 15 Tehuu kalu emi marui-marau ao esa no esa, sona meten leo! Ta doo bea boe' te, emi malulutu ao'!
Masoda tuka lahenda dae-bafo' a hihii-nanaun, do tuka Dula-dale Malalao-malalafu' a hihii-nanaun?
16 Leo' ia: kalu emi masoda tuka Manetualain Dula-dale Na hihii-nanaun, sona emi ta tuka lahenda dae-bafo' a hihii-nanaun so'. 17 Lahenda dae-bafo' a hihii-nanaun ta tuka Dula-dale' a hihii-nanaun. Ma Dula-dale' a hihii-nanaun ta tuka lahenda dae-bafo' a hihii-nanaun. Te sira dua rasei'! Huu ria naa, emi ta bole tao tuka hihii-nanau mara.c 18 Tehuu kalu Manetualain Dula-dale Na napipipi-nalala'o emi, sona emi ta nanaheke' mo atoran agama a.
19 Lahenda fo tuka lahenda dae-bafo' a hihii-nanaun, conto leo-leo': lahenda mana hohoke, lahenda fo dudu'a-aafin kekeo', mata mamae taa', 20 mana soko nitu, do manaa tei', namananasa ao', nasisipo bafa', namuti', namuu-nadau', nafarene noi ao-ina hehelin, duduku-papau' lahenda, rahii' tao kaco, 21 rapeda dale', mana mafu', tao feta-dote tadalu', ma bei tao sala feke' ara bali. Maulu na, au parnaa fee nafarerene' ae, lahenda fo tao tuka hihii-nanau' leo naa' a, ara ta bisa dadi Manetualain lahendan.
22 Tehuu lahenda fo nasoda tuka Manetualain Dula-dale Na hihii-nanaun, neu' ko Dula-dale' ria tao ni dadi neu' lahenda fo nahii' nasue-nalai ao, nanuu namaho'o-natadale', nahii' mole-dame, sabar, dale na malole a no lahenda, nahii' tulu-fali lahenda, nahii' homu nahere hehelu-barataan, 23 balaroe-balanau no basa lahenda, ma nanea natalolole ao-ina na. Ta hapu atoran esa horo hihii-nanau' ia ra boe'. 24 Lahenda fo dadi neu' Yesus Kristus lahendan, ana ta tuka lahenda dae-bafo' a hihii-nanaun. Huu fo dale hihii tatao tadalu nara, nanapaku' naisa' nai ai kake' a sama-sama ro Yesus. 25 De kalu Manetualain Dula-dale Na fee ita soda bebeu', sona ita muste tao tuka taroo Ria hihii-nanaun. 26 Huu ria naa, ita boso' tahii' saka hada-horomata, ma boso' esa soa' esa, ma boso' tamuti.